Disvilup di competencis linguistichis e svicinament dai zovins al mont dal lavôr, cun tant di promozion di esperiencis di alternance cu la scuele, a son i elements di fonde dal gnûf bant de Fondazione Friuli dedicât ae istruzion, che al met a disposizion 600 mil euros in gracie dal sosten di Intesa San Paolo.
La presentazion e je stade fate tes setemanis passadis a Udin, ae presince de assessore pal Lavôr, Formazion e Universitât Alessia Rosolen, dal dirigjent dai ambits teritoriâi di Udin e Pordenon Dino Castiglioni, dal diretôr gjenerâl di Intesa San Paolo dal Friûl-Vignesie Julie e Trentin Renzo Simonato, cul president de Fondazion Giuseppe Morandini.
In cheste edizion, in continuitât cun chê di prime, si à volût pontâ su la formazion indreçade a acuisî lis competencis linguistichis e su lis progjetualitâts che a permetin di svicinâ i students al mont dal lavôr, cun esperiencis concretis di alternance tra scuele e lavôr. Il bant al interesse, duncje, lis istituzions, lis realtâts publichis e privadis, lis impresis dal teritori, par ufrî ai zovins une rêt di esperiencis che e ridusi il divari, inmò vuê evident, tra il mont de scuele e lis realtâts produtivis.
Il bant istruzion de Fondazione Friuli al à ancje l’obietîf di promovi, dentri dai istitûts scolastics, ambients di aprendiment inovatîfs, midiant de dotazion di laboratoris avanzâts e di strumentazions tecnologjichis. Te edizion passade a son stâts premiâts 31 progjets che a àn permetude la instalazion di dotazions tecnologjichis e laboratoris in 11 scuelis, cul inviament di 20 progjets di potenziament linguistic. Il test integrâl dal bant e la modulistiche si cjatin sul sît www.fondazionefriuli.it
Par informazions si pues contatâ la Fondazion al numar 0432/415811 o vie pueste eletroniche ae direzion info@fondazionefriuli.it
Par esigjencis di nature tecniche su la modulistiche informatiche (ROL) si pues contatâ la assistence informatiche al numar 051/780397 o vie mail assistenzaROL@strutturainformatica.com ❚
Piero Cargnelutti