FRIÛL EUROPE. La UE e je ferme, la Corsiche e ten bot e alc si môf in Catalogne

I fats di Nize e di Munic dai 14 e dai 23 di Lui e il dopli colp di stât in Turchie, ma ancje il braç di fier diplomatic tra la Corsiche e il guvier di Parîs, un incuintri a Bruxelles su la promozion des lenghis minoritariis e i risultâts di un scandai fat in Catalogne. In Europe a sucedin un grum di robis, plui o mancul brutis e plui o mancul bielis: par sigûr al è alc che si môf e dongje di chel la Union Europeane e je ferme, forsit parcè che no sa ce fâ e cemût.
Magari cussì no, a son ancjemò muarts e terôr. Dopo che intant dai campionâts europeans di balon no son stâts problemis di ordin public, fûr che tal câs des violencis dai hooligans inglês, rus e cravuats, tal Stât francês al è tornât il vencul dal terorisim. Te serade dai 14 di Lui, a Nize un om cuntun camion al è jentrât te innomenade Promenade des Anglais e al à fat un maçalizi: otantecuatri muarts e passe dusinte ferîts.
Si à fevelât di atentât jihadist, ma ancje di une azion di un individui fûr di se, cence motivazions politichis e religjosis. Par sigûr alc nol à funzionât tal aparât di sigurece francês e alc nol funzione tes societâts europeanis. Lu conferme ancje il gnûf fat di sanc che al è stât a Munic ai 22 di Lui.
Che la Europe e vedi cualchi probleme di sigurece e che i tancj beçons spindûts di ognidun dai Vincjevot pe difese no vedin une rese concrete a pro dai citadins lu pensin in tancj di lôr, ancje se lu disin in pôcs. Tra chei pôcs plui di cualchidun al fevele di esercit european. Però par metilu impins pardabon e coventarès chê Europe, pardabon unide sul plan politic e istituzionâl, che no je, cussì la situazion e je compagne di chê dal faliment dai progjets de CED (Comunitât europeane di difese) e de CPE (Comunitât europeane di difese) passe setante agns indaûr.
Tes capitâls dai Stâts europeans, ancje daûr des indicazions dai USA, a àn miôr fâi fâ il lavôr sporc di gjestî lis situazions di crisi a cualchidun altri. Par esempli ae Turchie, che e veve la mission di fâ fûr Assad doprant i jihadiscj e po chê di fâur cuintri ai integraliscj, ma no à jonzût nissun dai doi risultât e anzit e cîr di vuadagnâ propit de incressite de instabilitât de zone.
Il “sultan” di Ankara, Erdogan, di une bande al à infuartît in maniere autoritarie il so podê e di chê altre al à negoziât cun Bruxelles gnûfs jutoris pes azions militârs a soreli jevât e pal contigniment dai dispatriâts. Ai 15 di Lui al è stât ancje un tentatîf di golpe cuintri di lui e daûr di chel e je rivade une gnove strente: il golpe lu à fat il stes president, cun epurazions, torturis e altris gnovis violazions dai dirits umans. E cu la Europe che e reste a cjalâ.

Par fortune che e je ancje une altre Europe: chê che e je a pro dai dirits e de diversitât linguistiche. Ai 14 di Lui al è stât un gnûf incuintri tra une delegazion dal NPLD (la Rêt pe promozion de diversitât linguistiche) e il comissari european pe istruzion e pe culture Tibor Navracsics.
Viodarìn ce che al nas, intant il premier francês Manuel Valls al è stât a Aiacciu ai 5 di Lui e al à dit di no aes rivendicazions in cont de couficialitât de lenghe corse. Cundut achel, il president dal guvier regjonâl Gilles Simeoni e chel de assemblee Jean-Guy Talamoni no àn vude pôre di tornâ a bati su chê e su altris cuistions che a tocjin la isole e la sô int e di Parîs a son rivadis almancul garanziis a pro de presince de lenghe te scuelis.
E tal Stât spagnûl? Lis elezions dai 26 di Jugn no àn cambiât plui di tant il cuadri che al jere jessût dal vôt de fin dal 2015, ma al è alc che si môf in Catalogne, là che ai 22 di Lui al è stât dât fûr dal Centre d’Estudis d’Opinió (CEO) il risultât di un scandai statistic che al mostre che se al fos un referendum pe indipendence la maiorance e votarès a pro. Di tignî di voli. ❚
Marco Stolfo