Daspò tante esperience in Friûl, l’alenadôr di Vît cumò al lavore in Danimarcje, indulà che al à espuartade la sô esperience di tecnic, tignint la leande cu la Patrie
Ce fasial un furlan intune palestre a plui di 1.500 chilometris plui insù dal Friûl, a Copenaghen, in Danimarcje? Se il sogjet in cuistion al è Giovanni Battista Gerometta, par ducj “Gerom”, al è là par lavorâ come alenadôr di bale tal zei cui zovins dal Falcon Basketball Klub, une des scuadris plui preseadis dal Paîs che si cjate intal mieç tra la Gjermanie e la Svezie. Daspò di une cariere di zuiadôr e alenadôr a Spilimberc e Udin prime, e a Cividât daspò, cun tal mieç cetantis esperiencis ancje come component de Federazion internazionâl de bale tal zei, chest àn al à decidût di lâ al Nord, par vivi une ocasion professionâl e di vite une vore divierse.
◆ Fedêl al sô cognon – stant che la gjeromete e je la zirevolte di un che nol sta fer e che al zire ator – il protagonist de storie al è stât simpri in moviment. E, daspò vê fat une vore ben par agns in Friûl, cun professionalitât e passion pal so lavôr, si è meretât un lavôr cetant preseât lontan di cjase.
_
Gerom, cemût rivial un furlan a Copenaghen?
“L’an passât, dopo vê vinçût il campionât di serie B cu lis acuilis di Cividât e cjapade la promozion in serie A2, mi è vignude voie di misurâmi cuntune realtât internazionâl. Si scuen cognossi une vore di personis, a ducj i nivei, par vê une oportunitât e, cundut che intai agns passâts o vevi lavorât cun profit intal ambit de Federazion internazionâl de bale tal zei, o vevi imbastît lis relazions justis. Intal 2015, dilunc dai Campionâts Europeans under 20 a Lignan, o ai cognossût Michael Schwarz, un todesc che al jere il responsabil dai cors di formazion dai alenadôrs. Lavorant in bande di lui, fasint il referent locâl intal ambient internazionâl dai alenadôrs, o ai fat une vore di amiciziis. Un di chei tecnics cognossûts tai cors di formazion, un zovin spagnûl, mi à vierte la puarte di cheste pussibilitât in Danimarcje e o soi rivât achì. O podevi ancje lâ in Estonie o in Norvegje, dut câs o ai decidût di fermâmi a Copenaghen, par alenâ un dai grups cun plui inzen, e par fâ formazion ai alenadôrs locâi”.
_
Sono diferencis intal zuiâ tra i zovins talians e chei danês?
“Dut un altri mont. Un frut di 13 agns talian e un di 13 agns danês a son une vore diviers. Achì il potenziâl al è di no crodi, e nol è paragon su lis robis che un talian al sa fâ intal cjamp de bale tal zei e ce che il danês al rive a fâ cun tante plui valence. Sedi pe tecniche, sedi pal fisic. Dut al partìs de cumbinazion des disposizions di scuele e ativitât sportive. Si lavore insiemi, cuntune programazion che e cjape dentri une e chê altre, e dut al è une vore lineâr, cun obietîfs in condivision. Il probleme achì al è che no son struturis pe formazion dai alenadôrs locâi, e cuant che si scuen insegnâ ai zovins a zuiâ insiemi, di scuadre, al cole dut. O soi achì massime par chest. O lavori inte mê societât e, une volte al mês, o fâs compagn cun altris realtâts fûr di Copenaghen. E, dal sigûr, o starai achì ancjemò un an, fin intal 2024”.
_
E a nivel professionâl, cuâl isal l’element plui dissomeant?
“Facil di contâ. Achì o soi un dipendent. O ai un contrat di doi agns, cui contribûts e dut. In Italie une robe dal gjenar e je dibot impussibile di vê. Cun di plui, cul jessi achì o rivi a lâ indenant cu la mê colaborazion cu la Federazion internazionâl de bale tal zei, lavorant tant che delegât tecnic. L’obietîf al è chel di cjatâ il slanç par rivâ, intal zîr di cuatri o cinc agns, a lavorâ intal nivel professionâl plui alt, intes miôr realtâts europeanis. Ca sù, a son tantis Leghis e Campionâts intune fase di grant svilup e struturis une vore bielis. In chest moment, la economie e zire une vore miôr ca sù, e si pues vê pussibilitâts professionâls cetant impuartantis”.
