7. La albe de nestre Patrie

Il Friûl todesc
In doi secui di dominazion langobarde la coloridure etniche e culturâl de Furlanie e veve bielzà cjapade une tinte gjermaniche che, sot i Francs e sot i Berengaris, no si pues dî che e fos lade smamide. Dopo lis devastazions dai Ongjars, la vite de nestre regjon e tornà un pôc a la volte a risurî, ma di chês stessis lidrîs, cun chel caratar istès e par man di personis di chê stesse çocje. Al sarès dibant sfuarçâ la storie par tignî leât il Friûl cul mont talian dal X al XIII secul: diferent l’ordenament feudâl sot dai patriarcjis, diferent il svilup dai Comuns e dal Parlament, diferentis lis relazions comerciâls e ancje chel fregul di culture che e podè sverdeâ in timps cussì crûts e tormentâts.
A partî da la ultime passade dai Ongjars (951), fintremai cuant che al rivà chenti Grivôr di Montlungje (1252), a guviernarin il Friûl disesiet o disevot patriarcjis che – gjavant Gjerart di Premariâs (1121-1129) e, salacor, Zuan che no si sa dontri che al jere (984-1019) – a forin ducj todescs, di solit parincj di rês e imperadôrs o lôr cancelîrs o capelans o confidents, o che jessivin di potentis fameis feudâls de Gjermanie. Si capìs che, vignint chenti, si menavin daûr int di lôr fiducie, massime in chei timps che i tradiments di ogni fate a jerin cussì usuâi; e chês jurisdizions feudâls, che a dipendevin di lôr, lis metevin tes mans di personis siguris de lôr parintât o di lôr cognossince; e, jessint leâts cussì a strent cui imperadôrs, a restavin dal lôr partît ancje cuant che e nasseve cualchi cuistion cui papis. La cort aquileiese e jere duncje formade, in buine misure, di elements todescs; la nobiltât ministeriâl, i uficiâi, i nodârs a vignivin dai paîs di là des monts e tancj di lôr si stabilivin culì par simpri. In trê secui cheste filtrazion e veve, par fuarce, di lassâ il so stamp avonde in dentri te vite de regjon. Se la Gjermanie e ves vude, in chê volte, une sô culture ben individuade, il Friûl al varès scugnût glotile. Ma la culture latine, massime tra i umigns di glesie, e jere culture universâl e cussì i trê secui dal patriarcjât todesc no puartarin une vere gjermanizzazion dal Friûl. Par altri la lenghe todescje (antîc – alt – todesc) e fo, dongje dal latin, la lenghe di dutis lis personis di cualchi istruzion, la lenghe des relazions cui sorestants, e la lenghe di cualchi document e di cualchi scriture.
Un cjaluni di Cividât, Bernardin di Circlarie, al è l’autôr di un dai plui antîcs e grues libris in viers todesc il “Wälischer Gast” (p.f. il forest talian); il plui brâf e innomenât dai “Minnesänger” (cjantôrs di amôr), che al fo Walter von der Vogelweide, al passà cualchi timp in Friûl; un altri di chescj poetis (un fregul tocjât di çurviel), Ulrì di Lichtenstein, al conte intun libri (tal Frauendienst = servizis des sioris) dutis lis bravadis fatis ator pal Friûl tanzonant cui miôr cavalîrs di chenti. Une vore di peraulis di stamp todesc a jentrarin in chê volte te lenghe furlane e in part si lis dopre ancjemò (vuaite, paisse, vignarûl, licôf, grap, cramar, bearç, gatar, glove, seneôs, e v.i.) altris a son ladis dismenteadis, come: sgravâr (mascare), sloiar (vêl), seiter (tasse) e vie indenant. I nons dai paîs, tes cjartis di chei timps, a son a voltis voltâts in todesc (Gutenbrunn = Fontanebuine) o alterâts in maniere di semeâ peraulis todescjis (Weiden = Udin; Klausen = Scluse; Klemaun = Glemone; Rewin = Ruigne; Portenau = Pordenon e cet.); o che a son mudâts di plante fûr: Schönfeld = Tumieç; Peitscheldorf = Vençon; Osteric = Cividât; o che a son nassûts in chel timp cuntun non todesc: Spilimberc, Solimberc, Richinvelde, Tamau e cet. Su lis primis faldis des monts a forin costruîts cjistiei e fortificazions, che a puartavin il non di cjistielans todescs: Aissenstein, Grossemberg, Rabenstein, Pramperg, Perchtenstein, Frusberg, Sofimberg, Haumburg, e tancj altris che, se si fasès une mape topografiche cu la toponomastiche dal 1200, si podarès crodi di vê sot i voi une provincie da la Austrie o de Gjermanie. Ancje la int e puartave dispès nons e sorenons todescs.
