A son 5 agns che pre Antoni nus à lassât. Il ricuart in chei che lu àn cognossût al è ancjemò vîf e profont. I tancj che no lu àn cognossût di vîf si son svicinâts a lui dopo muart cjapant in man i siei libris cun tant marum e displasê di no vêlu cognossût prime. Segnâl che se fisicamentri nol è plui, la sô olme lassade e reste vive, vitâl, significative. E il timp nol scancele lis personis di valôr che a àn scombatût pe vite, pe umanitât, pe gjenuinitât dal vanzeli, se mai lis inlumine di plui. Culì o proponìn une cerce di chel libri che plui al à fat cjacarâ: La fabriche dai predis. Libri confession che tancj a voressin podê lei, ma che la gjerarchie glesiastiche e à censurât a pene jessût. Cui che al è rivât a leilu, no si è scandulizât, nol à piedude la fede, se mai al à capît un fregul di plui il mont dai predis. Al è un tocut de jentrade, là che al spieghe il parcè di chest libri.
pre Roman Michelotti
… Rivât a une etât che si pò fâ un fregul di belanç e di riflession e cjatantmi par cumbinazion tal scjap clericâl, mi à semeât just studiâ la figure, il stamp, il model dal predi, par capî e spiegâmi la figure, il stamp, il model dai nestris cristians. Parcè che i predis a àn vût grancj merits te nestre storie personâl e sociâl, come che a àn vût grandis colpis. O rivarès a dî che no podìn scrivi la storie dal Friûl cence scrivi un grant cjapitul su la glesie e sui predis e o soi stât content di lei che un studiôs di religjons merecan, Antony D. Smith, al à cjatât che in dutis lis minorancis etnichis e lenghistichis il predi e la religjon a àn une funzion insostituibil. Scjampât il politic, sparît il studiât, al reste il predi, a cjapâsi debits e credits, a fâ di pape e di re. Cognossi duncje i predis al pò deventâ une clâf impuartant par viergi tantis puartis sieradis e par fâ lûs su tancj cjantons a scûr.
… Jo o ai preferît lâ a studiâ il lûc là che a saltin o, miôr, a saltavin fûr i predis, cuant che a ‘nd jere grande bondance e si podeve permetisi ancje di fâ i merecans e srarî cence stâ masse a cincuantâ. Il lûc si clame “‘seminari”. Al è stât inventât e codificât dal 1500, e precisamentri in chel Concili Tridentin (1545-1563), dât dongje par combati i protestants, che al à durât e al dure, te sostance, fintremai in dì di vuê. La peraule e ven claramentri di “semence”, une sorte di vivâr pes plantutis che a vevin di jessi vuardadis dai garbins dal secul e sclipidis cul calôr de santitât.
… Chestis pagjinis a son une visite in chel lûc e in chel ambient, fate di un che al à passât li dentri tredis agns e duncje al pò vantâ cualchi titul. Lis ài scritis par fâ lûs su la anormalitât dal predi, par cjatâ fûr une cualchi reson a la sô strambetât rispiet a la int normâl. Par capî ce che i àn fat par ridusilu cussì e duncje par cjatâi une cualchi atenuant e, se al è pussibil, un fregul di comprension, come che si à par dutis lis vitimis. Nol è un lavôr cuintri dai predis ma, se mai, cuintri la struture che ju à ridusûts cussì.
O ai scrit ancje par dâ une testemoneance alternative a chê oleografiche furnide dal mont clericâl, che siguramentri al laude e al puarte il so prodot platant colpis e limits. Chestis testemoneancis, aparentementri inutilis, a àn il vantaç di ufrî une leture diferente, contrarie, inedite. Di mût che, un doman, se Diu vorà, si podarà sintî une altre cjampane, mancul edificant e celebrative ma no par chel mancul vere. Une testemoneance personâl, ma provade su la mê piel e duncje gjenuine.
O volevi meti come titul “memoriis dal oltritombe”. Po mi jere vignude voie di meti “memorie di un sopravvissuto”, ma no rivavi a cjatâ la peraule juste furlane. A la fin o ai preferît un titul plui gjeneric ma forsit plui incisîf e comprensibil: La fabriche dai predis. Une fabriche che no à savût o podût o volût cjaminâ cui timps. Si è ustinade, cjapantlu come un pont di onôr, a butâ fûr simpri chel prodot, simpri plui standardizât, simpri plui compagn, simpri plui fûr dal timp. Fin che e je rivade la crise o il moment dal rindicont.
… A di chei che si sbreghin la tonie domandantsi cemût che e à podût slacâ in maniere cussì repentine, jo ur rispuint che la domande e sarès, in câs, une altre: “Cemût aie fat a durâ tant a lunc?”. Ma lassìn stâ considerazions siguramentri impuartantis ma che no si puedin distrigâlis in cuatri e cuatri vot. Al covente timp, umiltât e soredut libertât. Jentrìn insieme inte grande fabriche silenziose. Prime però gjavìn il cjapiel e fermìnsi un lamp a preâ par tante manovalance sacrificade e sassinade in ducj chescj agns e secui. E, fasint un sfuarç, sbrovìn une recuie ancje pa lis maestrancis. Forsit ancje lôr vitimis di un sisteme che al copave l’om inludintsi di onorâ chel Diu che lu veve creât come coronament dal creât e sô inmagjin primarole. ■
(La fabriche dai predis, Jentrade, pp. 7-9)
pre ANTONI BELINE
