Bielzà il grêc Erodoto nus conte che i popui antîcs a aspiravin jerbis aromatichis tes lôr cerimoniis religjosis. Grignei butâts parsore di pieris incandessentis intune tende sacre, par jentrâ in contat cu la Divinitât. Brusâ incens, respirâlu, al reste une des atestazions plui antighis di cheste pratiche. Ma par vê il tabac bisugne spietâ ancjemò une volte lis caravelis di Colombo, che lu puartarin in Europe come une curiositât esotiche e divertente: sbufadis di fum pal nâs e pe bocje a fasevin ridi la compagnie, e si podeve vuadagnâ un zîr di bevudis.
Une medisine uniche pai polmons!_ Dome dal 1560 l’ambassadôr di France Jean Nicot (di lui al ven il non “nicotine”) al regalà al so re, Francesc II, cualchi semence di chê plante, sostignint che e ves proprietâts curativis se brusade e inalade. Come che al sucêt cu lis novitâts, la difusion e fo straordenarie, tant che bielzà tal secul XVII mastiâ tabac, nasâlu o fumâlu in pipis di len o – ancjemò – involuçât su la sô stesse fuee, gustanltu ben planc in bocje, e jere deventade une usance cetant popolâr. Ma ancje in chest câs si rispietavin lis jerarchiis sociâls: i nobii lu nasavin, i inteletuâi lu pipavin e i puars biâts lu mastiavin, forsit par judâsi a jemplâ la bocje svuedade de fam.
A ogni condane la sô assoluzion_ Sul principi condanât de Glesie in maniere uficiâl – pene adiriture la scomuniche pai fumadôrs – ma praticât di scuindon tal segret des canonichis e intai clostris des abaziis di predis tabacons, al fo disdoganât propit in gracie di une straordenarie pensade nuie mancul che dal Cardinâl de Richelieu che, inventant il monopoli di stât, al spiegave che si pues jessi ancje pecjadôrs e viziôs, baste podê paiâ une tasse pal disgravi de cussience! Vignesie, che di buine rufiane e saveve ben gafâ ogni ocasion di vuadagn, e proviodè a slargjâ la mode dal tabac – che chi si clamave “Jerbe Regjine” – in ducj i siei teritoris, imponint la tasse di monopoli inventade dal cardinâl francês, tant che tal zîr di cualchi an e deventà une des vôs plui altis e siguris tal belanç dal Stât.
Il tabac tant che bandiere di resistence politiche_ I teritoris de Patrie sogjets ae “Serenissime”, par vie de gjeografie une vore complicade inte rêt dai confins, si prestavin cetant ben par contrastâ i controi fiscâi, e te seconde metât dal ‘700 i furlans si inventarin une forme straordenarie di resistence cuintri la Dominazion di Vignesie: a deventarin cuintribandîrs di tabac. Un fenomen che adiriture in cualchi paîs di mont al fo la principâl componente de economie dal popul cuintri chê dai siôrs. Bandis ben organizadis, cul jutori de popolazion locâl, a spaçavis, a depositavin e a lavoravin lis fueis di scuindon, che cualchi massarie e platave ancje jenfri la culture dal ort di cjase, daûr il meneolt e lis patatis. La Valade dal Celine, chê di Resie, la zone di Tarcint e di Glemone, Mueç e il so teritori a forin epicentri di une corentie straordenarie che pardabon e à savût salvâ de fam e de miserie comunitâts interiis. In Racolane adiriture il plevan al prestave voli ai cuintribandîrs e cuant che si inacuarzeve che al jere un segnâl di soldadats di Vignesie, bulos e spadacins, come che a vignivin clamâts dal popul pe lôr arogance e violence, al sunave lis cjampanis, al clamave la int a racuelte, che cun claps e bastons e permeteve ai bandîts dal tabac di scjampâ vie pal bosc o su pe mont, là che nissun ju varès podûts brincâ. Cramârs a vignivin jù de Ongjarie o des Gjermaniis cu la semence platade jenfri une intimele e un bleon. E po dopo, di scuindon pai trois dai Fors Savorgnans, a puartavin lis fueis vie pal Cjadovri. Une resistence pardabon popolâr, esercitade no dome cuintri Vignesie, ma cuintri ducj chei altris parons che a gjavavin fûr il sanc dal lavôr de puare int, fintremai la Italie, daspò dal 1866.