_
Tropis voltis puedistu tornâ a cjase?
“Dutis lis ocasions cuant che in Danimarcje a fasin fieste. In Autun, a Nadâl e in Fevrâr e je ogni volte une setemane di feriis. Cumò, o tornarai jù pal Istât parcè che a Pasche o vin di zuiâ la Scania Cup, che e je une competizion che e cjape dentri dutis lis miôr scuadris de Scandinavie. Une forme di Campionâts Internazionâi dai Paîs de zone”.
__
E rivistu a mantignîle, la lenghe furlane?
“O feveli il furlan di Clausêt cui miei vielis. Disìn che lu ai imparât une vore ben cuant che o lavi in Cjargne cun gno nono, a torzeon pes malghis, a cjoli formadi”. ❚
::::::::::::::::::::::::::::::::::::::::::::::::::::::::::::::::::::::::::::
UNE CARIERE SIMPRI SOT DAI ZEIS
La schede dal tecnic di Spilimberc
Classe 1990, Giovanni Gerometta al à tacât a zuiâ di bale tal zei a Spilimberc.
◆ Di zovenut al à zuiât a Udin, piturât di colôr naranç cu la Snaidero. Daspò, sot de vuide dai tecnics Vanni Zanon prime e Andrea Melloni daspò, cuant che al jere tal ultin an di scuele superiôr al à scomençât a alenâ intal setôr dal Minibasket a Spilimberc, intant che al continuave a zuiâ cu la prime scuadre in serie B e C. Cul alenadôr Alberto Andriola al è deventât assistent in prime scuadre e, vie dilunc, la ativitât di tecnic e je deventade primarie.
◆ Di Spilimberc al è daspò tornât indaûr a Udin, cui Amîs de bale tal zei, la APU, cun Davide Micalich dirigjent e i tecnics Cavina, intal 2011, Martelossi e Ramagli. Intal mieç tant lavôr cu lis Rapresentativis regjonâls sot dal responsabil tecnic Guidi e, intal ultin toc di cariere in Friûl, al à lavorât come assistent dal tecnic Pillastrini a Cividât.
◆ Dal Istât passât al è in Danimarcje. ❚
::::::::::::::::::::::::::::::::::::::::::::::::::::::::::::::::::::::::::
SAVÔRS DI PATRIE IN DANIMARCJE
Il frico inte diete dai gnûfs amîs dal Nord
La storie da la famee Gerometta e ven fûr di Vît, dilunc de flumere dal Arzin.
◆ “La mê famee e je un tic miscliçade: mê mari e je di Clausêt, gno pari di Pielunc, cundut che la famee dal gno vieli e je lade a Siest, inte Basse, une vore adore e, daspò dut il torzeonâ, si sin fermâts a Spilimberc. Dut câs, o sin ducj Asìns e o crôt di jessi jo un dai ultins a jessi stât batiât inte Plêf di Vît, intal ’90. In famee a àn simpri lavorât cul formadi e, par dîti, la none a à cjapât il premi Mus d’Aur cu la ricete dal formadi salât”.
◆ Facil pensâ che il formadi di Spilimberc de famee Tosoni, storiche aziende casearie e di scambi e spaç, al sedi rivât a Copenaghen…
◆ “La prime volte che o ai fat di mangjâ ai miei coleghis achì, mi àn domandât la “carbonara”. Cumò a van in lipare se no fâs il frico”.
◆ In sumis, cu la ativitât di Giovanni Gerometta, cumò cuant che si dîs che al è rivât chel dal formadi, si pues intindi ancje un alenadôr furlan cun tante passion e competence pe bale tal zei di rivâ a insegnâle fûr de Patrie, fintremai in Nord Europe! ❚