Patriarcjis e Comuns
Cui che al fevele o che al scrîf sul cont dal Friûl ta la Etât di Mieç, al scuen dî mâl dal guvier dai patriarcjis, par podê dopo justificâ la dominazion di Vignesie, che lu strucjà. E vignarà la volte che o spiegarìn ce beneficis che Vignesie e puartà te nestre tiere: intant, in mancjance di miei, Vignesie e je la Italie e alore si capìs dut: e va tignude sù ancje a fuarce di sflocjis!
In realtât il Stât patriarcjâl, tant che ogni unitât feudâl, al fo saborât di barufis e di vuerucis, che tra i siôrs parons o sotparons no mancjarin mai: la puare int dai paîs e mudave paron ogni altre dì e ogni gambiament al puartave cualchi distruzione e cualchi vitime e nissun vantaç pes popolazions. Ma cheste, magari cussì no, e fo la condizion di dute la Europe in chei timps e si pues ancje dî che la plui part di chês altris regjons e fo salacor plui tormentade de nestre. Ce vite jerie chê dai Comuns de Lombardie che si sbregavin un cul altri? Ce vite jerie chê dal Venit cun Ezelin o cui siôrs di Cjamin o cun chei de Scjale di Verone? E la Toscane al timp di Dante e prin e dopo, ce pâs e ce prosperitât aie podût gjoldi? Al baste dî che centenârs e centenârs di Toscans a scjamparin in Friûl, juste sot dai patriarcjis, parcè che chenti, dal mâl e dal malan, si podeve almancul tirâ flât. E no stin a discori di Rome o de Sicilie o di chei altris paîs, tant di ca che di là des monts. Tiradis lis sumis il Stât Furlan, par cuatri secui, al patì mancul batiduris de plui part di chei altris e la disconcuardie e regnà plui che altri tra i parons e no tra lis popolazions.
Lis memoriis, che nus son restadis di chei timps, a fevelin di lotis e di svindics; ma si sa che, par dut il mont, cronichis e documents a tratin dome di chestis robis, parcè che la vite ordenarie de int, il so lavôr, lis sôs gjondis e i siei dolôrs, par solit, no interessin ae storie: la storie e je storie dai potents, dai parons e des lôr carognadis.
Il fat al è chest, che in chel timp il Friûl sdrumât e spopolât dai Ongjars al tornà a metisi in pîts e un grumon di paîs a nasserin juste in chê volte. Une altre robute e mertarès precisade, in chest pont. A scuele nus àn insegnade patriotichementri la storie dai Comuns talians e de Leghe Lombarde e de distruzion di Milan par man di Fidrì Barberosse e de bataie di Legnan; ma nissun dal sigûr, no nus à contât che i nestris vons furlans a forin simpri de bande dal imperadôr cuintri i Comuns talians e che ator des muris di Milan assediât tal 1161 a jerin cun Barberosse ancje i soldâts dal nestri patriarcje Piligrin; e che se Vodalrì al clopà un pôc di là, Gofrêt, Volcher e Pertolt di Andechs a forin simpri cui imperadôrs de cjase di Svevie. E nol è di dî che la politiche imperialiste dai patriarcjis e fos contrarie al pinsîr dal popul furlan: parcè che, Sabide Sante dal 1168, cuant che il patriarcje Vodalrì, te basiliche di Aquilee, al fasè cjantâ la orazion pal pape Lissandri III che al jere il grant nimì dal Barberosse, dute la int che e jere vignude a funzion, e tacà a protestâ, a sberghelâ e po e scjampà fûr de glesie, lassant implante il patriarcje.
Cumò nol è il câs di tratâ di cui che al veve reson o tuart in chestis barufis tra papis e imperadôrs e tra princips ghibelins e Comuns papalins: ma mestris e professôrs e scritôrs e predicjadôrs a varessin di savê che lis vitoriis – o miezis vitoriis – dai Comuns talians cuintri Fidrì I e Fidrì II, no son une nestre glorie; e nol è onest falsâ la veretât par meti i furlans intun fassut cu lis leghis Comunâls (che, dal rest, no scombatevin par spirt nazionâl, ma nome pai lôr interès positîfs).