“Fontana di rustic amòur”

Ancje i 50 agns di Glesie Furlane, come dutis lis robis dal mont, si stan concludint e mi ven naturâl la domande: il nestri grup te sô azion e intindiments aial merit o isal falît?
◆ O rispuint subit: par me GF e je stade prime di dut une esperience de anime, un disvelâsi de libertât tal tornâ cjatâ me stes. Di cheste libertât dentri di me a saressin vignudis cussience di ce che o soi, veretât, trasparence, stime di me, relazion e dialic. Al jere un tornâ a nassi dopo i agns luncs des regulis dal seminari. Chest, o pensi, lu sintive e lu provave dut il grup.
◆ E jere une fuarce interiôr che nus faseve bulî tal cûr la passion pe int, pe Glesie, pe resurezion dal nestri popul e nus rindeve sclets, nus cjoleve la pôre, nus dave snait tal cjacarâ e tal frontâ la vite. Nus àn judâts in chest il clime burît fûr dal Concili Vatican II, i aiarons dal sessantevot, la personalitât vive e sclete di pre Checo Placerean, i tancj “lunis di sere” passâts te canoniche di Vasinis cun e dopo pre Pauli Varut e i incuintris fra di nô fats di studi, di amicizie e di preiere. In cheste esperience fortunade dal spirt, o vin sintude vere la peraule dal Signôr: Ce i zovial al om di vuadagnâ il mont intîr, se al piert la sô vite? Ce podaressial dâ l’om sore de sô vite? (Marc 8, 36). Cuant che une persone e rive a cjatâ la proprie anime, la vene profonde di se, no i impuarte ancje se e piert il mont intîr. Cheste scuvierte e je stade il segret di GF e di chest al dipent ce che o vin dit, fat e scrit.
◆ Puedial jessi cussì ancje pes personis che no acetin di simiotâ l’idul dal moment o di fâsi bielis cun ce che e petece la int? E chest par predis / oms / feminis che no vuelin vendi la lôr identitât uniche e origjinâl e une vite proprie che no si ripetarà mai plui tal univiers intîr?
◆ Cierts predis nus contestin che fra polemichis e obiezions “no i vin volût ben a la Glesie”. E je vere; no i vin volût ben a une determinade Glesie, ma o podìn dî cul cjâf alt che “o vin cirût il ben de Glesie”. No i vûl ben al frut la mame che lu laude contente, ma chei pais e mamis che cul scombati, cjapant dentri il cjastì, a indrecin il fi e la fie su la strade juste. Cussì al è stât di nô: o cuistionavin par une Glesie che e passàs dal clericalisim al popul, de tradizion sacrâl al vanzeli, dai abûs dal podê ae umiltât dal servî cjalant al unic nestri mestri: Jesù di Nazaret, il fi di Diu deventât fari, umil operari di paîs. Tal cirî une muse gnove di Glesie nus da reson, dopo cincuante agns, ancje la Vite Catoliche (13. 11. 2024) li che o ai cjatât scrit: “Per molti giovani la Chiesa è vecchia e non risponde ai loro interrogativi di fede… Non un rifiuto, ma la manifestazione di una delusione, che deve incoraggiare all’ascolto”. E noaltris o sin stâts scoltâts ben pôc.
◆ Pe cuistion de lenghe furlane soredut te messe, i nestris vescui a jerin ducj su la ferade segnade di bons. Giuseppe Nogara, vescul culì dal 1928 al 1955. Par fâ sparî il sloven te liturgjie des Valadis dal Nadison al scriveve: “Molto meglio una penetrazione che dirò pacifica. In questo seminario da tre anni si insegna lo slavo e fra qualche anno avrò qualche sacerdote italiano in grado di parlare lo slavo. Mandato in quei paesi potrà usare un linguaggio misto e poi a poco a poco usare quasi solo l’italiano” (Letare dal 29. 07. 1931). Chê “penetrazione pacifica” de lenghe taliane te liturgjie dai nestris paîs e je stade, di là di ducj i proclamis, la diretive dai nestris pastôrs fin in dì di vuê. Al fâs ecezion bons. Alfredo Battisti, che par necessitât ciertis voltis al è intervignût a pro dal furlan cun olse e inteligjence.
◆ Ultime penze magle nere de pastorâl dai vescui in cont di nô: ai 15 di Novembar dal 2023 la conference episcopâl taliane no à acetât e no à fat bon il Messâl par furlan.
◆ La Glesie catoliche e sta passant moments grivis in Europe, intant che tal sinodi gjenerâl dai vescui concludût a Rome chê altre dì (ai 27 di Otubar) al è stât dit che i cristians no son ancjemò madûrs par determinadis sieltis. GF no à mai tratât il nestri popul cussì; anzit la int e je par noaltris une mestre di scoltâ soredut midiant dai siei puars, strupiâts, vuarps e çuets (Luche 14, 21).
◆ O vin simpri sostignût che une sapience cristiane popolâr e tignive dongje lis comunitâts dai paîs; e sarès stade di valorizâ midiant di un laicat rindût responsabil, ma nol è stât fat.
◆ Sierant, no mi tocje a mi cjacarâ dal faliment o tiessi lis laudis di GF. Di ce che al è stât fat e scrit, si pues cjatâ une catalogazion te canoniche di pre Romano Michelot a Vilegnove di S. Denêl: un lavoron che dome lui al sa ce che i è costât. Pal rest o sai che No ‘nd è ricuart dai viei / e no ‘nt sarà nancje di chei che a vignaran / par chei che a saran dopo di lôr (Qoelet 1, 11).
◆ Cheste, di GF, e je stade une esperience uniche e iripetibile: o auguri che altris a puedin incjarnâ in altris circostancis chel spirt che o vin sintût dentri di nô e che nus à fats vivi libars e origjinâi in chest popul e Glesie. Cuant che o pensi a GF mi ricuardi di Pier Paolo Pasolini:
Fontana di aga dal me paìs. / A no è aga pì fres-cia che tal me paìs. / Fontana di rustic amòur. ❚