“C laps!” e je une edicule, une librarie, un lûc che al ufrìs servizis grafics e, massime, un pont di incuintri pe comunitât. Lu à viert intal Dicembar stât, a Vile di Buie, Stefania Ursella. Une sielte di cûr, fate dopo di un percors di formazion e professionâl che le à puartade a studiâ prime a Siene e po a Milan e, tornade in Friûl, a fâ la grafiche intun studi di Udin, compagnade di une passion pal teatri che i ven de famee, e che no le à mai molade.
◆ «Mi soi cjatade benon in dutis dôs lis citâts li che o ai vivût. Mi àn fat cognossi storiis e ponts di viste gnûfs, tiessi leams, cressi. E dal sigûr, ta chei ambients, o varès vût plui ocasions di cjatâ un lavôr leât ai miei studis. Ma, a un ciert pont – e conte Stefania –, o ai capît che mi interessave di plui tornâ in Patrie e provâ a meti in vore lis ideis che o vevi pal puest li che o jeri nassude e pe mê int. Cheste e je le sielte che o sintivi juste par me, chest al è il mût che o ai cjatât di dâ sens a ce che o fâs.». Cussì intal 2021 e lasse il puest fis. «Il gno lavôr di grafiche mi plaseve, ma o sintivi che o podevi fâ di plui. Dut ce che al è sucedût intal mont intai ultins agns mi à dade la pocade juste. O vevi lis risorsis e lis competencis par inviâ une ativitât che e fos il struc des mês esperiencis, tal gno paîs, Vile di Buie. Mi dulive viodi che a jerin simpri mancul ativitâts e puescj dulà cjatâsi. Jo il puest par meti in vore la mê idee lu vevi smicjât di un pieç, inte place dal borc. Cuant che o contavi ce che o vevi intal cjâf di fâ, mi rivave indaûr supuart e entusiasim. E alore o ai cjapât coragjo e, cun chel, al è nassût “Claps!”».
◆ Il non al ven dal prin test teatrâl scrit di Stefania: “Claps! Une storie d’amôr”. Al fevele di zovins che a àn di decidi se lâ o stâ, e al à par protagonist un mûr a sec in clap. Un segn. No l’unic. «Mi soi impensade di cuant che o jeri a Milan, al Salon dal libri doprât. O vevi viodût di lontan un test, o sintivi che al veve a ce fâ cun me. Il so titul al jere “Sassi: primavera della mia vita” di Giancarlo Gualandra, stampât di Chiandetti intal 1976. Il leam tra claps e lidrîs, e chel incuintri scuasi magjic a Milan, mi àn fat decidi par chel non».
◆ Li di “Claps!” la int e cjate gjornâi e rivistis (comprendude “La Patrie dal Friûl”), figurinis, ma ancje libris, zûcs e zuguts, e alc di cartolarie; e pues ritirâ pacs, fotocopiâ e stampâ. E cjate un moment par fâ cuatri cjacaris; e pues domandâ la progjetazion di grafichis. Ma, dal sigûr, «no cjate – ni mai e cjatarà – grattaevinci!».
◆ “Claps!” al è un piçul ecosisteme di comunitât, presidi sociâl e culturâl, lûc di relazions par grancj e piçui. «Intal dopomisdì al è simpri cualchi frutin o frutine che al passe a saludâmi e a contâmi cemût che e je lade a scuele. Ma ogni dì al sucêt alc di curiôs e divertent… che no pues contâ par vie dal famôs vincul dal segret professionâl dai gjornalârs!», e dîs, divertide, Stefania. «Pal avignî, o varès gust di inmaneâ incuintris, ocasions di confront e di condivision. Moments di comunitât, insome. Lis ativitâts piçulis e viertis ogni dì, come la mê, a fasin part de fonde dal sens di comunitât dai paîs, dal savê cui che si è e parcè. Mi plasarès che “Claps!” al cressi, magari cjapant a vore une altre persone, par dopleâ ideis e energjiis».
