I CLASSICS – 10. SANT JACUM, LÀ CHE AL FINÌS IL MONT

La venerazion di Sant Jacum
Cuant che e salte fûr une cjacare sul plevan, ancje i plui catolics a disin suspirant che «di nuie nol ven nuie» e «se la int e cjacare, alc di vêr al scuen jessi». O ai aplicât chest principi ermeneutic vonde discutibil e pericolôs ancje ae storie di Sant Jacum e al à funzionât. Tal sens che i muarts de plêf di Sant Martin, par vieri, ju soteravin su la mont di Sant Pieri a Zui, glesie mari dal cjanâl. E la mont di Sant Pieri e je te stesse direzion di Sant Jacum, viers soreli a mont. Facilmentri a àn dât dongje une tradizion sintude a une esperience vivude.
O ai volût fâ a pît il percors dai muarts e mi soi intivât in doi lûcs cuntun toponim significatîf: la Polse dai muarts, là che a poiavin la casse prime di frontâ la rive plui grivie, e la aghe de Crete dai muarts, là che la int e leve a distudâ la sêt intant de polse. Però al fâs pensâ che la nestre int, lontane mil miis dai grancj flums di pelegrins pe Galizie, e vedi tignude cussì vive e cussì gjeneralizade la tradizion e la devozion di Sant Jacum. Intune biele publicazion dai 15 di Mai dal 1982, buride fûr de associazion «Amici di Venzone» in ocasion dal restaur de vecje glesie di Sant Jacum e Ane, a son ripuartâts doi studis profonts e stimolants. Il prin lu à dât dongje il prof. Remo Cacitti, di Vençon, intitulât: «Un ‘Figlio del tuono’, Tradizioni cristiane antiche su Giacomo il Maggiore (sec. I-III)». Al trate dal non di Jacum tal GT, dai rapuarts tra Jesù e i zelotis, dai pas dal vanzeli là che si fevele di Jacum il Maiôr fi di Zebedeo e di Salome e fradi di Zuan e al finìs cul martueri di Sant Jacum par mans di Erode Agripe, tor il 42 d. C. Il secont al è di Alessio Persiç e al à par titul: «…Fo fata questa benedeta glesie di Messer Sant Jachumo…». «La venerazione dell’ apostolo Giacomo nella Chiesa aquileiese e in Friuli». Al trate de venerazion di Sant Jacum, partint dai lunaris e dai Santoriâi, dai lûcs là che si venerave chest sant, dai pelegrinaçs e des fraternis. Al finìs cu la tradizion popolâr e cui «titui» dal Friûl.
Curiose e je la storie di Svualt Nadale, marcjadant di Sudri che, insieme cuntun compagn, al à fat l’avôt di Sant Jacum, Rome e Laurêt, strissinant une grande crôs e tornant a cjase dal 1784, dopo doi agns di tribulazions. La crôs e je restade picjade sù pal mûr par 55 agns, fin che un grant fugaron al à arsinide la cjase, lassant intate la crôs. Cheste crôs e jere tant cognossude e venerade che un paularin, Pieri Del Negro di Vile di Mieç, le veve viodude in sium e si è fat fâ une copie identiche par puartâle ancje lui in pelegrinaç a Maria Cell (Mariazell). Intant che al prontave la copie, le veve metude te cjamare e la int e leve in procession «per baciarla, ed adorarla fin tanto, che fu levata, ed ancor le andavano molti dietro».
No vin di pensâ che cheste int e fos dute interdete e stupidele, parcè che i stupits no lassin chei sflandôrs di cjasis e di glesiis e di produzion artistiche e nancje chel meracul che si clame artesanât cjargnel, cun a cjâf Jacum Linussio.
Ma la nestre brame di lâ a Sant Jacum no partive dome di Missêr Lavoreben. E voleve continuâ e completâ il grant pelegrinaç dal an passât in Tiere Sante. Di fat al è stât a Jerusalem che nus è vignude la idee, forsit intun moment di strachetât, di lâ ancje in Galizie, par jessi in regule cu la tradizion de Ete di Mieç.
Al jere ancje il gust di stâ insieme. Di fat i nestris pelegrinaçs a vegnin ben ancje se o vessin di lâ a Cjanùs parcè che aromai si cjatìn di masse agns e o fevelìn dibot simpri des robis che nus stan a cûr, che a son glesie, Bibie, int, culture. Par chel o podìn fâ pelegrinaçs ancje su la coriere parcè che o sin in sintonie spirtuâl. E il stâ insieme une setemane al devente une sorte di esercizis spirtuâi ancje se si rît.
A chestis resons jo o zontarès ancje une simpatie profonde dopo che o vin tacât a resonâ su lis lidrîs judeus-alessandrinis de glesie aquileiese. Al pues jessi un discors stupit, a distance di vincj secui, però al somee di sintîsi plui a cjase a Sant Jacum o magari a Alessandrie di Egjit che no a Rome, parcè che nus somee di vê plui parintât cun Jacum che no cun Pieri.
A proposit di chest pluralisim straordenari de glesie primitive, nus faseve notâ il prof. Paolo De Benedetti di Milan che, intai prins timps de glesie, in cuatri gjats a àn scrit cuatri vanzei e a vevin cuatri eclesiologjiis (Pieri, Pauli, Jacum e Zuan). Cumò che o sin sul miliart e sparniçâts par dut il mont e cuntune pluralitât inimagjinabil di culturis e di sensibilitâts, o vin un vanzeli sôl e salacor nancje chel, parcè che o vin dome i pronunciaments dal pape e de curie romane.
pre Antoni Beline