Ce vuelial dî colâ dentri di un cuadri, esplorâ lis penombris di un afresc, fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie, ma lis conte dal didentri, cu la vôs dai lôr protagoniscj, intun zûc gnûf e intrigant.
Tal manuscrit 264 de Biblioteche Guarneriana di S. Denêl, che al pues jessi viodût tant che une racuelte curiose di tescj di ete divierse e di argoment diferent, si cjate in particolâr il misteriôs Libellus fratris Telophori presbiteri et heremite: un scrit atribuît a un muini profetic, un eremite sfolmenât, di non Thelophorus, che al veve contât cun lenghe inflamade e inmagade cierts episodis dal Grant Schisme de Glesie Ocidentâl (1377-1453). Chestis cjartis in particolâr a puartin une date precise, il 1426, là che si dîs che il test al ven copiât in spiete de fin dal mont.
Lis pituris, dissegnadis a ingjustri di pene neri e in part coloradis di zâl e di ros, a son di grant nivel, e si puedin atribuî ae man di Antonio Baldana, za autôr di un rindicont poetic sul Schisme stes, che al à gjoldût di grande fortune, dedicât al Pape Martin V. Baldana al veve bielzà insiorât tantis cjartis di manuscrits de Italie setentrionâl, dutis plenis di figuris che in cualchi maniere a descrivin la Apocalìs, la conclusion dal Timp e la vignude dal Anticrist. Baldana al fo un grant amì di Varnîr di Dartigne, o ben Guarnerio d’Artegna, che, come che si sa, al è stât il fondadôr de Biblioteche di S. Denêl. Nodâr e espert in dirit, l’ilustradôr al jere jentrât inte confraternite dai Batûts, une vore ative in Friûl e a Udin in particolâr, tant di rapresentâ il cûr e la fonde di chel che al sarès deventât l’ospedâl citadin, ore presint dedicât ae Beade Vergjine dai Batûts. A lavoravin insiemi, i doi umaniscj; tantis a son lis notis segnadis di Baldana sui manuscrits di Varnîr. Salacor, a vivevin ducj i doi cun soference il lôr stât di canonics e in particolâr il celibât. I lôr fîs, ven a stâi Pasche di Varnîr e Zuan di Antoni, intal 1452 si sposarin metint sù famee e zontant ancjemò di plui il destin dai lôr gjenitôrs.
La man di Baldana e je rafinade, studiade, educade a lâi daûr a une vene artistiche ispirade e rare. I bastin pôcs trats, cualchi linie ben poiade su la pergamene par imbastî une storie. Tal nestri cas, nus pâr di lei ce che al è sucedût intal Concili di Cividât, dal 1409. In ducj i cuadris si viodin papis e cardinâi, imperadôrs e soldâts a contindisi la lôr Veretât: parsore di ducj, un svol di agnui e di diaui, che a businin intun cîl neri di fâ pôre. Fin cuant che e rive la Bestie, il Drâc che dut al glot e al consume.
di Agnul Floramo
