Grau, il puart là che si messedin lenghis e religjons, marcjât e profezie, cuntun voli a Vignesie e un al Orient

O sin rivâts insom: sedi dal an, che dal nestri piçul viaç su lis olmis dai “Furlans di orient”. Dificil, simpri, decidi cuâl che al sarà il finâl: la ultime tape, par solit, e varès di jessi il struc, la metafore, la mete. In chescj ultins dîs, o confessi, mi soi dispès domandât là che si podeve concludi. Ae fin, o ai pensât che come in ogni altre narazion che e vedi la pretese di tamesâ l’ancestrâl, la fin e varès di coincidi cul principi: in chest câs no dal viaç, ma dal significât stes dal percors. E cussì, par “orientâmi”, o ai cjalât bande orient. E mi soi rindût cont che la anime plui orientâl di cheste nestre Patrie e à semence intun puest che l’orient lu cjante.
◆ O tachi di une conte antighe. La liende nus insegne che intal an dal Signôr 582 une montane nere e crudêl e varès patafade la cueste di Grau, sdrumant il so borc antîc. Cuant che l’aiarat al smetè di businâ, strente jenfri i ramaçs di un vecjo olnâr, i pescjadôrs a cjatarin une icone sacre de Vergjine Marie, vignude dongje di cuissà mai dulà. Cussì, doi sants eremitis che a vivevin intune capane pôc lontane (cui jerino? Forsit paris dal desert vignûts de Tebaide, de Sirie, de Palestine?), le cjaparin sù tant che un segnâl dal Cîl, ven a stâi il sugjeriment par fâ sù, propit là che il mâr le veve poiade, un lûc di preiere e di santitât, deventât subit un riferiment par ducj i popui che a abitavin la regjon: no dome latins cristians, ma ancje gôts, langobarts e slâfs, dispès ancjemò pagans. Dopo cualchi timp, il patriarcje Elie (571-588) al varès slargjât chest lûc par fâlu deventâ une glesie: chê, sul principi dal an Mil, e sarès stade cjapade in custodie di une famee di munics benedetins, che le mantignirin par plui di Cinccent agns.
◆ Gradus. Il puart di Acuilee. Chest il significât dal non in lenghe latine. Ma ancje “pas”. Il pas dal pît. Puart. Incuintri, intersezion, miscliç. Confin e frontiere che e met insiemi tiere, cîl e mâr. Om e nature. Lenghis e religjons, dius e demonis, piratis e predicjadôrs, marcjadants e profetis. No podevin finî cheste ricognizion dal Friûl e dai Furlans “a soreli jevât” intun altri puest. Dal moment che chi, e lu sa ben cui che al à metût il so pas, sul so “gradus”, dentri dal labirint des sôs straducis, si respire l’orient. Par ogni piere, par ogni androne al cuche Bisanzi. E respire Tessaloniche. Al cjante Polichron. Il so sium, la sô malinconie. Plui ancjemò che no inte grande citât romane di Acuilee, e il letôr al perdonarà la enormitât di cheste afermazion, che o speri di jessi bon di justificâ, in cualchi maniere. E di fat, Grau nol à nancje une ongule di roman. Cjalade di ca, Rome e je lontanone. I voi a scjampin “di là da la aghe”, vie pai Balcans, a cirî une mari lontane, costantinopolitane.
◆ Grau duncje. Une piçule perle preziose inclaudade intal circuit di une isule, protet dal scjas di chest mont, e in dì di vuê peât cu la tiereferme di un cordon di strade che al taie la lagune e al met fin a une solitudin durade miârs di agns. Magari cussì no!