◆ Dongje di “Claps!”, Stefania e cove la sô passion pal teatri: «un lengaç e un moment sociâl che o ai simpri sintût familiâr». E je cheste passion che, dopo di jessi tornade in Friûl, le puarte a cognossi MateâriuM, un progjet in stîl european pe difusion e pe cressite de dramaturgjie in Friûl, «un ambit di lavôr pardabon speciâl».
◆ «Intal 2015 mi soi iscrite come corsiste te Scuele furlane di scriture teatrâl. Po e je tacade une colaborazion stabile. E cumò o soi intal diretîf a cuatri cjâfs cun Anna Gubiani, Alessandro Di Pauli e Giulia Tollis. In MateâriuM o ai cjatât un grup che o sint dongje par intenzions e mût di ponisi, cun serietât, libertât, lizerece e colaborazion vere. Un ort creatîf indulà che si fasin cressi insiemi ancje lis ideis plui matucelis. Intai ultins doi agns o ai cjapât part ae scriture e ae regjistrazion di un podcast su Marta Fiascaris, la mistiche in riviel di S. Denêl che e savoltà l’ambient religjôs dal Friûl dal Sîscent, e ae creazion di “Tramai”, il zûc des tramis, ven a stâi un zûc di taule par inventâ storiis».
◆ Ma lis ideis a son tantis. «A mi mi plâs une vore il teatri dal assurt e o ai simpri pensât che il Friûl al podarès jessi contât benon cun cheste modalitât. E, prin o dopo, mi plasarès rivâ a meti in sene “Int”, ven a stâi “Gente” di Alan Bennet che o ai voltât par furlan cualchi an indaûr pe compagnie atTORONI di S. Denêl, une altre realtât che o colabori».
◆ Par se stesse, Stefania e spere di «imparâ a fâ simpri plui robis» e, in gjenerâl, si augure che «o deventìn ducj un tic plui cussients di ce che o fasìn, o disìn e o sielzìn, ancje se si fâs plui fature». E un pinsîr lu à pes feminis, e pai lôr siums: «No stait a vê pôre. Intal dubi, provait. Simpri cun sintiment». ❚
……………………………………………………
IL PROFÎL
Nassude intal 1987, Stefania Ursella e cres a Buie. Dopo jessisi diplomade intal liceu sientific “Manzini” di S. Denêl, si trasferìs prime a Siene, li che si lauree intal 2009 in Letaris modernis cuntune tesi in Leterature contemporanie su “I turcs tal Friûl” di Pasolini, e po a Milan – dopo di un semestri di “recupar” furlan – pe lauree magjistrâl in Culture e storie dal sisteme editoriâl.
◆ Tornade in Friûl – di pueste e in maniere stabile – intal 2013 e seguìs un cors di formazion professionâl in grafiche par po tacâ a vore intun studi di Udin.
◆ Fin di piçule, par ereditât familiâr, e à vût a ce fâ cul teatri tacant de Compagnie dal teatri sperimentâl di Vile di Buie e continuant cul grup teatrâl dal “Manzini” pal Palio studentesc di Udin. Dopo dai agns de universitât, e jentre inte compagnie atTORONI di S. Denêl, che e fâs spetacui e laboratoris di teatri par zovins.
◆ Intal 2014 si iscrîf te Scuele furlane di scriture teatrâl di MateâriuM. Po dopo, cun MateâriuM e tache une colaborazion stabile tant che docente pai laboratoris di scriture e autore (so e di Alessandro Di Pauli “Voci dalla tendopoli” intal 2016, e un lunc progjet di ricercje storiche su la mistiche Marta Fiascaris che al puarte ancje a une dramaturgjie). Di cualchi an e fâs part de direzion artistiche di MateâriuM cun Anna Gubiani e Alessandro Di Pauli – i fondadôrs – e Giulia Tollis. Intal 2021 e vuide il grup che al à creât il zûc di taule “Tramai”.
◆ Intal stes an si licenzie dal lavôr fis e dopo cualchi mês e vierç “Claps!”, inte place di Vile di Buie: il struc di dutis lis sôs esperiencis di studi e di lavôr. ❚
