I CLASSICS – 1. A SANT JACUM, là che al finìs il mont

In viaç te fede e te nestre identitât.
In colaborazion cu la Associazion «La Grame» o proponìn ai nestris letôrs un altri libri râr: A Sant Jacum, là che al finìs il mont di pre Antoni Beline. No dome un diari dal viaç fat dai 12 ai 17 di Fevrâr dal 1996 cui amîs di Glesie furlane, ma une ocasion par rifleti su lis nestris lidrîs cristianis, culturâls, linguistichis e identitariis. Un viaç tal Nord de Galizie, passant par Montserrat, dongje Barcelone in Catalogne, ma soredut partint e tornant in Friûl e te nestre storie. Di fat, cun chest spirt o vin pensât di proponi dongje des pontadis ancje une piçule schede che e presente lis gleseutis (no dutis…) che a son dedicadis a Sant Jacum, tacant propit di chê di Vençon, il paîs li che al è nassût pre Antoni Beline: il viaç al continuarà proponint volte par volte une zone difarente dal nestri Friûl. Une esperience di fede che e devente une esperience di cognossince e aprofondiment de identitâtdal nestri popul. (Christian Romanini)
Tornant di Sant Jacum
Nol capite ogni dì di pelegrinâ a un lûc straordenari pe spiritualitât, pregnance culturâl e simboliche come Sant Jacum di Galizie. I plui fortunâts, rârs plui des moscjis blancjis, a levin une volte in vite. La fole e veve di contentâsi de seconde oportunitât, chê dopo muarts, prin di lâ finalmentri a distirâ i vues pe polse eterne. La Providence e à volût che ancje jo o podès meti i miei puars pas su la «strade di Sant Jacum» insieme cui milions e milions di oms e feminis di ogni lenghe e fate, sants e barons, devots e imbroions, penitents e profitadôrs, ingjenuis e furbos, grancj e piçui, innomenâts e scognossûts, plens di titui e incarichis e plens di fam e fastidis, e no ai flât di ringraziâle parcè che mi jeri biel rassegnât a fâ la mê talpinade dopo di vê cjapât cumiât definitîf de mê tiere e de mê int e di vê voltade la muse viers dal Ocident, il paîs de muart e dai muarts. Invezit o ai stât, ancje se cu lis comoditâts di vuê che, se ti permetin di rivâ relativementri sigûr e intun lamp, ti gjavin la brame, la gole, la sodisfazion, il spasim di chel che al viôt finalmentri di lontan lis spicis di chel santuari che al à podût contemplâ dome tai siums robâts che a dividevin une zornade di chê altre. In plui o ai stât cul cûr inmò clip pes emozions di un lûc unic come la tiere che e je stade testemonie mute e maraveade de aventure dal Signôr vistût cui catans de mortalitât. Cussì, dopo di jessimi inzenoglât denant dal sepulcri vueit di Crist a Jerusalem, mi soi sbassât a venerâ la cassute là che a disin che a son i vues di un dai siei dissepui, chel Jacum fi di Zebedeo e fradi di Zuan che lui al à clamât ad ôr dal lâc di Tiberiade, par che al deventàs pescjadôr di umigns, testemoni amirât de sô trasfigurazion e consoladôr mancjât de sô agunie e une des dodis colonis che a tegnin sù la glesie e a judicaran di dirit i popui e la storie. Un lûc di tradizion apostoliche al è ce che di plui venerabil si pues cjatâ come cristians. L’ an passât a Jerusalem, là che al è nassût il vanzeli; chest an in Galizie, là che al à tocjât l’ultin confin de tiere e il pont di plui grande estension, almancul te concezion cosmologjiche medievâl che e à determinade la tressadure de nestre culture e civiltât cristiane. Mi mancjarès il tierç lûc sant te tradizion dai pelegrins, il tombâl di Sant Pieri a Rome, ma par cumò o preferìs fermâmi. No si à mai di jessi sfaçâts cu la gracie di Diu e pluitost di ingolfâsi fin che ti spissule jù pal barbuç al è miei supâle planc planchin, gote a gote, savint che inte vite il desideri al è preferibil a la assuefazion e a la saturazion. No pues e no vuei dismenteâ che in ducj i doi i pelegrinaçs o ai vude la consolazion de compagnie materiâl e spirtuâl dai miei amîs di Glesie Furlane, e di altris di lôr, che aromai di agnorums mi compagnin tal pelegrinâ spirtuâl e culturâl aes risultivis de nestre identitât cristiane e furlane, un pelegrinaç no mancul sant e stimolant. L’an passât o soi partît pe Palestine in plene libertât interiôr, cence spietâmi nuie, e il Signôr mi à premiât fasintmi sintî emozions e impressions straordenariis, che o ai cirût di butâ jù, par chel che si pues contâ di un fat indicibil, intun librut intitulât: Impressions di un levit furlan pelegrin in Tiere Sante. Une vore che mi à fat ben a mi tal dâle dongje e a chei che le stan leint propit in chest trat di timp. No intint fâ la stesse robe par Sant Jacum. Prin di dut parcè che i doi fats no àn la stesse penzece e po parcè che, se une robe ti ven ben, la copie e je simpri alc di mancul, cuant che no devente une brute copie. Lu provin chei che a tornin intun lûc che ur pareve il paradîs o a mangjâ un plat che ur pareve la fin dal mont. O cirarai di butâ jù duncje cualchi idee, impression, coment come che mi vegnin tal cjâf, cence un ordin concret. Prin che la memorie e vegni scancelade di un altri fat e prime che la prosaicitât Sante e juste dal vivi di ogni dì mi gjavi chel stât di gracie e di comozion interiôr che al è par definizion transitori e cence tignince, come i colôrs delicâts de albe e lis perlis indarintadis de rosade.
pre Antoni Beline
____________________________________________________________________
Cirint Sant Jacum ator pal Friûl
VENÇON, BORC DI SANT JACUM
Gleseute sucursâl, in borc Sant Jacum, e à un implant archeologjic dal X sec. ma e je ricuardade de metât dal Tresinte; e à vût intervents e zontis plui tardis.
La aule e je retangolâr cun capriadis a viste; il côr bas e retangolâr cun volte a bote di stamp romanic; l’atri al è alt e larc tant che la aule cun ampliis lûs a sest acût, zontât (o rifat) intal 1525; la puarte e presente une lunete a dut sest e barcons di faciade cuadrâts (probabilmentri plui tarts); su la colme de façade e je une alte monofore cjampanarie.
La muradure e je in pieris scuadradis no tant a fin, sul cuviert a son cops.
Dentri o cjatìn afrescs di scuele furlane (dissepul di Vitale di Bologne) de fin dal Tresinte; doi rilêfs in piere dal prin Cuatricent (Sants Pieri e Pauli); daspò l’altâr maiôr baroc di len intaiât (Zuan Seider di Vençon, 1630 cirche).
Sdrumade dai taramots dal ’76, e je stade ricostruide cun une ricomposizion par anastilosi intal 1982.
O ringraziìn bons. Roberto Bertossi pe consulence