◆ Inte strente di viucis di piere si plate une des basilichis plui bielis e plui antighis di dute la Cristianitât, Sante Eufemie, sûr di chê che e smicje il mâr dal alt di Rovigno/Rovinj, su la cueste ocidentâl de Istrie: e se di Grau tu vadis jù pe cueste, propit li tu rivis. La glesie di Grau, duncje, mari – insiemi cun chê cetant plui grande e sflandorose di Acuilee – de evangjelizazion marçane no dome dai Furlans, ma ancje dai abitants de Istrie, là che ancjemò intal secul XIV “Histriani et Aquilegenses” – come che al memoree Dante intal famôs pas dal “De vulgari eloquentia” – a fevelavin la stesse lenghe, la nestre, “similiter eruptuando” (e o podaressin zontâ che noaltris o continuìn a jessi braurôs di “eruptuâ”…). La muse paleocristiane di Sante Eufemie, imbastide di piere e di arenarie, e custodìs come che al fos un tesaur di bielece e di maravee la testemoneance di une Glesie che intai secui e à savût jessi simpri custode de sô specialitât, tacant de origjinalitât dal so Symbolon, il Credo, ancje e soredut in oposizion cun chel di Rome. Un destin che in chestis oris al torne a bati il so timp, viodude la decision disgraciade de Conference Episcopâl Taliane (C.E.I.) di dineâ ancjemò une volte il Messâl par furlan.
◆ E al fo propit il metropolite Elie che, scjampant di Acuilee par salvâsi dai Langobarts, al decidè di platâsi su cheste isole, ordenant, come che si à scrit, la costruzion di chest edifici maraveôs tant che lûc privilegjât dulà puartâ la sô catidre, che par grêc al volarès dî la sô cjadree. Propit su chê sente, che lui al considerave plui sante di chê de Sante Sede dal vescul di Rome, al varès declarade la sô distance dal “usurpadôr dal titul” di dissendent di Pieri, Pelai II, vierzint une cuistion teologjiche, liturgjiche, culturâl e ancje antropologjiche cetant complicade, che e passe ae storie tant che “Schisme dai Trê Cjapitui”.
◆ Di li e ven la “autocefalie” di Acuilee, la assunzion dal titul di Patriarcje par Elie e pai siei sucessôrs, fradis dai grancj patriarcjâts orientâi, di Atene a Kiev, e duncje il principi di une storie e di une tradizion che a segnin la identitât dal nestri popul furlan. Une sielte di libertât, paiade cu la condane di eresie pandude di Rome cuintri dai patriarcjis dissidents. Di in chê volte, noaltris Furlans o restarìn disubidients, savoltâts, ledrôs, bastiancontraris, eretics. Furlans, po!
◆ Une grande e biele ereditât, che al sarès un pecjât pierdi.
In dì di vuê, Grau al reste un borc maraveôs di pescjadôrs, là che la tradizion folcloriche dal cjant spontani e popolâr e manten la profonditât dal ritmi antîc des antifonis de tradizion liturgjiche aquileiese; dentri dal so cûr e custodìs dute la maravee, la preocupazion, ma ancje il cûr grât e la pôre che i umans a àn simpri vude dal mâr.
◆ La tradizion de cusine chi e je semplice inte sô puaretât, epûr e je buine di preservâ il savôr che al sa di bon, di sant. Provait a jentrâ intune des tantis locandis e ostariis, e domandait di podê cerçâ un “boreto” a la graesane. Cuant che a tornavin dal mâr, i pescjadôrs a metevin in bande il pes plui siôr, chel di lus, par vendilu sul marcjât. Ur restave pôc, i tocs plui scjadints, che a vignivin butâts apont intal “boreto”, une fersorie poiade cul cûl su lis boris (di chi il non dal plat) ferbintis, cun vueli, une ponte di ai, asêt blanc, sâl e pevar. La recipe e je tant antighe che il pomodoro nol ven nancje cjapât in considerazion, dal moment che cuant che e fo metude dongje pe prime volte, “Cristobal Colon” al jere ancjemò tant lontan dal nassi!
◆ Ancje lui al cirive l’Orient, come che o vin fat noaltris, ma al à cjapade la direzion sbaliade, inçopedantsi te Americhe. Magari cussì no: pûr di no vê la base militâr di Davian in Friûl, o fasarès di mancul dal pomodoro par dute la vite! ❚