Sfuei Mensîl Furlan Indipendent
Archivi de Patrie

FRIÛL EUROPE. Judiçs e judizis: Minority SafePack e Catalogne

............

«Al sarà ben un judiç a Berlin», ma par sigûr a’nd è un a Lussemburc. Ai 3 di Fevrâr stâts la Cort di Justizie de Union Europeane (CJUE) cuntune sô sentence e à anulât la decision de Comission Europeane (CE) di dineâ la regjistrazion di une propueste di iniziative dai citadins che e domandave di difindi i dirits des personis che a partegnin ae minorancis. In particolâr la prime sezion dal Tribunâl e à dât acet al ricors fat indenant dal comitât che tal 2013 al veve presentât il cussì clamât «Minority SafePack» e che al veve ricevût une rispueste negative de bande di Bruxelles.

Te iniziative, coordenade de FUEN (la Union Federâl des Nazionalitâts Europeanis, che e ten dongje associazions e altris entitâts che a son espression di diviersis comunitâts dal continent), a jerin une schirie di propuestis operativis che lis istituzions de Union Europeane a varessin vût di meti in vore a pro de lote cuintri des discriminazions e de promozion de avualiance di tratament pai citadins membris des comunitâts minorizadis. La Comission e veve boçât dut il progjet, par vie che lu veve calcolât fûr de sô competence. Pe Cort, invezit, la CE e varès vût di specificâ cualis che a jerin lis azions fûr de sô competence e di motivâ a clâr cheste sô valutazion, palesant su la fonde di cuâi elements e vignive cjapade sù. Il president de FUEN, Loránt Vincze, al à comentât in maniere positive il judizi, che si pues calcolâlu «une vitorie pes minorancis in Europe», ancje se «al è dome un passaç dentri di un percors plui lunc», stant che cumò i tocje ae Comission Europeane che, in plui di paiâ i coscj dal procès, e varà di tornâ a cjapâ in man il Minority SafePack e rispuindi pont par pont.

I judiçs a lavorin in plene ancje tal Stât spagnûl. Ai 10 di Fevrâr, denant dal Tribunâl superiôr di justizie de Catalogne, dopo vê scoltât i trê acusâts e diviers testemonis, il public ministeri al à confermât lis sôs acusis di disubedience grâf e di abûs aministratîf viers dal ex president de Generalitat, Artur Mas, de ex vicepresidente Joana Ortega e de ex assessore e pe educazion Irene Rigau, domandant par lôr la inabilitazion di dutis lis incarghis publichis dai 9 agns e 6 mês ai 8 agns e 7. Il motîf al è il rûl che a vevin vût intal inmaneâ la consultazion su la indipendence de Catalogne dai 9 di Novembar dal 2014, dopo che il Tribunâl costituzionâl spagnûl ur veve inibît ogni partecipazion ative cuntun at formâl di pôcs dîs prime. Ae fin dal mês passât al è tacât ancje un altri procès, simpri leât al percors di autodeterminazion catalan: ta chel câs a jessi sot acuse al è l’ex assessôr pe presidence dal guvier catalan, Francesc Homs.

Ma soredut, al lavore par fâi cuintri aes istituzions catalanis il Tribunâl costituzionâl spagnûl, che simpri un mês indaûr al à votât ae unanimitât a pro dal anulament des risoluzions pe indizion di un gnûf referndum su la indipendence fatis buinis dal Parlament di Barcelone ai 28 di Setembar dal 2016. La “consulte” dal Ream di Spagne e à fat savê che se il Guvier autonomic al larà dilunc su chê strade a saran ancje sanzions penâls. Il braç di fier tra Madrid e Barcelone nol va indenant dome tes aulis dai tribunâi. Propit procès e sentencis a deventin in gnovis ocasions di mobilitazion de bande dai indipendentiscj catalans, de rivade di Artur Mas ae prime udience dai 6 di Fevrâr, che si à stramudade intun corteu di 40mil di lôr, ae conferme des acusis cuintri di lui e dai siei coleghis, che e je stade la ocasion par marcâ il paradòs che «al ven fat un procès cuintri di un guvier che al à permetût ae int di votâ».

di Marco Stolfo

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +