“Punto impresa”, un gnûf sportel inviât de Universitât dal Friûl in graciis dal contribût de Fondazione Friuli che ogni an al permet a 800 students di cjatâ lavôr. Che la Fondazione Friuli e vedi simpri vude une cierte atenzion pal mont de formazion si sa, ma in chest câs o fevelìn di un supuart inviât dal Ateneu furlan par miorâ i rapuarts jenfri Universitât e impresis. Chest gnûf servizi si clame “Punto impresa”: «Te nestre Universitât – al spieghe il referent dal ufici Marco Sartor – a lavorin 600 personis tra docents e ricercjadôrs tai diviers indreçaments di studi. Al è clâr che cuant che lis impresis a vegnin a domandâ un jutori al Ateneu si cjatin denant a di une babilonie. Par chest, trê mês indaûr al è stât inviât il sportel “Punto impresa”: al è un ufici – che i siei riferiments si cjatin ancje sul web e sui social network – che al è viert dute la setemane, e dulà che lis impresis a vegnin indreçadis te maniere miôr su la fonde di ce che a domandin».
Za in passât, la Universitât dal Friûl e veve inviât un rapuart cu lis impresis che a cirin determinadis figuris, e chest al à permetût a sù par jù 800 students ogni an di cjatâ lavôr midiant di un sisteme che al jude a tirâ dongje i curriculums par zirâju aes impresis che a domandin ciertis cognossincis. Cul supuart de Fondazione Friuli si à podût garantî un servizi inmò plui elaborât che al è stât inviât tai ultins trê mês: «Un altri servizi che o din – al spieghe simpri Sartor – al è chel di judâ lis impresis a risolvi lis lôr problematichis. Par esempli: si è presentade une aziende che e veve la necessitât di smaltî la plastiche. Nô o vin metût dongje i nestris ricercjadôrs e une aziende siderurgjiche par capî se chê tipologjie di plastiche e podeve jessi doprade di cheste ultime realtât produtive».
Un tierç jutori che “Punto impresa” al met a disposizion des realtâts produtivis dal teritori (e no dome, viodût che lis richiestis a rivin ancje des regjons dongje), al tocje la formazion: «Al capite tantis voltis – al siere Sartor – che lis impresis a vedin la necessitât di cualificâ il lôr personâl: par esempli, a àn tant che dipendents architets che dut câs no san nuie di “project management”. In chei câs, nô o sin in stât di inmaneâ i cussì clamâts “Master corporate academy” che a son masters che si davuelzin dentri dai locâi de aziende, come un distacament de Universitât dentri des impresis. O vin ancje lavorât in teme di trasferiment tecnologjic, cemût che al è capitât inte suaze de colaborazion cu la Fondazione Illy Caffé». ❚
Piero Cargnelutti