I CLASSICS – 6. SANT JACUM, LÀ CHE AL FINÌS IL MONT

Pelegrins e no torzeons
Nô o savìn di dulà che o vignìn e o savìn ancje là che o vin di rivâ. Gjeografichementri o vignìn dal Orient, tiere de lûs e de risultive de vite, e o cjaminìn viers l’Ocident, tiere dai muarts, ma ancje puart pe eternitât. Spiritualmentri o vignìn di Diu par cont de creazion e di Crist par cont de redenzion e o cjaminìn viers i cîi gnûfs e de tiere gnove, viers de gnove Jerusalem, là che o podarìn cjantâ la glorie di Diu e dal Agnel, come che nus conte la Apocalìs, riprodusude in maniere straordenarie tal puarti de Glorie de basiliche di Sant Jacum.
Par chel il nestri cjaminâ come cristians al è consolant, ancje se umanementri, soredut in cierts moments de vite e in ciertis situazions, al pues jessi problematic. Parcè che nol baste simpri viodi une stele sul nestri cjâf par vê automatichementri seren tal nestri cûr. Però o vin la consolazion de stele sore di nô. Par chel un cristian nol sarà mai torzeon o cercandul, ma simpri e dome pelegrin.
Ma la nestre fortune come cristians e va plui in là. No dome o cognossìn lis nestris coordenadis, il nestri inizi e la nestre fin, ma o vin ancje la gracie di un compagn di strade verementri unic, Diu, che no dome al è daûr di nô tal scomençâ e denant di nô tal finî, ma al cjamine cun nô come il pastôr che al cjamine insieme cul so trop e denant di lui. La vere ricjece de nestre religjon no sta intun sisteme di leçs plui altis o perfezionadis, ma tal fat che Diu si è sbassât fin chi di nô. Dome cussì si pues «cjaminâ par une foranate scure» (Sal 23, 4) cence pôre e frontâ cun sgrimie e serenitât il viaç de liberazion e i pericui dal desert, di ogni liberazion e di ogni desert. Se Diu al è par nô, cui si metaraial cuintri di nô? (Rm 8, 31). E Diu al è par nô, anzit cun nô, l’Emanuel, soredut di cuant che il Verp, Sapience increade, Fi di Diu e Diu a pâr dal Pari, al à plantade la tende framieç di nô (Zn 1, 14).
Il vanzeli al tache cun chest misteri di amôr e al finìs cu la sigurazion che lui al sarà cun nô «ducj i dîs, fint a la fin dal mont» (Mt 28, 20). Alore o podìn propit fevelâ di plenece dai timps come plenece di presince. Tal VT Diu al compagnave il pelegrinaç dal so popul cu la tende de cunvigne, là che a jerin metudis lis lastris de leç, tant a dî che la peraule di Diu e la sô leç a deventin lûs e orientament. Tal GT no vin plui une tende fate dai oms, ma Diu stes al plante la sô tende e si fâs pelegrin e viatôr.
Tornant al paragon de coriere, no dome o savìn di dulà che e partìs e dulà che e à di rivâ, ma o vin ancje la fortune di un autist che nus vûl ben e al cognòs benon la strade, jessint propit lui «la strade, la veretât e la vite» (Zn 14, 6).
Se o ves alore di fâ un auguri ai oms, se o ves di domandâ par lôr un regâl o esprimi un desideri profont, al sarès di rivâ a dâ un sens di pelegrinaç al lôr torzeonâ esteriôr e interiôr. Rivâ a dâur un pont di partence e un pont di rivade e une segnaletiche clare e liberant ancje tal passaç intermedi, in mût di savê simpri là che si è, ce strade che si à fate, ce strade che si à ancjemò di fâ, se si va indenant o indaûr o in bande, se si cjamine viers la lûs e la liberazion o viers il scûr e la disperazion. Soredut cuant che la vite ti presente une crosere e nol è facil savê se si à di cjapâ la strade a man drete o a man çampe. E vuê, intune societât pluriculturâl e struturade, tu ti cjatis simpri plui dispès denant di plui soluzions e sugjestions.
O crôt che vuê al coventi propit chest orientament, che nol à di jessi ni autoritari, ni ideologjic, ni preconfezionât. I presonîrs a san di dulà che a vegnin e dulà che a van, ma a restin presonîrs, parcè che la strade no le àn sielzude lôr. Il pape e la jerarchie catoliche, cuntune insistence ossessionant e cuntune prepotence preocupant, ti segnin no dome la strade grande, che al sarès ancje un ben, ma ancje i trois, come se tu tu fossis un frut di menâ par man. L’orientament che o intint jo al è alc di profont, di liberant e di consolant, une concuiste e une gracie. Parcè che nol baste cjaminâ e nol baste nancje rivâ, se no tu sintis di cjaminâ viers la lûs e no tu rivis plui siôr interiormentri.
Vuê si riscje di jessi telecomandâts ancje tal cirî. Di fat si va ducj a comprâ in chei puescj, si mangje ducj il stes brudiot, si lei ducj il stes gjornâl, si dopre ducj la stesse monture, si gambie ducj regjistri politic e ideologjic cu la stesse velocitât e facilitât. Duncje no sin pelegrins, ma int strissinade vie in diaspore come i ebreus di Babilonie o chei dai cjamps di concentrament, ancje se cun cjadenis invisibilis, ma no mancul pericolosis e umiliantis. La prime condizion dal pelegrin e je chê che al decît lui di lâ. Cuant e co.
pre Antoni Beline