Tal cjamp de stele
Ancje se la visite a Barcelone e je stade biele e chê di Montserrat interessante, la mete dal nestri viaç e jere Santiago de Compostela, là che dal 800 il vescul di Iria, Teodomîr, vuidât de lûs di une stele, al veve cjatade une tombe che no podeve no jessi venerabile. E dal moment che nissune tombe no je plui venerabile di chê di un apuestul, chei vues a scugnivin jessi di Sant Jacum il Maiôr, ricuardât come evangjelizadôr de Spagne insieme cui siei doi dissepui Atanasi e Teodôr. Di fat, tal santuari, daûr de casse indorade di Sant Jacum, a son lis cassutis dai siei dissepui.
Il dut al è partît di un romitori, là che al viveve un eremite, Pelagji, come a Monserrat. E Diu al à pensât lui a fâ cognossi il cjamp e il tesaur platât tal cjamp, come che al dîs il vanzeli. A conferme che se Diu al vûl, al pues jemplâ di vite e di devozion il lûc plui salvadi e la gleseute fûr di man. E se lui al vûl, al pues fâ deventâ salvadi e desert ancje il lûc plui grant e plen di vite, comprendude la basiliche di Sant Pieri a Rome. Al è lui che al invente i santuaris, no i vues e i claps.
Par chel, o dîs che al è secondari che li a setin propit lis relicuiis di Sant Jacum, come che al à confermât cun masse premure e sigurece pape Leon XIII dal 1884 e come che, cu la stesse sigurece, a àn dineât i aversaris razionaliscj. Al semearès adiriture, par colm di sfortune, che lis relicuiis che par plui di mil agns a vevin clamât dongje int di ogni contrade de Europe a fossin in realtât di un eretic dal IV secul, Prissilian, un gnostic condanât dal imperadôr par magjie e imoralitât e fat decapitâ dal 386. La scuvierte dal 1988 di une fenestella confessionis dai prins secui cul non di Atanasi martar e torne a dâi fonde ae tradizion, dimostrant ancjemò une volte che la int no je tant stupide di fâ sù sul nuie.
A titul di curiositât, o ripuarti ce che al è stât scrit tun numar di 30 giorni dal Novembar dal 1995, intitulât “Testimonianze di una presenza”.
* an 44, aventi
I ats dai apuestui (12, 1) a contin dal martueri di Sant Jacum il Maiôr, fradi di Zuan, a Jerusalem.
*secui IV-V
Paris de glesie e scritôrs eclesiastics a fevelin di un dai Dodis che al à predicjât tes tieris di Ocident. Si trate di un apuestul che nol è Sant Pauli. Didim il Vuarp, tun tratât prin dal 380, scrivint dai apuestui «che a àn vivût cul Signôr», al fevele de Sapience che il Spirtussant i veve dât «tant a di chel che al à predicjât in Indie che a chel che al à predicjât in Spagne». Sant Jeroni, dal 412, intun coment al libri di Isaie, al fevele di un dai Dodis che al à predicjât in Spagne, e cussì ancje Teodorêt di Ciro. Ancje Ilari di Poitiers, Eusebi di Cesaree e Efrem di Sirie, e duncje fra i plui grancj luminârs de Patristiche, a ricuardin un apuestul che al à operât in Ocident intun contest che nol puarte a pensâ a Sant Pauli. La testemoneance di Sant Jeroni e je ripuartade ancje par “spiegâ” la traslazion dal cuarp di Jacum in Spagne: «Il Spirt al à volût che ognidun al veti di polsâ inte tiere là che al à predicjât il vanzeli e insegnât». (Une reson che a varessin di tignîle presinte ancje i plevans, soredut chei che a àn passade une vite, cuant che a fasin test, n.d.r.).
* sec. VIIIl
Breviari apostolic, traduzion latine di catalics bizantins almancul dal IV secul, a fevelin di Sant Jacum «fi di Zebedeu e fradi di Zuan, che al à predicjât in Spagne».
* inizi dal VII secul
Tal De ortu et obitu Sanctorum Patrum atribuît a Sant Isidôr di Sivilie, si lei:«Chel che al à predicjât in Spagne e intes tieris dal Ocident al è sepulît in Acha Marmarica».
* 709
Sant Anselm di Malmesbury tal Poema de Ara al ripuarte une tradizion britaniche in mert ai apuestui. Al fevele di Sant Jacum come di chel che «par prin al à convertît i popui de Spagne». La tradizion e je ripuartade ancje dal Venerabil Beda dal so Exceptiones Patrum.
* 783-830
Beât di Lièbana, tal so coment ae Apocalìs, al compon une cjante in onôr di Sant Jacum clamât protetôr de Spagne e lu pree par vê il so jutori te vuere cuintri dai musulmans. In mert a chel si sa che, dongje de iconografie classiche di Sant Jacum cul baston di pelegrin, e je ancje chê di Sant Jacum a cjaval, usance Sant Zorç. Dome che invezit di copâ il dragon, al cjonce il cjâf ai musulmans. Di li, il titul popolâr di matamoros (cope neris).
* 830-860
Il Martirologji di Floro di Lion al fevele de venerazion dal apuestul Sant Jacum a Compostela: «I sants vues di chest beatissim apuestul a son stâts traspuartâts in Spagne e sepulîts tai siei ultins confins, ven a stâi in face dal mâr britanic, là che e va a venerâlu simpri une grande fole».
* 877-879
Il re Alfons III al fâs fâ la seconde basiliche, a trê navadis, che e tapone il mausoleu.
* 997
Il gjenerâl musulman Almanzor al fische la citât e al da fûc ae catedrâl di Santiago, lassant dibot intat il mausoleu roman.
* secui XI-XIII
La basiliche, restaurade, e ven consacrade dal 1003. La costruzion de tierce basiliche, chê di cumò, e scomence dal 1112. La cjamare sepulcrâl cu lis relicuiis e reste soterade sot dal presbiteri. E restarà cussì, cence jessi svicinade di nissun, fint ai sgjâfs fats dai 16 di Jugn dal 1879 ai l2 di Març dal 1883; lis relicuiis a son autenticadis cun decret arcivescovîl e confermadis uficialmentri di Leon XIII cu la Letare apostoliche Deus Omnipotens dal 1n di Novembar dal 1884.
* secul XII
A vegnin copiadis dai documents plui antîcs lis unichis cronichis ancjemò conservadis e che a fevelin de scuvierte dal sepulcri apostolic. A contin che al è stât cjatât dal munic e eremite Pelagji e dal vescul di Iria Flavia, Teodomîr. L’apuestul Sant Jacum al sarès stât sepulît insieme cun doi dissepui, Atanasi e Teodôr.
* secui XI-XVI
Al è il timp dai grancj pelegrinaçs medievâi a Santiago di Compostela.
Fin chi la ricostruzion storiche. Ma par me che o jeri li, te tiere di Sant Jacum, nancje no mi passave pal cjâf di domandâmi se in Galizie a jerin o no jerin i vues dal Boanerghes, dal fi dal ton, Jacum. Jo no volevi metimi in comunion cuntun muart ma cuntun vîf e cu la prucission infinide di int che prime di me e cun plui fadie e riscli di me e veve frontât il viaç di Sant Jacum. Un apontament cu la resurezion e cu la fede che e fâs tornâ a vivi.
pre Antoni Beline
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +