Martars ai 26 di Setembar – juste in chê che di passe cuindis agns e je la Zornade Europeane des Lenghis – il president de Republiche Francese, Emmanuel Macron, al à fat un discors te Universitât de Sorbone che al rilance la Union Europeane e ancjemò prime la unitât de Europe. Al à fevelât de necessitât di tornâ a fâ sù une Europe «sovrane, democratiche e unide», in stât di gjestî in maniere unitarie la difese, la sigurece e la gjestion de imigrazion
Tra lis propuestis fatis indenant a son la creazion di un fonts unic pal finanziament dai investiments comuns e par mantignî la stabilitât denant des crisis economiche, la metude adun di un ufici european pes domandis di asîl e di un program a pro de integrazion e de formazion dai rifugjâts e la organizazion di une polizie di frontiere europeane, di chel che al varès di jessi une sercit european e e di une politiche europeane unitarie tes relazions internazionâls, massime in direzion dal Mediterani, de Afriche e di soreli jevât.
Te sô relazion, che cualchidun le calcole un discors programatic che se al vignìs almancul in part metût in vore al podarès vuadagnâ une impuartance storiche e simboliche compagne de innomenade declarazion fate ai 9 di Mai dal 1950 dal ministri francês pai afârs forescj, Robert Schuman, Macron al à fevelât ancje di protezion civîl europeane, di inovazion tecnologjiche, di formazion, di zovins e di ecologjie, cu la definizion di un presit unic pal cjarbon e di une «Carbon Tax» par finanziâ lis politichis ambientâls.
Plui in gjenerâl, il president francês al à fat sunâ la svearine ai siei coleghis sorestants e al à mostrât di vê une vision positive e strategjiche. Nol à fevelât a clâr di federazion europeane ma par sigûr al à mostrât di volê fâ un pas in chê direzion. Se si pense che in tantis ocasions – de mancjade ratifiche de istituzion de Comunitât europeane de difese tal 1954 al risultât dal referendum sul Tratât «costituzionâl» tal 2005 – il Stât francês al à simpri vût pôre di molâ o di spartî cuotis di sovranitât, lis peraulis di Macron a son pardabon alc di gnûf.
Si viodarà in curt, daûr de rispueste di chei altris cjâfs di stât e di guvier de Union e des stessis azion che al metarà in vore l’incuilin dal Elysee, se a saran ancje i fats. O ben se e je dome une sorte di version gnove di chê «Europe des patriis» che ur à simpri plasût tant a Parîs.
Marco Stolfo