Angelo Covazzi,
“Jacum dai ‘zeis”
Udin 2004
“Fradi furlan / fermiti, bêf, / mangje il to / pan / cjale la tô plêf / cjante di cûr / vîf tôr il tei / pâs di sigûr / jemple il to / zei”.
In plui dal monument di Codroip, che al à da pît chestis peraulis (che a son ancje stadis metudis in musiche), i furlans a àn ancje un monument di cjarte par no dismenteâ Jacum Bonutti (1855-1921): un libri che al met dongje plui di otante contis e contutis de vite di Jacum o che lui al veve cjatadis cuissà dulà par contâlis ae int che al veve a ce fâ. E cheste int e jere tante, stant il mistîr che al faseve, vendi zeis, robe purcine e strafaniçs ator pai marcjâts de Furlanie. Personaç di chei di une volte, plen di morbin, di furbetât, di pevar su la lenghe e bulo intal tirâsi fûr des rognis che i capitavin. E la int e veve gust di comprâ li di lui, par vie che une biele ridade e jere simpri sigurade, cu lis sôs batudis prontis e picantis e cu lis sôs botonadis sarcastichis.
L’episodi de cjamese dal plevan e je une piçule opare mestre di ironie e di spirt, ma a son ancje tancj altris moments gustôs: lis tassis paiadis cul baston, la confession des dôs gjalinis robadis, la pinitince dal pelegrinaç cui fasûi tes çuculis (situazion che si cjatile ancje intes contis popolârs francesis), i imbroieçs par no paiâ il dazi, il fradi dal plevan, l’ûf di mus, il vin pes animis dal purgatori, la sûr e i parincj dal mus e v.i.: une miôr di chê altre. Une figure di furlan che i furlans a àn di tignîse ben strente.
A pagjine cuatri une viere fotografie nus mostre un om cun dôs mostacjonis e cjavei un pôc a sdavàs, sot di un cjapielat sul cjâf, un baston intune man e doi zeis sot dal braç: Jacum. I dissens a son di Claudia Covazzi e lis ilustrazions di Otto D’Angelo. Utilis lis pagjinis di notis che a furnissin la font par ognidune des contis.
Su la figure di Jacum al è ancje di segnalâ il curt metraç dal regjist David Calligaris (produzion Vildiv’art), che al è stât proietât in plui bandis dal Friûl. ❚
Laurin Zuan Nardin