Nassût a Munic intal 1911 di une famee di migrants furlans, Anzil Toffolo si lu cjate a Tarcint, rientrât in Patrie, tacant dal 1916, là che al murarà intal 2000. La sô maturazion artistiche, za segnade di esperiments di grant valôr, e tache sul principi dai agns ’40. Segnât prime de esperience de vuere e daspò de resistence partigjane, cun Zigaina al firme tal ’46 il “Manifest par une art classiche moderne”. Di une sensibilitât neorealistiche, dure, peade ae tiere e al sens dal lavôr e de fadie, al passe però, e in curt, a une vision deformade de realtât, là che segn, colôr, pinel si misclicin intun berli paurôs: sium e veretât si instrecin simpri a formâ fantasimis e pôris, proiezions di une profonditât psichiche di lidrîs fuarte. Il so riferiment al reste di sigûr il mont artistic nordic dai grancj interpretis de Ete Moderne tant che Bosch o Bruegel, cjapant intal pinel une cierte ande tipiche dai pitôrs e dai artiscj flamants. Pasolini, intal 1947, al ricognosseve ae sô sensibilitât bastarde, incuietante, buine di zuiâ tra lusôr e scûr, un alc di spirtât e di tormentât, là che la lûs no je chê de realtât esterne, ma pluitost une proiezion dal so mont complicât, ingredeât, interiôr.
In cheste opare, intitulade “La ocupazion de tiere” (vueli su taule, seconde metât dai agns Cuarante, cm. 50×80), i riferiments al Cubisim e al Futurisim a son evidents; l’autôr al zonte ancje une dinamicitât fuarte e une declarazion politiche coragjose e sclete. Finide le seconde vuere mondiâl, dopo de propagande fassiste dal forment, dal imbroi des bonifichis, de ridicule pretese di vuadagnâsi une fame imperiâl, le rabie dal popul, ancje furlan, si trasforme in ocupazion: metadiaris, manoâi, operaris a son rapresentâts intune forme corâl, cuasi epiche, dongje dai lôr animâi, no diferents des bestiis inte fuarce e dignitât peade ae rivendicazion dal lavôr. In man, a puartin bandieris e imprescj: forcjis, falcets, ristiei. Oms e feminis libars, dal sigûr no sotans, cu la muse dure, i voi sgjavâts, lis mans fuartis, muscui e orgoi, braùre che si pant intal davoi dal riviel. Colôrs e formis si trasformin in vôs. Un mugugnâ rabiôs che al devente cjant di proteste. Al è un popul che al cjamine cuintri di ogni furbetât di paron, che al pretint di jessi libar, autodeterminât, fari de sô storie e de sô dignitât. A distance di cuasi setante agns, al somearès il manifest segnât cul sanc pe concuiste dignitose de Autonomie.
di Agnul Floramo
