Si tornin a palesâ la crisi de UE dai stâts nazionâi in crisi e la dibisugne di une Europe diferente
Fintremai ae metât dal mês di Fevrâr chê dal virus dal Covid-19 e someave jessi une cuistion lontane, un probleme de Cine, de Coree dal Sud e po dal Iran. Impen intal zîr di pocjis setemanis il gnûf coronavirus al è deventât, in tiermins concrets e ancjemò di plui sul plan mediatic e de opinion publiche, un probleme european e soredut talian. In chel stes moment la epidemie, ancje par vie de sô difusion progressive a soreli a mont, e je stade ricognossude tant che pandemie e tant che alc che al tocje dut il mont e dute la umanitât. Che al fos alc che nus tocjave ducj cuancj al jere avonde clâr fint dal principi, cundut che par un pâr di mês la sô dimension mondiâl e globâl e vignive calcolade dome cun riferiment ae economie e duncje al impat economic di ce che al jere daûr a sucedi in Cine.
◆ Cu la sô rivade in Europe al è stât clâr ancje alc altri: cul Covid-19 i nazionalisims dominants a àn vuadagnât ancjemò plui spazi intes societâts e intal “discors” politic e istituzionâl a nivel statâl.
◆ La necessitât di fâi cuintri al virus e je deventade la ocasion pe esaltazion de nazion, de unitât de nazion e de sô unicitât. La juste dibisugne di solidarietât e di rispiet des regulis e je stade inneade intal mâr de retoriche nazionaliste, cu lis istituzions e cui media in bombe tal incjocâ la int cun bandieris e imnis e cu la int pronte a fâsi incjocâ.
◆ La voie di marcâ il primât de nazion si à palesade prime inte enfasi sul fat che il virus al fos stât isolât «de France» o «de Italie» (cuant che il so isolament no lu vevin fat ni lis “nazions” e nancje i stâts ma dome cualchi ricercjadôr, magari ancje in cundizions di vore precariis) e po cu la esaltazion dai «modei nazionâi» par fâi cuintri al virus: chel talian, «il plui imitât pal mont» cemût che o vin sintût par television vie pe plui part dal mês di Març, o chel dal Ream Unît a trazion inglese, che almancul in principi si à presentât tant che alternatîf aes politichis metudis in vore inte Europe continentâl.
◆ In diviers câs chel nazionalisim plui o mancul “banâl” – cemût che al disarès dal Michael Billig – al è stât compagnât ancje de impuartance simboliche, mediatiche e concrete de presince dal esercit e no dome par marcâ che chê cuintri dal virus «e je une vuere». Un altri aspiet rilevant al è chel de promozion tant che fatôr di eficience de centralizazion a nivel statâl des decisions e des politichis, ancje se nol è cussì, sei cuntune vision plui largje (il pastroç de sierade dai confins dai stâts in mancjance di coordenament e planificazion) sei cjalant i diviers teritoris, che ae fin, là che a àn podût, a àn provât a rangjâsi par lôr cont: par esempli, Gales e Scozie a decidevin di sierâ lis scuelis daurman, cuant che Boris Johnson al voleve tignî viert dut e dapardut.
◆ In cheste dinamiche, dongje dal Covid-19, a son saltâts fûr ancje altris “nemîs de patrie”: lis comunitâts substatâls, cui lôr “particolarisims”, chei altris stâts europeans, «che a sierin i confins e nus robin lis mascarinis» (ma lu fasin daûr dal interès nazionâl e de sovranitât, che a valin par ducj) e duncje la Europe, «che no fâs nuie» e «che e pense dome ai bêçs».
◆ In chest sens il virus al à tornât a palesâ la crisi dai stâts nazionâi, cu la lôr autoreferenzialitât e cui lôr limits operatîfs, e lis dificoltâts de Union Europeane (UE), simpri plui impeolade intune struture e intune ande intergovernative e economiciste, che però e diven propit dai stâts membris, de lôr crisi e dai lôr nazionalisims. La UE, cence competencis in materie di sanitât e paralizade par vie dai interès dai stâts e di une interpretazion dogmatiche di liberisim, che e à mostrât la sô muse piês cul discors dai 12 di Març de presidente de Bancje Centrâl, Christine Lagarde, e somee inviade a fâ alc di sest, almancul in prospetive, cu la compre di titui publics e privâts, cu la metude in bande dai vincui di belanç e cun invistiments publics “pe ricostruzion”.
◆ No je chê Europe dai popul che e coventarès, ma alc al è alc. ❚
