O sin aes puartis dal Autun e prest e tornarà a tacâ la vite scolastiche e lavorative pai furlans in Patrie e tal Mont. Come ogni Avost e je stade la ore di saludâ la maiorance dai parincj e amîs che, dopo un periodi di vacance, a stan tornant tai lûcs di residence.
E sarà colpe de crisi, ma chest an si son viodûts mancul furlans de diaspore ator pe Patrie. Bisugne considerâ che la emigrazion di masse si è fermade in Friûl tor i agns dal taramot e la etât medie de “prime gjenerazion” e je simpri plui alte, dut câs no son mancjâts biei grups di zovins ancje di “cuarte gjenerazion” che par lôr cont o midiant di progjets (no dome secont noaltris, une vore “talianiscj” ndr) promovûts de Regjon, de Universitât dal Friûl e di Associazions de diaspore a àn podût cognossi i lûcs dulà che a son plantadis lis lôr lidrîs. Come di tradizion, in cuasi ducj i paîs no son mancjadis lis “Fiestis dal Emigrant” e in tancj a àn partecipât ai raduns dai ents e des associazions regjonâls di categorie. Mancul publicitât, avîs, proclams e plui sobrietât a àn caraterizât i incuintris, dulà che tra ricuarts, cualchi tricolôr di masse, bon vin e gustâ furlan, la int e à podût confrontâsi in maniere conviviâl e serene.
Di Vile di Flum (PN), dulà che si son cjatâts chei di E.F.A.S.C.E. (Ent Furlan Assistence Sociâl e Culturâl Emigrants), a Gurize che e à dât acet ai iscrits e simpatizant di “Ente Friuli nel Mondo”, la voie di Friûl no si è distudade ni tra i vecjos, ni tant mancul tra i zovins – no tantons, ma curiôs e propositîfs –. I discors tradizionâi dai “business men” simpri “Furlan-vincents” che a àn caraterizât i raduns e lis cunvignis dai ultins agns a son daûr a lassâ planc a planc il pas a robis plui leadis al mont de culture e dal sociâl: Efasce al à fevelât (dome par talian) de gnove e simpri plui fuarte diaspore di zovins viers la Europe e il Mont intun contest di “Emigrazion 3.0”, che e sfrute la Rêt par cjatâ lavôr, par restâ in contat cun parincj e amîs, par fâ circolâ in maniere libare lis ideis, e par valorizâ in maniere sostignibile il teritori. Ente Friuli nel Mondo, te cunvigne “La Regjon pai Furlans tal Mont” al à fevelât massime di turisim e di enogastronomie di valorizâ, coinvolzint simpri di plui daûr di un sisteme di vicendevule colaborazion la rêt dai Fogolârs che, come che al à dit il President Pittaro, «Al covente sclarî ce che e pues fâ la Regjon pai furlans tal mont, ma ancje ce che i nestris emigrâts a puedin fâ pe regjon».
Sul palc di Gurize si è frontât ancje il teme de riorganizazion istituzionâl de Regjon: grant risalt te stampe a àn vût lis declarazions dal sindic Ettore Romoli che al à cjapade une posizion clare su la identitât de sô citât: «O volarès ringraziâ i organizadôrs e i partecipants par vê sielt Gurize come sede dal incuintri anuâl e par vê fat cognossi a ducj un aspiet masse voltis tasût, ven a stâi la sô furlanetât. Gurizie e je une citât uniche dulà che a convivin diviersis culturis e une des plui impuartantis e je chê furlane, masse dispès dismenteade a pro di une “julianitât” che pûr jessint une componente di rilêf, no je però la uniche. Vuê, cuant che si sta ripensant la struture istituzionâl di cheste regjon, visìnsal: Gurize no je dome une citât juliane, ma ancje une citât furlane».
Clâr al è stât l’intervent dal President de Provincie di Udin Pietro Fontanini che al à dit: «Chi o sin in Friûl. Nissune citât e je dome taliane o dome furlane: o sin un miscliç. E pûr, no dome tal forest, tai vuestris Fogolârs, ma ancje in Friûl, si stin dismenteant lis nestris lidrîs. Te nestre regjon a esistin dôs realtâts: i julians di Triest e i Furlans di Udin, Gurize e Pordenon. Il Friûl, però, al è dome un e, lu dîs la storie, al è nassût prime, come popul, des aministrazions venezianis e talianis. Il Friûl-VJ al pues sperâ di mantignî la sô specialitât dome se al difint la sô identitât furlane».
A àn fat ben Romoli e Fontanini a Gurize, ma ancje De Anna a Vile di Flum (PN), a frontâ cui emigrants i temis de autonomie e de identitât de nestre Patrie. Par jessi plui fuarts al è necessari il jutori di ducj i Furlans e no dome: la scree il mês passât dal Consolât Onorari dal Canadà a Udin, e je un segnâl di no sotvalutâ. Sperìn che cul finî dal 2012, e dal 2013 indenant, l’impegn di ducj al sedi chel di disegnâ une strategjie par valorizâ in maniere serie, e no dome in famee o tal circul, la lenghe e la culture furlanis fûr dal Friûl. A chei che, massime in Borc di Sâl, a disin «Meno polenta e frico e più business», nô o disìn “Plui Friûl tal Mont, par un Friûl plui fuart”. ■
Daniele Martina
Presentazion / La Patrie dal Friûl e presente il libri “Fûc su Gurize” di Ferruccio Tassin e Gianni Nazzi
Redazion
La Patrie dal Friûl e presente il libri “Fûc su Gurize”.“La Patrie” e je la cjase dai furlans che no si rindin: e par chest e à volût meti dongje un libri zontant insiemi lis peraulis che chescj doi inteletuâi a doprin par descrivi ce che e jere cheste culture di cunfin e ce che […] lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +
L’EDITORIÂL / No stin a colâ inte vuate de indiference
Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +