I gambiaments dal “casselot”
Tancj di voaltris lu varan notât: la television e je gambiade une vore dilunc dai ultins cinc agns. Il spieli plui palês al è dât dal grant sbassament dai cines dai palinsescj televisîfs, sburtâts viers la seconde e tierce serade, o fintremai cancelâts de programazion ordenarie a pro di programs di aprofondiment di croniche, dai talk-show, di piçui reality calcolâts plui bogns di cjapâ il spetatôr. Anzit, propit chest al è il segnâl che al va interpretât in maniere corete par capî cemût che al sedi daûr a evolvisi il rapuart des personis cu la television: il flus televisîf al è simpri plui progjetât par inviâ mecanisims di conversazion, par costruî une relazion cuntun scoltadôr no plui calcolât tant che sempliç “ricevidôr” ma tant che atîf partecipant, vuê in stât di interagjî in maniere direte cu la trasmission in direte, in graciis dal web e dai telefons celulârs.
Il gambiament al è graduâl, ma o podìn individuâ cualchi fase di rispietâ, par cui che (canâi televisîfs, aziendis) al vûl inviâ une vere conversazion. Prin di dut i media tradizionâi (stampe e tv) a àn imparât a scoltâ di plui il public, dant atenzion a ce che al sucêt par esempli sul network sociâl intant di un determinât program televisîf: dentri de proprie cente di cognossincis, lis personis a son usadis aromai a comentâ in timp reâl ce che al ven metût in onde, o lis discussions a sucedin cuntune impostazion tematiche, disfrutant un hashtag specific su Twitter, une peraule clâf che e permet di dâ dongje i intervents spontanis riferîts al stes avigniment televisîf. In secont lûc, a vegnin prontâts struments che a permetin di facilitâ il coinvolziment dai utents. La strategjie e smire a moltiplicâ il passeperaule che ognidun di nô al fâs dentri de sô “tribù” di apartignince (centis sociâls, grups di discussion, listis di amiciziis), nudrint il discors cun riferiments a personaçs o a prodots televisîfs. A plui grande reson, par potenziâ chestis dinamichis comunicativis che a somein spontaniis ma che a podaressin jessi stadis progjetadis in maniere savinte a taulin di chei che cuarante agns indaûr intal mont de publicitât a vignivin clamâts “persuasôrs ocults”, al devente impuartant savê individuâ i “influencers”, vâl a dî lis personalitâts che – stant che a àn une vore di int che ur va daûr in Rêt – a vegnin calcoladis opinion leaders e duncje bogns di influençâ un alt numar di individuis, dentri lis comunitâts tematichis dedicadis a cierts programs o avigniments televisîfs.
Infin, o vin esperiments di narazion za avanzâts che a cjapin dentri scambis di conversazions continuis cul public che – intervignint in maniere direte intal Lûc sociâl – al contribuìs a disvilupâ la trame di une soap-opara (e i protagoniscj de finzion a puedin intervignî ancje lôr inte conversazion), o la modifiche la discussion tal cors di un talk-show in direte, proponint gnovis tematichis di dibati, in maniere tipiche midiant sms o messaçs di Twitter, che lis televisions a colp a mandin intal “sotpanze” dal schermi.
Il model “broadcast” de comunicazion classiche dai media tradizionâi al somee aromai passât: lis televisions vuê a son a stâ ancje lôr in Rêt, e ben planc ducj nô o sin daûr a trasformâsi di sempliçs “spetatôrs” in partecipants atîfs inte costruzion de opinion publiche.
Giorgio Jannis