Il festival Interceltic di Lorient in Bretagne (France) al è nassût 46 agns fa cu la intenzion di svilupâ e di fâ cognossi la musiche e la culture celtiche, e al stes timp cun chê di vierzisi e condividi chestis esperiencis cun altris nazions di divignince celtiche, tant che lis isulis britanichis (Écosse, Pays de Galles, Cornouailles, Île de Man, Irlande) e il nord de Spagne (Galice e Asturies). La peraule di ordin e je Interceltisim, ven a stâi un mût di jessi, di viodi, di fondi i confins celtics ancje viers altris lûcs, tieris di migrazions, tant che la Australie, la Americhe latine e sigûr, par ce che nus rivuarde, la Cjargne, dulà che a partî dal IV secul p.d.C. si son stanziâts i Celtis Carnis.
Duncje, dai 5 ai 14 di Avost, ducj i passionâts son invidâts a Lorient, par chest festival che al invide ogni an un Paîs diviers che al vedi a ce fâ cul mont celtic, e in chest 2016 e je la Australie a jessi stade clamade. Dîs zornadis di tante musiche e di diviersis ativitâts culturâls, di ogni sorte, par une programazion cetant largje e vivarose, dedicade ae mitiche culture celtiche. L’an passât, 940.000 personis si son cjatadis intal lûc de rassegne, tra parcs, stradis, borgadis e centris dedicâts, par une Lorient trasformade intune grande risierve, dulà che il flum Scorff si incuintre cul Blavet.
No dome concierts, ancje se a ’nd è plui di cincuante par plui di un centenâr di artiscj di nomee internazionâl, tant che Joan Baez, Alan Stivell, Dan Ar Braz e la Orchestre Sinfoniche de Bretagne, Andy Gibbs, Kement Tu e tancj altris, par concierts sedi di soliscj, par grups e par events dedicâts tant che la grande serade des armonichis, des cuarnamusis, des arpis, cun orchestris di grant nivel musicâl. A son daspò une schirie di events colaterâi, incuintris, mostris, marcjâts, cineforum, fiestis a teme.
Tra i lûcs plui interessants, il Ricint dal puart ritmic, par cognossi la storie de citât, il Cuartîr breton, cun animazions, rievocazions, robe di mangjâ e bevi celtis, Il Cjanton dal libri, cu lis plui impuartantis publicazions bretonis e des nazions celtichis, il Spazi peraulis e solidarietât, il Marcjât interceltic, il Stadi Breithz, cun tantis ativitâts e animazions, il Zardin des arts e dai liutârs e altris spazis e ocasions di incuintris, ducj di scuvierzi.
Il cost dai biliets al è contignût e al propon pachets bogns par cui che al à intenzion di passâ juste une fin di setemane o viodi spetacui ben selezionâts. Il sît internet www.festival-interceltique.bzh al da dutis lis informazions.
Duncje: grups folk, danzis tradizionâls, contis, mostris, enogastronomie, artesanât, par une manie celtiche cence paragons, parcè che il Festival Interceltic al è dal sigûr un dai plui impuartants e cognossûts tal mont e al merete pardabon di jessi vivût. Sedi mai che inte prossime edizion, a invidin la Cjargne tant che tiere di rapresentance celtiche. Nô o saressin ben contents! Alore tocje ben vulintîr fâ un salt in Bretagne, cussì di fâsi cognossi! ❚