Concors fotografic de “None” di Buenos Aires
Ce isal di plui simbolic di un album fotografic, cuant che si fevele di ricuarts, massime se dedicât a lis “lidrîs”? Cun chest principi la “Sociedad Friulana de Buenos Aires”, che ducj a clamin “la None dai Fogolârs”, midiant dal “Fotogrupo 30-40”, e à decidût di celebrâ i siei 85 agns di fondazion cuntun concors internazionâl di fotografie che si clame propit “Raíces”, ven a stâi “Lidrîs”.
La intenzion de organizazion, come che si lei te presentazion dal concors “e je chê di stiçâ il disvilup de art fotografiche premiant chês oparis che a rifletin il patrimoni targjibil e intangjibil des nestris lidrîs, consolidâ il sens di partignince a une comunitât, cun chê di lâ su diviers trois che a infuarçissin i valôrs dai indicadôrs culturâi e la identitât”.
Sul sît www.fogolares.org al è il bant complet cun dutis lis istruzions par partecipâ al concors: lis fotografiis dai partecipants a àn di jessi spedidis dentri dal 9 di Otubar dal 2012, ancje par pueste eletroniche, preparant la denominazion e il formât dal file daûr des istruzions dal concors.
Par ogni dubi, si pues domandâ sclariments a Ariel Gonzales di Buenos Aires scrivint une email a fotoconcurso-raices@fogolares.org. ■
REDAZION