Libri Blanc e pagjinis di diviers colôrs. Tal ultin mês la Europe e lis istituzions europeanis a àn mostrât une schirie di musis diferentis. Forsit al è ancjemò masse adore par capî se lis celebrazions dal inovâl dai Tratâts di Rome, ai 25 di Març, si à di calcolâlis tant che un rilanç de integrazion europeane o une gnove manifestazion des contradizions de UE. Par sigûr la situazion e je complicade e chest al salte fûr a clâr dal Libri Blanc, prontât de Comission europeane in ocasion dal vertiç di Rome par memoreâ l’at fondatîf de CEE e dal Euratom. Il studi al fâs indenant cinc senaris diferents pe Europe dal 2017 al 2025, daûr des sieltis che a vignaran cjapadis sù a Bruxelles e soredut tes capitâls dai stâts: continuitât sostanziâl; riduzion de politiche e mantigniment dal marcjât; limitazion dai cjamps di azion de UE cun chê di concentrâ i sfuarçs par jonzi risultâts pôcs ma sigûrs; Europe cun dôs (o plui) velocitâts diferentis; rinfuartiment de union. Magari cussì no, cheste ultime ipotesi e je chê mancul probabil.
Un segnâl positîf pe Europe, in gjenerâl, e magari ancje pe UE, al è chel che al rive des elezions politichis tai Paîs Bas, là che ai 15 di Març il populisim nazionalist e xenofobi dal Partît de Libertât nol à cjapât ducj chei vôts che plui di cualchidun al pensave (o al sperave, o al veve pôre) che al cjapàs, intant che a çampe e à vût un bon sucès il partît ecologjist e progressist de GroeLinks. Un risultât interessant al è chel saltât fûr des elezions anticipadis dai 2 di Març inte Irlande dal Nord. Pe prime volte e je lade al mancul la predominance politiche de comunitât unioniste e la principâl fuarce nazionalitarie irlandese, il Sinn Féin, e à fat un salt indenant tai siei consens, rivant al 27,9%, cuntune percentuâl sù par jù compagne di chê dal Democratic Unionist Party (DUP). Tal moment di lâ in stampe no savìn ancjemò se a Belfast a rivaran a fâ un acuardi par meti adun un gnûf guvier, se si varà di tornâ a votâ o fintremai si varà la sospension des istituzions autonomis. Il dât sigûr al è il risultât storic dal Sinn Féin.
Propit il cussì clamât Brexit e i gnûf pas fats dal guvier britanic di Theresa May par inviâ il divorzi de UE a son ancjemò un element di confront e di scuintri tra Londre e lis fuarcis e lis istituzions politichis espressions di Scozie, Irlande dal Nord e Gales. Il prin colp lu à sparât la premier di Edimburc e leader dal Partît Nazionâl Scozês, Nicola Sturgeon, che e à ricuardât che i siei conazionâi a vevin votât in maiorance a pro dal «remain» e che par chel al covente fat un gnûf referendum pe indipendente: rispiet al referendum pe indipendence dal 2014, il contest al è cambiât. Par Sturgeon la consultazion si à di fâle tra la Sierade dal 2018 e la Vierte dal 2019, cuant che al sarà clâr se – e in ce cundizions – il Ream Unît si gjavarà fûr de UE. E je lade daûr dal esempli scozês, fuarte dal resint sucès eletorâl, ancje la leader dal Sinn Féin, Michelle O’Neill, che denant di chel senari e marche la necessitât di un referendum pe riunificazion de Irlande. E al à fat compagn il Plaid Cymru: se la Scozie e sarà indipendente, ancje il Gales al varà di decidi in cont dal so avignî. ❚
✒ Marco Stolfo