Il Tsunami democratic catalan che no si ferme e la situazion che e salte fûr des elezions politichis dai 10 di Novembar che e je sù par jù compagne di chê prime dal vôt. In cualsisedi maniere ce che al nas intal Ream di Spagne al va dilunc a jessi di grant interès.
Al è passât za un pôc di timp de sentence dal Tribunâl Suprem dal Ream di Spagne cuintri dai ativiscj e dai politics catalans arestâts dopo dal referendum pe autodeterminazion dal 1n di Otubar dal 2017, ma la reazion popolâr denant di chês condanis pesantis e je ancjemò in plene, cun formis di proteste e di mobilitazion ancje eclatantis, tant che i blocs de autostrade sul confin cul Stât francês.
Plui in gjenerâl, ce che al salte fûr e je la crisi de politiche e de democrazie, tal Stât Spagnûl e no dome culì. Cun di plui, tal câs specific, si palesin dutis lis contradizions e lis robis che no jerin pardabon stadis metudis a puest intal passaç dal franchisim al gnûf ordenament, cuarante agns indaûr.
Lu confermin il câs des gnovis elezions politichis (lis cuartis in cuatri agns) fatis cualchi setemane indaûr, ce che al à puartât ai 10 di Novembar e ce che al è daûr a vignî fûr tes ultimis setemanis. Vie pai mês passâts, dopo des elezions di Avrîl, il leader socialist e premier cence maiorance, Pedro Sanchez, al à brigât par che il so partît al fos al guvier di bessôl cu la poie esterne o de drete liberâl nazionaliste di Ciutadanos (C’s) o de çampe di Unidas Podemos (UP) o magari di dutis dôs, ma il risultât ae fin al è stât chel di tornâ aes urnis. Probabilmentri, però, l’intindiment di Pedro “il biel” al jere propit chel: tornâ a votâ cun chê di infuartî il so partît, indebilî i siei potenziâi “sostignidôrs esternis” e obleâ cualchidun di lôr, di ca o di là, a poiâlu cence jentrâ intune coalizion di guvier.
Fat il scrutini – ma la robe e someave clare za vie pe campagne eletorâl – si pues dî che a Sanchez i à lade strucje: il PSOE al reste il prin partît dal Stât spagnûl in tiermins relatîfs ma al va indaûr par numar di vôts e di sentis intal parlament e in gjenerâl (se si calcolin ancje UP e la gnove formazion di Mas Pais) il centriçampe spagnûl al piert percentuâls e elets, intant che intal schiriament di drete il Partido Popular (PP), che al veve cjapât un biel patafon inte Vierte, al à recupare a dam dai C’s, che a cjapin une petenade mostre, lassant la plui part dai consens ae drete estreme neofranchiste di Vox, che e rive al 15% e a 52 seçs.
In cheste suaze lis nazionalitâts storichis a mantegnin e salacor a infuartissin la lôr alteritât, ancje sul plan politic. Tal Paîs Basc i nazionaliscj centriscj dal AEJ-PNV a vuadagnin alc e a mantegnin lis lôr sentis intant che chei progressiscj di EH Bildu a rivin ancje a passâ di cuatri a cinc deputâts, intant che in Galizie i progressiscj dal Bloc Nazionalist Galizian (BNG) a tornin intes Cortes cuntun lôr rapresentant e soredut ni di une bande ni di chê altre no vegnin elets candidâts di Vox. Doi di chei, impen, a vegnin elets ancje in Catalogne, in graciis de trasfusion dai vôts dai C’s, là che la situazion tal complès e reste chê, une vore polarizade, cun ERC (partît indipendentist di centriçampe) che al reste la fuarce plui votade, ancje se al piert doi seçs di 15 a 13, cul centridrete catalanist di JxC che al vuadagne vôts e al concuiste une sente in plui (cumò a son vot) e cu la çampe alternative de CUP che e scree la sô partecipazion aes politichis spagnolis cun doi deputâts.
A Madrid al somee che PSOE e UP a vedin chê di dâsi dongje intun guvier di coalizion, però a àn di cjatâ almancul i vôts par tacâ. Viodarìn ce che al nas, ma par sigûr – se al sarà – nol sarà un guvier progressist. ❚
Marco Stolfo