Presentazion gnûf program Radio Rai
in colaborazion cu la ACLiF
E je stade presentade ai 21 di Fevrâr a Udin, inte sede de Regjon Autonome Friûl-Vignesie Julie, la gnove trasmission radiofoniche de Rai – cun tant di podcast – intitulade “Friûl in Comun. Vôs e iniziativis dal teritori”. Al è un program in lenghe furlane che in ogni pontade al presentarà un dai 144 Comuns di lenghe furlane che in dì di vuê a fasin part de ACLiF, la Assemblee de Comunitât Linguistiche Furlane.
◆ A presentâ il program al è stât il president de ACLiF, Daniele Sergon, sindic di Caprive, adun cul diretôr de sede Rai di Triest Guido Corso, cu la vicediretore des Relazions Istituzionâls de Rai Donatella Pace e Mario Mirasola, responsabil de struture dai programs Rai di Triest. Presint ancje il president dal Consei regjonâl dal Friûl-Vignesie Julie, Mauro Bordin.
“Friûl in Comun. Vôs e iniziativis dal teritori” al sarà caraterizât di un ritmi svelt, cun pontadis che, dopo di une “schede tecniche” dal Comun protagonist, a mostraran une interviste al sindic e schedis su lis particolaritâts e sui events dal lûc. Dongje di chest, a saran ancje testemoneancis di cui che al vîf e al lavore inte localitât, come par esempli rapresentants dal volontariât o curadôrs di progjets di interès particolâr. Ae fin, une riflession su la varietât locâl de lenghe furlane.
◆ Il prin cicli di siet pontadis di 20 minûts ognidune, al sarà trasmetût di sabide ai 2 di Març a sabide ai 13 di Avrîl su RadioRaiUno, tacant des 2 dopodimisdì.
◆”Chest al è un prin pas – al à dit il president de ACLiF Sergon – viers une presince simpri plui largje de lenghe furlane inte programazion de Rai. O sperìn che di chi e puedi inviâsi une gnove stagjon di programs, fin a rivâ a une programazion informative gjornalistiche radiotelevisive cuotidiane par furlan, come che al sucêt za intal rest dal Stât talian par altris lenghis minoritariis tant che il ladin, par esempli. In chest sens, fasint riferiment ae mozion fate buine ae unanimitât dal Consei regjonâl dal Friûl-Vignesie Julie il prin di Fevrâr stât pe istituzion di une comission paritetiche fra Stât e Regjon sul contrat di convenzion cu la Rai par la lenghe furlane, o larìn a domandâ a ducj i nestris Comuns aderents di passâ un ordin dal dì, sul stamp di chel che al à za aprovât cualchi Comun tant che Tumieç, a supuart de mozion regjonâl che si à dit. Darest il furlan al è fevelât e capît ogni dì di passe 600 mil personis, cence contâ il grant bacin di coregjonâi che a son a stâ tal forest. Chest grup di citadins al à dirit di viodi ricognossude la impuartance de lôr lenghe inte programazion radiotelevisive de emitent di Stât. O vin agrât duncje ae sede Rai di Triest e al diretôr Corso pe sensibilitât dimostrade e pal impegn spindût par fâ nassi “Friûl in Comun. Vôs e iniziativis dal teritori”. Par chest program la colaborazion de ACLiF e dai 144 Comuns aderents e je pronte e concrete e al sarà cussì ancje par dutis lis iniziativis dal avignî, che – o sperìn – a vignaran metudis in pîts in curt par garantî i dirits leâts al ûs public de nestre lenghe.” ❚
