Un calendari vivarôs par Lui e Avost cun artiscj internazionâi e locâi
Al è pardabon biel il titul “Friûl conciertant”, parcè che al fâs rivâ drete e sclete la idee di une Patrie fate di lûcs là che si concierte, ven a stâi là che “si sune insiemi”, metint a bon pro lis sôs bielecis di paisaç, culture e storie. Lis particolaritâts di ogni cjanton a son valorizadis cun visitis vuidadis, escursions e – clâr – cu la musiche, tante musiche. A son bogns cuaranteun apontaments in vincj comuns dal Friûl, cun trenteun localitâts e ospits internazionâi e ancje locâi, e cheste e je une altre robe biele, il confront e la condivision midiant di une art universâl.
◆ De mont ae lagune, dal Friûl di jevât a chel di amont, di ca e di là da la aghe in lûcs che a son prâts, zardins, vilis, palaçs, museus, glesiis, plêfs, areis tuteladis e patrimoni de Unesco.
Cul supuart dal Ministeri talian de culture, de Regjon Friûl-Vignesie Julie, de Direzion dai Museus dal F-VJ, dai tancj comuns cjapâts dentri, di Prima Cassa Fvg, de Confindustrie di Udin, de Universitât dal Friûl, de Associazion dimoris storichis talianis, dal Club pe Unesco di Udin e altris partners, cheste grande manifestazion tacade ai 20 di Jugn che e larà indenant fint ai 14 di Setembar. La organizazion e je dai Amîs de Musiche di Udin cu la direzion artistiche di Luisa Sello, che e je buine di coinvolzi tantis realtâts, in fuarce di une cariere internazionâl che le mene ator pal mont tant che ambassadore valide dal Friûl a nivel internazionâl.
◆ Cividât, Colorêt, Darte, Rivignan, Palme, Grau, Orçan, Aquilee, Gurize, Muimans, Luviee, Udin… e si podarès lâ indenant a nomenâ i paîs che a fasin orchestre, al è il câs di dilu, a “Friûl conciertant”. Il mês di Jugn al à viodût i prins siet concierts cun musiciscj di grant nivel. Tra i programs plui significatîfs al va nomenât chel dedicât aes aganis e ai benandants tal Cjistiel di Colorêt, cun protagonist l’insiemi strumentâl di flauts plui microteatri “Lis aganis”. I sunôrs di un repertori selezionât ben si son miscliçâts cun senografiis e leturis di contis furlanis fatis di Adriana Villotta.
◆ Il mês di Lui al viôt adiriture 26 concierts, cuasi un par dì. Ai 5, aes 20.30, tal Museu Archeologjic di Aquilee, e sarà la Artemisia Classica cuntun program mozartian; ai 7, ae stesse ore, l’ensemble al sarà a Muimans inte glesie di San Zuan e la dì dopo tal zardin di Palaç de Grazia a Gurize.
◆ Al è pardabon dificil dâ cont di cheste programazion tant largje, ma dutis lis informazions si puedin cjatâ sul sît www.amicimusica.ud.it. Par dî almancul dai nestris talents furlans, protagoniscj in tantis ocasions, al merete nomenâ il doi dal ghitarist Marko Feri e dal armonicist Igor Zobin, par un event pensât par “Go!2025”: ai 12 di Lui a Çurçuvint, anticipât di une visite vuidade a “Une Bibie a cîl viert”, dulà che ator pal paîs si puedin amirâ mosaics monumentâi fats di tancj artiscj innomenâts. Il doi di Gianni Fassetta, ancje lui ae armoniche, e Luisa Sello al flaut, al sunarà la dì dopo a Luviee inte glesie di Sant Andree. Il talent cjargnel Dree Nassivera, armonicist e compositôr, si esibirà ai 14 di Lui a Rualp. Ai 19 di Lui, a Dimplan inte Glesie di Sant Stiefin, la cjantante e violonceliste Cristina Nadal e sarà insiemi al cuartet di arcs Stradivarius, al cjantant Kevin Baliviera e al Côr Tite Copetti di Tumieç direzût di Daniele Cuder.
Inmò musiche di grups furlans cu la Guitar Gorizia Orchestra direzude di Claudio Pio Liviero, ai 21 di Lui tal Art Park di Verzegnis.
◆ In Avost a rivin la Orchestre Naonis-Donatello, direzude dal bulgar, diretôr in residence, Peter Dimitrov, ai 13 di Avost a Grau inte Basiliche di Sante Eufemie. Bruna Braidotti cul cuartet Euterpe e sarà protagoniste ai 22 di Avost a Clauian, e o fâs ancjemò il non dal clavicembalist tarvisian Alberto Busettini insiemi a Luisa Sello a Dartigne, ai 31 di Avost inte Glesie di Sant Martin, conciert anticipât di une visite.
◆ I concierts a son cuasi ducj a jentrade libare e lis visitis vuidadis, cutuardis in dut, a saran realizadis di int esperte, cultôrs di storie locâl, apassionâts de nestre tiere.
Lait a cognossi i nestris lûcs, inmò miôr se ai paisaçs e aes architeturis si unìs la musiche, cun repertoris une vore varis, e no mancjaran chei de nestre culture musicâl. ❚
