L’insegnament dal furlan te scuelis al à dismot la cussience dai furlans di Gurize. Il spont e je stade une provocazion di Piergiorgio Gabassi, diretôr dal pôl gurizan de Universitât di Triest, che a une domande sul argoment fate di un gjornalist dal Piccolo al à dit «Come ducj i “isims “, ancje il “furlanisim“ al è negatîf, ancje parcè che, tentant di butâ il voli oltri i confins de nestre region, des bandis di chel “vilaç globâl” che si cjacare in continuazion, parfin il Talian al pues jessi considerât un dialet».
IL DIBATIT_Partint di cheste frase une vore di personalitâts a àn rivendicât la utilitât dal insegnament de marilenghe te scuelis. Laura Fasiolo, preside gurizane, e ponte il dêt su la valorizazion dal Furlan come risorse e e cjate cheste gnove leç pardabon positive. Dacuardi ancje Maurizio Salomoni, assessôr provinciâl pai servizis educatîfs, che al viôt dut chest come une grande oportunitât pai nestris zovins, ancje se al marche il probleme di «sclarî aspiets lingustics no risolts», viodût che secont di lui lis fameis dal furlan che si dividin cheste lenghe a son cuatri e al covente fâ atenzion a metilis insiemit intune koinè.
DÔS OPINIONS_Toni Devetag – assessôr ae culture pal comun di Gurize – che o vin intervistât di resint pe Patrie, al rive a dî che Gurize e à di jessi considerade come la capitâl dal Friûl Orientâl. Ma pal cont de lenghe furlane al varès voie di vê cualchi rasigurazion sui coscj di cheste operazion. Insome, une jevade di scudis, ma no mancjin tantis personalitât contrariis, come par esempli la vice presidente de provincie di gurize Roberta De Martini che disintsi braurose de sô origjin furlane e de sô furlanetât e declare che «il furlan al à di tornâ a jessi une lenghe sintude des fameis, cjacarade nome in cjase e no invezit deventâ un esercizi academic cussì come che al samee sfueant lis pagjinis dai cuotidians locâi in chestis setemanis».
GURIZE, LA FURLANE_Lis vôs contrariis a son un fat, ma il dibatit al jude a scuvierzi, pe prime volte, la bande furlane di une Gurize che prime no si cognosseve. No si cjacare, in chest câs, di une scuse par dividi, ma, al contrari, la voie di fâ cognossi la lenghe dai vons a lis gnovis gjenerazions, ancje intun ambient multietnic li che ducj – come par esempli la minorance slovene – a àn cirût di no pierdi lis lôr lidriis. I furlans chest no lu vevin mai fat, sedi just o no, e no pues fâ che ben a la culture e a la sielte di no dismenteâ chel che Gurize e il so mandament a àn rapresentât pal Friûl: une capitâl ancje furlane – par tornâ a chel che al diseve Toni Devetag – tal mieç de Mitteleurope.
::::::::::::::::::::::::::::::::::::::::::::::::::::::::::::::::::::::::::::
A Maian, il Gjal ti mostrave la Lenghe
Dentri dal Festival di Maian (28-07-2007/15-08-2007) Regjon-Silce, Arlef, Provincie di Udin, Universitât dal Friûl-Cirf, CFL2000, Aziendis Sanitariis 4 e 5, Comun di Tavagnà, La Patrie dal Friûl, Glesie Furlane, Societât Filologjiche Furlane, Istitût Ladin Furlan “pre Checo Placerean”, La Grame, Il Tomât di Buie, I Colonos, Friulpoint, ILFurlanist, Fantats Furlans, Union Scritôrs Furlans, Radio Onde Furlane, Il Friuli, La Vita Cattolica, Radio Spazio 103, Il Diari, il Comitât 482, Roberto Ongaro, Dree Venier, Sonia Romanini e Sandri Di Suald (Adsglen) a àn aderît furnint une vore di materiâl che za de prime zornade al è stât une vore preseât dal public. La esposizion “Il gjal ti mostre la lenghe” (il gjal al è il simbul dal festival) si è vierte cul setôr dal Cirf de Universitât dal Friûl, e continuave cu la sezion de stampe in marilenghe, i ents teritoriâi, i rapresentants dal mont culturâl, la esposizion dai gadgets e lis maiutis par furlan, par concludisi cul spazi dedicât aes campagnis e iniziativis des Aziendis Sanitariis 4 e 5, il dut compagnât di un setôr video li che il visitadôr al pues viodi materiâl audiovisîf in lenghe furlane.
Un spazi duncje dut dedicât a la promozion de lenghe furlane: une des bielis novitâts che la Pro Loco di Maian, presiedude di Daniele Stefanutti, e à volût par insiorâ la za grande ufierte che aromai di diviers agns cheste impuartante associazion e da al so public. “O vin pensât che al jere impuartant dâ ancje cheste oportunitât ai nestris visitadôrs” a disin de organizazion, che ringraziant ducj i ents e lis associazions che a àn partecipât, a marchin “O ritignìn che prin di dut la int e à il dirit di jessi informade e no tirade dentri in polemichis ideologjichis e strumentâls che a àn caraterizât chestis setemanis: o vin lassât che la int e cjapi cussience e che si fasi une opinion su elements obietîfs”.
Christian Romanini
