Sfuei Mensîl Furlan Indipendent
Archivi de Patrie

FURLANS, DIGJITAIT FURLAN – Linux: libars di… digjitâ

............

Il logo di Linux

Aromai ducj o scugnìn lavorâ cui computers; si pues dividi il computer in doi tocs fondamentâi: l’hardware, dute la part fisiche (memoriis, processôr e vie indevant) e software. Cence dal software, o varessin dome un scubulot inutil. Il software che nus permet di doprâ dut ce che nus ufrìs l’hardware al è il sisteme operatîf: chei plui doprâts a son tal ordin Microsoft Windows, MacOs e Linux.
IL SISTEME_ Linux al è un sisteme operatîf che al nas dentri dal moviment dal software libar o Free Software. Chest si propon di combati cuintri dai ambients sierâts e proprietaris come Windows e Macintosh e al è basât su cuatri principis: la libertât di eseguî il program par ogni fin, la libertât di studiâ il program e modificâlu, la libertât di dâ fûr copiis dal program par judâ chei altris e la libertât di miorâ il program e podê daspò condividi cun altris checj cambiaments cence domandâ nuie a nissun. Duncje no si è leâts ae volontât di une aziende, ma si pues adatâ il software a lis propriis esigjencis.
PARI FINLANDÊS_ Linux di bessôl al indiche dome un nucli (o kernel par inglês) che al è stât creât dal finlandês Linux Torvalds e che al permet di colegâsi cul hardware de machine. Parsore di cheste base a vegnin metûts i gjestôrs dai barcons e ducj chei altris programs par fâ vignî fûr une muse (GUI) come chês che o cognossin. Chestis colezions di programs a vegnin clamadis distribuzions: a ‘nd è plui di 500 ator, e chest numar al pues someâ une vore grant ma al derive de idee stesse di software libar: se no mi plâs cemût che une distribuzion e fâs une robe e o ai un pocje di voie di sporcjâmi lis mans, o pues creâ une distribuzion e publicâle su Internet. Se o confrontìn chestis ideis cun chês di Windows si viôt la diference: li e je dome une version, chê de Microsoft, e dome lôr a puedin meti lis mans, parcè che il codiç daûr nol è public.
PLUI VERSIONS_ Lis trê distribuzions Linux plui famosis a son Ubuntu, openSuse e Fedora. Dutis a son pensadis cul obietîf di cirî di puartâ chest sisteme operatîf ancje ai utents mancul esperts, judantju tes sieltis e platant i detais plui tecnics. La fase di instalazion e je particolarmentri curade e ae fin si podarà gjoldi il gnûf sisteme operatîf che za di base al inclût dute une schirie di programs ecuivalents o in tancj câs miôr di chei che si doprin su Windows. E po sui sîts web di chestis distribuzions di cjatin vuidis, forums di discussion, canâi pe chat e un grum di altris risorsis par risolvi dubis e problemis.
PAI TELEFONUTS_ Par finî, une piçule parentesi suntun mont di sistemis operatîfs che al è daûr a cressi une vore in chescj ultins timps: chel dai celulârs. Al MacOs culì al corispuint l’iOs, par Windows o cjatìn Windows Phone 7 e po  o cjatìn il sisteme operatîf di Google, Android. Chest al è interessant dal nestri pont di viste parcè che sot sot al è basât sul nucli Linux, fat che al dimostre une altre volte la grande flessibilitât che si pues otignî cul software libar.
Dree Decorte

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +