I CLASSICS. 17 – CUINTRISTORIE DAL FRIÛL La albe de nestre Patrie

La gnove politiche
In Friûl l’afâr nol jere par nuie clâr, ancje par vie che il Stât talian, voie o no voie, al veve pierdude la vuere e la Jugoslavie di Tito le veve vinte.
I aleâts, al ven a stâi i mericans e inglês, no vevin une idee clare su ce fâ dal Friûl. Tito si jere implantât za a Triest e al veve slungjadis lis grifis fint a Gurize e cualchi troput di soldâts dai siei a vevin mostrade la muse tal Friûl di là de Tor.
Tocje ancje dî che i furlans no ju vevin di bon voli, fûr di chei che a vevin scombatût dutune cun lôr tant che partigjans.
Cussì cualchi furlan al à fevelât di une republiche furlane cjapade dentri te federazion jugoslave. L’afâr al à stiçât i furlans che a olsavin pensâ a la indipendence dal Friûl, ma ancjemò di plui chei che a vevin denant dai voi dome il stât talian…
La ghenghe dal nazionalisim talian e profità, butantsi tant che il mus te semule. I aleâts a ciririn di meti sù un confin e a preparavin trê liniis, chê russe, chê francese e chê inglese, che biel ad ordin si tignivin dal ôr de Tor (russe) fint sot lis monts di là di Gurize (inglês).
Se no si faseve i talianiscj – a contavin i gjornâi – si riscjave di deventâ sclâfs.
Tal batibui e restà sapulide la idee di un Friûl indipendent, che nol varès displasût ai aleâts: lôr no vevin mai dit clâr dulà che al varès vût di jessi il confin da la Italie des nestris bandis.
Si che duncje, passade la scalmane dai confins, cun ducj i dispiets che si pues imagjinâsi te fin di une vuere, al scomençà il cantin dal implant di dâ al stât talian (la «Costituzione»).
In Friûl la int e jere pal plui de bande dai predis cun cualchi afiet pal socialisim, massime i operaris che lu vevin cjapât sù pal mont.
La vuere e veve semenât ancje un pôc di comunisim, intant che la siorie – patriotiche e nazionâl – e restà grampade a lis ideis dal risorziment talian. Cussì la int e finì cul intropâsi in cuatri partîts: chel liberâl, chel socialist, chel comunist e massime chel de democrazie cristiane che al cjapave dentri chei che a jerin stâts cul partît popolâr di Sturzo e la grande fete de Azion Catoliche cu la fonde des parochiis ben rezudis dai plevans furlans.
Ma il Friûl al vevial di vê une sô muse regjonâl in Italie o vevial di jessi glotût dal Venit?
Su chest cantin al nassè il M.A.F. (moviment autonomist furlan) che al scombateve par une regjon dome furlane de Livence al Timâf.
I furlans a jerin une int di no confondi cui venits: a vevin la lôr lenghe, la lôr vite e il lôr interès.
Il gjornâl Patrie dal Friûl al nassè par chel (1).
Al jere il cricâ dal dì de cussience etniche e politiche furlane.
Al varès podût fâ strade se nissun si fos impensât di copâlu di piçul.
Ma il vescul di Udin al fasè capî ai predis che a vevin di tignî sù la democrazie cristiane; socialiscj e comuniscj a viodevin masse lontan par impaçâsi dai interès dal piçul Friûl, chei altris a vevin tal cjâf la Italie, e cussì nol podè cressi e fâ ce che al varès podût fâ.
Ma almancul la storie de autonomie regjonâl furlane e le indenant ancje se e fo miscliçade sul plui biel cun Triest, par vie di chê Vignesie Julie che a zontarin al ultim moment. I nestris deputâts a àn simpri vude chê di molâ par no intrigâ la politiche di Rome!
Ma Triest nol jere ancjemò Italie, e cussì i talianiscj no lassarin nassi la autonomie dal Friûl par spietâ la sorte di Triest.
A di un che al mole si domande simpri di molâ di plui!
La gnove cunumie
In timp di vuere dut al jere bon ce che al jemplave lis busis de tessare.
Ma dopo? In Italie nancje pensâsi di cjatâ vonde lavôr par vivi. E alore? Il furlan al tornà a scugnî lâ pal mont par vivi lui e la sô famee.
E scomence la Ete de migrazion gnove.
Dulà si podevial lâ?
La Argjentine di Peron e vierzè lis puartis. Dal ’45 al ’52 i furlans si indreçarin di chê bande. A miârs a rivarin là jù e si messedarin cu la vecje migrazion, che e fevelave ancjemò furlan.
Pal plui a restarin là jù, parcè che la Argjentine a lave al mancul; vivi si podeve, ma no meti vie par tornâ a implantâsi chenti.
Planchin planchin si vierzè cualchi altre puarte: magari cul contatôr, ma si podeve lâ a fâ une palanche in Australie e ancje in Svuizare.
Tal Belgjo a gjavâ cjarbon a mil metris sot tiere si podeve lâ cence tancj fastidis!
Par cualchi an il Venezuela al è stât pai furlans un paîs di fâ bêçs.
Po il Canadà al à vierzudis lis sôs puartis, ancje se dome in sclese.
Cuasi ducj chei dal Canadà si son plantâts là vie, si son fats un bon non, une buine posizion tant di someâ i plui fortunâts dai furlans pal mont.
Ma migrâ al vûl dî ancje lassâ, e il Friûl dopo de vuere al à pierdude cetante int, che e podeve tirâlu sù.
Da Udin in sù il Friûl nol à paîs che nol sedi calât di numar; cualchi paîs ancje dal 50% e plui.
Al è un cantin che al fâs vignî i sgrisui.
I nestris sorestans a someavin che no si inacuarzessin e che a vessin chê di salvâ la Italie, o i operaris, o la religjon.
Nissun partît si impensave che al jere di salvâ ancje il Friûl e il so popul.
Intant il stât talian al rivave adore di fa il «meracul» di metisi in pîts e di cjapâ la strade da la industrie e dai afârs.
Il boom (meracul) industriâl al someave fermâsi a Mestre, po a Conean e a Pordenon. In Friûl industrie e afârs a stentavin a rivâ, nancje che al fos stât cualchidun pront cu la sieraie.
La veretât e je che la int a viveve miôr, nol mancjave ni pan ni companadi, ma i cjamps a jerin simpri plui pustots, lis monts e lis culinis simpri plui bandonadis: ancje chês cuatri centrâls eletrichis a nassevin par fâ lâ indevant machinaris di fûr dal Friûl.
Cualchidun al rugnave che il stât talian nus tratave piês di une colonie africane: ma talianiscj e impiegâts talians tai uficis a ripetevin ufindûts che dut al jere talian.
Ancje la glesie si jere inflapide e no someave inacuarzisi di ce che al steve sucedint in Friûl; salacor par vie che e crodeve di jessi tal sigûr, sint rivade adore di meti il tamon ta lis mans de democrazie cristiane.
Comuniscj e socialiscj a viodevin i afârs gjenerâi de classe dai operaris e, pûr che al fos stât lavôr ben paiât in Italie o ancje in Europe, a tasevin: se a vuacavin al jere di pensâ che e jere politiche, ma no furlane.
I talianiscj a tornavin a olsâ pensâ che i furlans a vevin di murî come furlans, e la Filologjiche e cirive di salvâ il furlan, par ingrumâlu in cualchi museu. I militârs, mo, a cressevin di numar e di impuartance. Propit in Friûl a soreli jevât e passave la «tindine (cortina) di fier». Il «mont libar» al veve chenti di difindisi midiant de organizazion de N.A.T.O.
Cussì il Friûl al fo invadût une altre volte dai soldâts, che a vevin di difindi in Friûl mieç mont de tristerie di chel altri mieç.
A àn jemplât il Friûl di casermis, di fuartins, di bunkers, di fusetis e di canons, dal Cansei fint a Monfalcon. Si son plantâts là che ur plaseve, tant che a fossin stâts parons spotics.
La int e veve di tasê: ur devin sore cuatri solts, magari dîs agns dopo.
Simpri ai furlans, ur tocjave di no fâ sù cjasis, fabrichis, taiâ lens, vierzi canâi…par salvâ la Italie e il mont ocidentâl.
Diu nus vuardi a protestâ: al jere un onôr sacrificâsi pe patrie e un vantaç murî par jê.
Buzaris che a àn simpri costât ae puare int furlane.
I gjornâi in Friûl no tocjavin il cantin: i sorestants a fevelavin dal Sputnik, e la int si incocalive, ancje se fruts e fantats a lavin a scuele a pleton, che al coventave fâ sù e slargjâ lis scuelis di ogni bande.
A viodi ben e mâl messedât dutune, tocje pensâ che il Friûl al leve mâl, ma al miorave par vie che chei dongje si ingrassavin simpri di plui e alc dal lôr bielstâ al travanave ancje in Friûl.
pre Josef Marchet e pre Checo Placerean