Il cidinôr di Bruxelles su la Brexit e l’imunitât di Junqueras al imberdee la situazion internazionâl
La unitât europeane e je dificile di fâ sù, ma e je ancje grivie di disfâ. Tal Ream Unît, cundut che lis elezions politichis di Dicembar a sedin stadis une sorte di referendum confermatîf in cont de Brexit, cuntune maiorance dai consens e soredut des sentis pai conservadôrs inte Cjamare dai Comuns, il percors parlamentâr viers de jessude definitive de Union Europeane al somee jessi mancul di rive jù di ce che si spietavisi. Cun di fat, il premier Boris Johnson al à scugnût gloti la oposizion che il so progjet al va dilunc a cjatâ inte Cjamare dai Lords, là che chê che e varès di jessi la leç che e autorize il guvier di Londre a sierâ la cuistion ator de metât di Zenâr e à vût trê vôts cuintri.
Al moment di lâ in stampe no savìn ancjemò cemût che e larà a finîle. Probabilmentri lis normis pe Brexit a vignaran fatis buinis par che la separazion tra Gran Bretagne e UE e vegni formalizade dentri dai 31 di Zenâr, cemût che Johnson al veve prometût dilunc vie de campagne eletorâl. Par sigûr al sarà ancjemò tant ce fâ inte definizion dai gnûfs rapuarts jenfri Londre e Bruxelles, dentri di chê che e ven clamade la “fase 2” de jessude de Union.
Ce che al è stât clâr daurman, dopo dal vôt dai 12 di Dicembar dal an passât, e che al cjate confermis simpri plui fuartis vie pes primis setemanis dal 2020, al è il fat che in Scozie, in Irlande dal Nord e in Gales la maiorance de int e je cuintri de Brexit. Tai câs irlandês – là che a jentrin ancje lis relazions cu la Republiche di Irlande e il procès di pacificazion interni inviât cul acuardi dal Vinars Sant dal 1998 – e scozês – che al è chel che tai ultins agns al à fat plui scjas – cheste situazion si veve palesade ad implen za ai timps dal referendum dal 2016. In Gales, impen, là che cuatri agns indaûr al veve vinçût il “leave”, cheste tindince e je cressude cul passâ dal timp. Al è par chel che ancje il Senedd (il Parlament galês), compagn des Assembleis de Scozie e de Irlande dal Nord, al à votât in maiorance cuintri des normis in cont de Brexit.
Boris Johnson in teorie al pues lâ istès dilunc cul so progjet, però nol pues fâ di mancul di tignî cont dal fat che pe prime volte i trê parlaments “periferics” a àn votât compagn, cuintri di Londre. Par intant, la premier scozese Nicola Sturgeon e va dilunc a bati cu la propueste di un gnûf referendum pe indipendence de Scozie, ma pal moment l’argoment nol ven calcolât in nissune maniere de bande dal guvier statâl. Ai 11 di Zenâr, a Glasgow passe cent mil di lôr a son tornâts in place cun chel stes intindiment, marcant il desideri di jessi indipendents par no gjavâsi vie de UE. Al è sù par jù ce che a pensin in Catalogne, cemût che al à sclarît il gjornalist e ativist politic catalan Xavier Milian a Udin intant de sô partecipazion a Suns Europe 2019: «chê de indipendence no je une sielte di isolament, ma di partecipazion: par fâ sù une Europe miôr».
Des istituzions de UE, però, a rivin segnâi contraditoris. In Zenâr tal Parlament European (PE) si è passâts in pôcs dîs dal ricognossiment tant che eurodeputâts dai leaders catalans Oriol Junqueras, Carles Puigdemont e Toni Comin, daûr de sentence dal Tribunâl di Justizie de Union Europeane (TJUE) dai 19 di Dicembar che e confermave i dirits e la imunitât dai trê elets, ae metude in discussion di chel stes ricognossiment, in particolâr par Junqueras. Intal scuintri jenfri justizie europeane e justizie spagnole – dopo che la Zonte Eletorâl Centrâl (ZEC) e il Tribunâl Suprem (TS) di Madrid a àn declarât la pierdite de imunitât parlamentâr di Junqueras tant che eurodeputât par vie de sentence di condane dai 14 di Otubar dal an passât – il PE al è lât daûr dai ats de seconde e i à gjavât il status di europarlamentâr. Compagn che inte viertidure de gnove eurolegjislature, al ven di domandâsi: i parlamentârs europeans sono i rapresentants dai citadins de Union Europeane o rapresentino dome i stâts là che a vegnin votâts? E ancjemò: la Europe vuelie jessi Europe pardabon o la UE dipendie dome dai stâts e dai lôr guviers? ❚