Il tabac e la modernitât_ Bisugne spietâ il principi dai agns ‘20 dal secul passât par capî la impuartance di cheste culture pe nestre Int. E di fat, e fo une vere e proprie rivoluzion sociâl e culturâl: par podê vê il permès di coltivâ il tabac al jere necessari dimostrâ di jessi proprietaris dai terens. Dificil intune tiere di metadiaris. E cun cheste leç i sorestants talians a pensarin di vêle fate francje. Ma li e scate la iniziative creative, buine di petâi pal nâs al Stât centralist roman: cualchi famee e pense di meti insieme i cjamps in forme di cooperative. Un sblec di tiere chi, un là, la union e fâs la fuarce. Un passaç impuartantissim, parcè che al segne il superament de metadie che, come che si sa, no jere dome une forme economiche ma soredut culturâl. No si lavore plui par un paron, si devente socis di une imprese. E in cheste imprese si cjatin massime lis feminis, che cussì a podin emancipâsi, meti in bande ce che ur covente par maridâ l’om che a decidin lôr, cence jessi plui peadis al volê dal pari paron de vecje famee patriarcjâl contadine. E pai trois de Patrie, cu la cosse su lis spalis e la pipe in bocje, lis feminis a deventin la icone dal lavôr indipendent e de fuarce di volontât. Tai agns ‘50 si calcole che a fossin 6.000 lis feminis impiegadis te produzion dal famôs “nostran dal Brente” intal Friûl di Mieç, come che al à dimostrât il bielissim libri “Ci salvò il tabacco”, editât pôc plui di un an fa di Cjase Cocel di Feagne.
Tabac terapeutic_ La medisine moderne e à dimostrât che il tabac al pues jessi doprât par scombati cualchi malatie renâl, par bonificâ l’ambient incuinât di metal pesant, come sedatîf cuintri il dolôr, adiriture par fâi cuintri a cualchi forme di tumôr. Dut ce che al ven cjolt in maniere esagjerade al fâs mâl. A fasin mâl ae salût ancje il bevi e il mangjâ, ma no si pues pensâ che dome la diete mediteranie e sedi la vie de salvece. La mode che nus volarès mangjadôrs dome di pize e di spaghets al pomodoro e sune un pôc, e simpri di plui, come une sorte di globalizazion culturâl imponude aes pignatis de tradizion. Si à la impression che il pinsîr salutist al sedi deventât une specie di discriminazion culturâl, dogmatiche e talibane, cuintri ducj chei che a sgarin.
Murî di salût_ E dai Stâts Unîts, il grant breâr là che ogni mode universâl e nas par colonizâ il mont, se tu fumis, tu bevis, tu sês gras, alore tu deventis un element a risi, di slontanâ di chei altris, discriminât, dispreseât, tant che un terorist sanguinari o un deviât pericolôs par se e pal mont. Clâr che nissune campagne uficiâl, di Stât, e je mai stade inmaneade cuintri la fumarice dal incuinament, i “fast food” che nus vendin prodots di plastiche, i detersîfs che a invelegnin lis aghis. Li daûr a son interès une vore plui grancj e duncje plui sogjets al perdon che no un macubin cjicât in compagnie di amîs, come une volte, sul murut fûr di cjase, sore sere. No par vizi, ma par supâ un fregul di sodisfazion dopo une zornade di fadie, recuperant te polse condividude il sens dal paîs, dal stâ insieme, dal jessi part di une comunitât. E cun cheste tocje sierâ il grignel di storie, prime che il toscanel, aromai curt e ferbint tant che une bore, al fasi cualchi dam ai dêts de man. Par no dismenteâsi che, in fin dai conts, “il fumo nuoce gravemente alla salute“. ■
ANGELO FLORAMO
___________________________________________________
Ocjo di no scotâsi…
La macube al è un inset dal salgâr. I Vecjos lu metevin te tabachere, parcè che al bute fûr un odôr di muscli e di rose che une volte al profumave il tabac dai puars. Un sigaret involuçât sù cun chês fueis si lu clamave macubin. Bastarès chest par disdoganâ la pôre di fevelâ di fum come di pratiche sociâl e no di deviance. Un grignel di storie cetant scoret, chest colp, viziôs, contrari al pinsîr dominant, in cuintritindince. O, come che si dîs cumò, “politichementri scoret”. Ducj i grignei di storie a àn cheste ambizion, par jessi sclets. Ma l’argoment “al scote” plui di simpri. E soredut al è faziôs, tignint cont dai compuartaments a risi di cui che al scrîf, che dome a viodilu no tu disaressis mai e po mai che al sedi un salutist… Parcè che fevelâ vuê di tabac come di element culturâl intune societât, o fevelâ di vin, al podarès jessi interpretât come la apologjie di une dipendence, cussì almancul nus insegnin i dotôrs in medisine e la mentalitât corinte. Fumâ al fâs mâl, e cheste e je une veretât sacrosante: si lu lei pardut, fintremai su lis scjatulis di zigars e di spagnolets di ogni sorte. Une ipocrisie rafinade dal Stât talian, che si cjape i francs dal monopoli e ti vise, sore, che tu fasaressis miôr a lassâ pierdi par vie de salût. Ma intant al domande di jessi paiât pal vizi. Si sa che bac, tabac e Venere a fasin dal om cinise. Ma stant che ancje la Bibie nus insegne che di cinise o sin fats e che cinise o tornarin a jessi… Meti il nâs te storie dal tabac in Friûl al pues pardabon regalâ une scuvierte plene di sorpresis. E par di plui, strucade intun grignel no fasarà pierdi masse timp. Juste chel di fumâsi une cjiche e po vonde. ■
ANGELO FLORAMO
