La Fondazion Friuli e à metût a disposizion 600 mil euros par progjets di restaur di bens di valôr. Il bant, che al è stât inviât tal mês di Març, al è indreçât a istituzions o a ents publics, a fondazions, associazions, ents religjôs che a intindin puartâ indenant progjets di restaur e di valorizazion di bens mobii e imobii di rilevance storiche e artistiche particolâr, ma ancje intervents di edilizie pal recupar di struturis destinadis a centris di agregazion, sedi pai zovins che pai anzians. Ancje par chest bant – il tierç, dopo chel sul benstâ e chel pe istruzion – la Fondazion e à metût in cjamp une sinergjie e un coordenament fuarts, in plui che cun Intesa Sanpaolo, ancje cu la Regjon e cu la Sorintendence archeologjiche, Bielis arts e paisaç, no dome cun chê di stiçâ e di racuei lis istancis dal teritori, ma ancje par coordenâ i intervents, evitant soreposizions e dispersions di fonts. Il bant al intint meti in vore mecanisims par ducj chei sogjets che a àn une responsabilitât di tutele e di valorizazion tai confronts dai bens storics e artistics che lis comunitâts a considerin une lôr ereditât, che e merete duncje di jessi preservade e tramandade aes gjenerazions futuris. Te edizion passade, cul bant 2019, al è stât pussibil finanziâ 37 progjets. In dut, jenfri il 1992 e il 2019, la Fondazion Friuli e à finanziât il restaur di passe 80 sculturis in len in 60 localitâts dal teritori regjonâl, e à contribuît a sù par jù 40 intervents di recupar architetonic tra façadis e edificis sacris dal teritori, ae sistemazion di 70 altârs lapideis e a ripristinâ plui di 80 ciclis di afrescs, e 80 tra pituris e palis di altâr. Cun di plui, e à sostignût il restaur di une cuarantine di orghins e furniments sacris dentri dal patrimoni di plêfs e gleseutis sparniçadis tra la plane, la culine e la mont furlane. Il bant par domandâ i contribûts si pues discjamâlu sul sît de Fondazion www.fondazionefriuli.it. La domande e à di jessi presentade dentri dai 20 di Avrîl. Si pues presentâ dome une richieste inte suaze di une des dôs tipologjiis di progjets previodudis. ❚