“In principi al jere il mâr, e l’aghe e cuvierzeve dute la tiere che vuê si clame Friûl. Ancje lis montagnis plui altis a jerin sot aghe, come ch’a san chei che, su la piche dal Coliàns e di altris montagnis, a cjatin olmis di capis e pes fra lis cretis. Ma tal zîr di milions di agns, un timp masse lunc pal nestri çurviel usât a intervai une vore plui curts, a vignirin fûr dal mâr lis montagnis de cjadene paleocjargnele, lungje 111 km di Sant Cjandit fintremai a Cjamparòs”.
◆ CChest l’incipit dal savôr biblic di chest libri di un centenâr di pagjinis, che al fevele di gjeografie sot di diviers aspiets di cheste sience. L’aspiet fisic al partìs di lontan, cul mâr antîc e lis glaciazions, par passâ ae descrizion des monts, dai flums vieris e gnûfs, il Tiliment, Il Lusinç, il Timau, la Livence, e po la dople planure, lis risultivis, lis morenis, il Cjars, il Cansei, i lâts naturâi e artificiâi, i canâi, i palûts, lis lagunis, il clime.
◆ L’aspiet antropic al cjape in esam lis stradis (la Annia, la Postumia, la Iulia Augusta), i puints, lis citâts antighis e modernis, Udin, Gurize (dutis dôs nassudis parsore di une culine, come che e dîs la etimologjie dai nons), lis vilis, i paîs, lis glesiis, i cjistiei, lis fabrichis (scomençant cun chês di spadis e vâs di veri de antighe Aquilee, chês di frecis di Concuardie, par rivâ aes filandis di Linussio e aes zonis industriâls di in dì di vuê), i ospedâi, lis scuelis, i implants sportîfs.
◆ Pe gjeografie linguistiche i autôrs a doprin doi struments: l’Atlant Storic Linguistic Etnografic da Friûl (ASLEF: cualchidun lu à definît la otave maravee dal mont) cuntune cerce des sôs cjartis tematichis (par esempli: cemût lu clamino vie ator pe furlanie “l’arcobaleno”? E “la via lattea”?).
◆ Il secont strument al è la poesie. Vâl a dî une cerce de produzion poetiche intes variantis de lenghe furlane: Pasolini, Marchet, De Gironcoli, Cadel, Appi, Angeli, Argante, Virgili, Forte, Fignon. Ispirazions diferentis e divignincis di ducj i cjantons dal Friûl (ma nissun di Udin!)
◆ A completin il volum cuatri cjartis antighis dal Friûl e dute une schirie di bielis fotografiis. ❚