Il sît al devente trilengâl e si insiore di altris contignûts gnûfs
Il sît web dedicât ai boscs di Muçane al è stât inzornât e cumò si pues cjatâlu in rêt ae direzion web www.boschidimuzzana.it.
◆ Il progjet, par cure de associazion culturâl Artetica, al è stât inviât tant che azion di valorizazion “dal bas” dal preziôs patrimoni forestâl planiziâl che si cjate in chê zone de Basse Furlane.
◆ I doi boscs che a son juste a Sud dal paîs, a son ce che al reste de antighe Silva Lupanica, il grant bosc che une volte al cuvierzeve dut il plan jenfri i flums Livence e Lusinç, e cui lôr 300 etars di estension a rapresentin un tesaur inestimabil di biodiversitât.
◆ Il sît web, inte sô gnove version, al è stât insiorât di gnûfs contribûts di valôr. Culì si puedin cjatâ informazions di caratar gjenerâl, curiositâts, sezions specifichis in cont di flore e faune, storie, itineraris, materiâl didatic pai fruts di doprâ ancje a scuele e une librarie une vore siore cun passe cincuante titui tra articui e tescj sientifics di discjamâ. Cun di plui, ducj i siei contignûts a son a disposizion par furlan, par talian e par inglês.
◆ Pe realizazion dal progjet, Artetica si è zovade de colaborazion preziose des associazions dal teritori, dal Sportel associât pe lenghe furlane dai comuns di Cjarlins, Gonârs, Muçane, Porpêt, Prissinins e San Zorç di Noiâr e de consulence sientifiche di studiôs tant che Luca Lapini dal Museu Furlan di Storie Naturâl.
Il progjet al è stât metût adun cul jutori di PrimaCassa FVG e cul patrocini dal Comun di Muçane.
◆ Il sît al è stât presentât intune iniziative publiche vinars ai 10 di Fevrâr inte sale consiliâr di Villa Muciana, a Muçane. Une biele serade di divulgazion sientifiche e di socialitât, cun Alessandro Fontana, professôr associât di Gjeografie Fisiche e Gjeomorfologjie dal Dipartiment di Gjeosiencis de Universitât di Padue, che al à presentât une relazion dal titul “Boscs, flums e lagunis: evoluzion paleoambientâl e gjeomorfologjie te aree di Muçane” e cun tancj di lôr che si son dâts adun cun braùre pai lôr boscs, pal lôr teritori e par vie che chel biel progjet che al promôf l’ambient e la culture, inviât za cualchi an indaûr, al va dilunc e al cres ancjemò, in cuantitât e in cualitât. ❚