Il prin di Otubar di chest an i catalans a podaran rispuindi ae domande: «Volêso che la Catalogne e sedi un stât indipendent sot forme di republiche?». La date e la domande dal referendum lis à presentadis cuntune iniziative publiche, ai 9 di Juin stâts, il president Carles Puigdemont, compagnât di chei altris membris dal guvier catalan e dai deputâts des dôs fuarcis – Junts pel Sí e CUP – che a formin la sô maiorance.
A Madrid no le àn cjapade ben e a van dilunc a fâi cuintri al procès di autoderminazion de Catalogne ancje sul plan judiziari. La declarazion di Puigdemont, che no à valôr aministratîf e par chel no si à podût impugnâle denant dal Tribunâl costituzionâl, e je stade presentade de bande de Procure di stât par che il Tribunâl superiôr de Catalogne le dopri tai procediments in at cuintri di membris des istituzions catalanis tant che prove che lis azions istituzionâls e aministrativis za fatis – a tacâ de compre des urnis e des schedis par votâ – a coventin propit par fâ il referendum su la indipendence. A Barcelone a àn un altri ategjament e a disin che a sburtaran fin tal ultin par rivâ a un acuardi cul stât in cont de condivision formâl de consultazion.
Se no si rivarà, i catalans a saran «libars di scugnî… fâ di bessôi», magari cul repeç di stramudâ il vôt intune schirie di referendums fats in chê stesse dì e su chel stes argoment a nivel comunâl, stant che in passe 920 dai 947 Comuns catalans a son maiorancis politichis a pro dal dirit di decidi.
Ma nol è dome il referendum catalan. Ai 8 di Juin tal Ream Unît a son stadis lis elezions politchis anticipadis che la premier Theresa May e veve convocât cun chê di rinfuartî il so guvier, che però no son ladis cemût che e sperave jê. Di une bande i Conservadôrs a àn vinçût, ma no àn rivât adore a vê la maiorance assolude in parlament e cumò a scugnin vê la poie dai unioniscj nordirlandês di drete dal DUP, e di chê altre i Laburiscj, che dopo des aministrativis di Mai a someavin destinâts a pierdi ancjemò, a àn vuadagnât 30 parlamentârs. Un sucès pe linie di çampe puartade indenant dal leader Geremy Corbyn.
Tra lis fuarcis nazionalitaris al è cressût il numar di elets dal Sinn Fein te Irlande dal Nord (a son 7, prime a jerin 4) e dal Plaid Cymru in Gales (che a passin di 3 a 4). Il Partît Nazionâl Scozês (SNP), impen, cundut che al reste il plui votât in Scozie, al passe di 59 a 31 deputâts: al è stât par sigûr un passaç di vôts dal SNP al Labour, inte direzion contrarie di ce che al jere stât doi agns indaûr, però chest al reste il so secont risultât di simpri, ancje se al devente plui dificil rivâ in curt a fâ un gnûf referendum pe indipendence. Chei altris partîts di dimension statâl rapresentâts a Westminster cumò a son dome i Liberâi Democratics cun 12 deputâts e i Verts cuntun sôl elet, cui isolazioniscj dal UKIP che a son disparîts.
Te setemanis passadis si à votât ancje tal Stât francês. Achì lis elezions politichis a confermin il sucès dal gnûf president Emmanuel Macron, elet ai 7 di Mai stâts, cu la afermazion dal so partît (La Republique En Marche), la crisi dai Republicans, chê inmò plui fuarte dai Socialiscj e il ridimensionament dal Front national. Cun di plui a son segnadis dai bogns risultâts des fuarcis nazionalitariis, a tacâ de coalizion Pé a Corsica, che i siei candidâts a àn vinçût in trê des cuatri circoscrizions de isule.
Dongje de novitât assolude de elezion dai trê deputâts nazionalitaris cors Jean Félix Acquaviva, Michel Castellani e Paul André Colombani, a meretin ricuardâts ancje il passaç al secont turni dal alsazian Gérard Simler di Unser Land e dal breton Jean-Luc Bleunven e i bogns risultâts tal prin turni di Christian Troadec de plataforme Oui la Bretagne e dai candidâts di Euskal Herria Bai, che al è deventât il tierç partît tal Paîs Basc dal Nord cuntune medie dal 10,42% dai consens.
Marco Stolfo
