A son trente agns che al è muart pre Alfredo Maria Pellegrino Ernetti, frari benedetin e musicolic che si è dedicât cetant ae musiche religjose dal Friûl, soredut di stamp antîc. Nassût tal 1925 a Rocca Santo Stefano, dongje di Rome, al è muart a Vignesie tal 1994. Nol à mai vivût in Friûl ma al à vût tancj contats cun musicolics e musiciscj furlans soredut parcè che si è interessât a scandaiâ la antighe liturgjie e il cjant patriarchin, o miôr di Aquilee. Al è stât fondadôr di un istitût di prepolifonie dentri dal Conservatori di Vignesie e ancje de riviste musicâl “Jucunda laudatio”, indulà che al à publicât cetancj saçs in materie di musiche sacre antighe. Tra i siei scrits, un dai prins a interessâsi ae cause de musiche de Regio X, si ricuarde il test, chi cul titul voltât par furlan, “Il cjant aquileiês” jessût sul Osservatore Romano, e plui indenant “La musiche aquileiese”, “Il cjant aquileiês e la origjin de vilote”, indulà che Ernetti al ipotizave che la melopee des vilotis, la lôr condote melodiche e il savôr modâl, a àn cetant in comun cun chê cualitât di cjant gregorian che, juste apont, si clame aquileiês. Sedi monodic che in forme di polifonie antighe, soredut in cont dai discjants, il cjant popolâr furlan, la vilote in particolâr, al à di fat cetantis robis in comun cul cjant sacri. Cheste opinion dal frari e je condividude ancje di Luigi Garzoni, che di chest si intindeve par sigûr. Pellegrino Ernetti al è stât ancje e no pôc criticât, parcè che no simpri i siei studis a jerin rigorôs, e no di râr si basavin plui su opinions che no su provis ciertis. Ma nol è stât l’unic in chest sens. Ancje don Gilberto Pressacco al à no pôc svolât cu la fantasie fasint ipotesis che a son sigûr une vore interessantis, ma fin che la cjarte no “cjante”, no si pues vê la sigurece sientifiche di nuie, ancje intal setôr musicâl. Fat al è che il frari di Vignesie al à stiçât une vore il dibatit sul teme, inviant studis e aprofondiments impuartants, lant ancje a scandaiâ in tancj archivis dal Friûl, fin prime lassâts di bande, fasint comparazions une vore utilis par scuvierzi gnovis prospetivis su la tradizion musicâl aquileiese e patriarchine. A àn scrit di lui, oltri che Pressacco, ancje Pre Toni Beline, intun articul intitulât “Pellegrino Ernetti, cantôr de Glesie Aquileiese”, jessût intun numar di La Vita Cattolica dal 1994. Tra lis curiositâts plui stravagantis sul so cont, al merete ricuardât il “cronovisôr”: un imprest che Ernetti al diseve di vê inventât ispirantsi aes contis di Isaac Asimov. Si trate di un strument che al permet di cjapâ e riprodusi sunôrs e imagjins che a vegnin dal passât. Incredibile par no dî impussibile, cheste invenzion. No ’nd è provis de sô esistence e dut al reste inte sfere de fantasie pure. ❚
Frari Pellegrino Ernetti: studiôs dal cjant di Aquilee
Alessio Screm![](https://www.lapatriedalfriul.org/wp-content/uploads/2024/07/Il-frari-e-musicolig-Alfredo-Maria-Pellegrino-Ernetti.jpg)