✽✽ Intune cunvigne mi à colpît l’intervent di un partecipant. No un militant furlanist, no un agjitadôr o un comiziant, e nancje un politic autonomist: “Il nestri dovê – al marcave – al è chel di contâ i fats, di no dismenteâ”. Peraulis semplicis che però a cjapin dentri une grande veretât e che nus segnin la strade di cjapâ inte nestre bataie pal Friûl.
✽✽ A valin ancjemò di plui in timps tant che chei che o stin vivint, là che al pâr che i governants a ignorin la realtât e là che ce che si dîs il lunis, tal martars al ven contradit. Ignorance e presunzion a son paronis, cence pudôr, e intant cui che al azarde critichis al ven bolât tant che “nemì dal popul”.
✽✽ I social a fasin cressi une tindince che e cause la mancjance di dialetiche; il stes bipolarisim acentuât e aromai definitîf des formazions al fâs sdrumâ la democrazie, il pluralisim de rapresentance e il dirit a un pinsîr alternatîf. La politiche si fâs viodi come une roulette mangjade dai carûi, dulà che a son dome caselis Rouge e Noir e dome li la balute e à di fermâsi.
✽✽ Jessi alternatîfs a chest stât di robis nol vûl dî sierâsi in cjase, tra pôcs amîs fidâts che si dan reson un cun chel altri, ma dut il contrari. O scugnìn invezit, in ogni lûc, fisic o virtuâl, ribati colp su colp aes bausiis di chel che i somee simpri di plui a un regjim. Scomençant propit de storie de nestre tiere, de sô diversitât, di chei valôrs che a caraterizin lis nestris ints e che a plene reson lu fasin un popul che al vûl ancjemò contâ e dî la sô intal cûr de Europe. No je une novitât il tratament che nus è stât risiervât vie pai secui, ma come che al conte simpri il nestri diretôr Walter Tomada, intal so ultin libri “Friulani eretici”, une e plui vôs si son jevadis par dî “No i stoi”.
✽✽ E cuant che lis vôs si metin adun, il rivoc si slargje, a deventin parabulis laichis, buinis di scjassâ cûrs e cjâfs, rompint la cape di cidins colpevui. Gnovis trombis di Jeric buinis di sdrumâ i mûrs de indiference e de rassegnazion. Une comete che e ilumine il troi.
Indenant. ❚