La Associazion Orloiarie Pesarine e puarte i zovins al centri, tal non de famee Solari
I I orlois di Pesariis, chei che di cuasi tresinte agns a vegnin realizâts de innomenade famee Solari, a son il subiet di une ricercje profonde che e met insiemi la Val dal Timp, Gurize e la Mitteleurope. “Pesariis, Gurize: testemoneance di operositât e travuarts di ecelence inte orloiarie europeane” al è il titul dal progjet finanziât dal bant regjonâl culture umanistiche che la associazion di promozion sociâl Amîs de Orloiarie di Pesariis e à metût adun par cheste anualitât. Cun jê, cinc partners di progjet che si son cjatâts tal mês di Zenâr inte sede de Comunitât di mont de Cjargne, a Tumieç, intun incuintri public par sclarî lis resons des iniziativis che a àn decidût di fâ insiemi.
◆ Cheste iniziative, indreçade a dâ simpri plui valôr ai orlois de tradizion pesarine, e je puartade indenant dal Comun di Pesariis, de Comunitât di mont de Cjargne, de Universitât dal Friûl – in particolâr cul so laboratori Sasweb che al cjale al web semantic, adatîf e sociâl – di Friûl inovazion cu la sô gnove nomenclature Tec4I Fvg, e de Fondazion Coronini Cronberg.
◆ Tal incuintri di Tumieç, cuntune buine partecipazion e i salûts dal vicepresident e dal assessôr ae Culture e Sport de Regjon Friûl-Vignesie Julie, Mario Anzil, e dal sindic di Gurize Rodolfo Ziberna, a son stadis metudis in clâr lis iniziativis in cors di opare, che a pontin soredut a svicinâ la materie dal pont di viste interdissiplinâr e intersetoriâl, par comunicâ la orloiarie a nivel museâl ma no dome. Dut chest cuntun interès grant pai zovins, che si vuelin meti al centri dal sfuarç di divulgazion. Impuartante ancje la vision mitteleuropeane de orloiarie storiche, indulà che i Solari a son inovadôrs e grancj protagoniscj a nivel mondiâl. Che si pensi che tantis lôr oparis, come Cifra e Cifra 5, a son esponudis intune vore di museus tant che il MoMA di New York.
◆ Al è stât ancje il salût dal assessôr ae culture de Comunitât di mont de Cjargne Luigi Paglione, che al à marcât trop che cheste maestrie dute cjargnele e mereti la poie no dome di bande de comunitât dal lûc, ma ancje e soredut a nivel regjonâl e no dome, come che di fat al sta sucedint. La presidente de associazion pesarine Rosa Maria Solari e à po dopo incuadrât il progjet di un pont di viste strategjic e resonât cui partners. Daspò e je stade la volte dai intervents dai erêts dai orloiârs Solari, Alceo e Stefano Solari, che a àn presentât une relazion tecniche une vore interessante par dâ cont des ricercjis in vore, sedi di archivi che in relazion ai manufats sparniçâts ator pe Europe. Un sfuarç fat cun chê di misurâ trop che cheste famee cjargnele e à fat tal setôr de costruzion dai orlois mecanics, eletrics, eletromecanics, fin a rivâ ai orlois a “salt di cifris”, come chei che si viodin intai aeropuarts e intes stazions dai trens di dut il mont.
◆ La referente pe culture de Comunitât di mont de Cjargne, Elena Puntil, e à motivât l’interès dal ent aes iniziativis de associazion pesarine ancje pal progjet “Carnia 2030” e ae rêt “CarniaMusei”, viodint in chestis ativitâts un esempli concret di slargjament des utencis a ogni nivel, sedi di fate turistiche che didatiche e formative.
◆ La dotore Antonina Dattolo de Universitât dal Friûl e à dât cont dal lôr impegn tal comunicâ chest patrimoni aes gnovis gjenerazion, in maniere sedi sientifiche che umanistiche, doprant ancje i social par vê risultâts significatîfs. L’assessôr ae culture dal Comun di Pesariis, Gino Capellari, al à contât trop che, dal 2018 incà, la associazion dai Amîs de Orloiarie Pesarine e à fat ancje a poie dal Museu de Orloiarie di Pesariis, che ancje in graciis di cheste clape tal an a pene passât al à contât une incressite dal 16% tes utencis. L’assessôr al à rindût cont dal progjet “La Val dal Timp”, che al gjolt di contribûts dal Pnrr, une iniziative che e viôt ancje la partecipazion dal ent culturâl di Pesariis.
◆ Il referent di Tec4I Fvg Luigi Valan al à invezit contât alc dal bant su la creativitât risiervât aes scuelis superiôrs ISIS “Fermo Solari” di Tumieç, ISIS “Arturo Malignani” di Udin e IIS “Evangelista Torricelli” di Manià. I zovins students a son daûr a impegnâsi par puartâ, ancje midiant des gnovis tecnologjiis, novitâts in fat di tecniche e di design ispiradis dai modei di orlois Solari, fasint inovazion doprant la tradizion. In cont di chest al à puartât la sô testemoneance ancje il professôr Poreca dal ISIS Solari, presentant il lavôr fat fin cumò dai siei students.
◆ A son intervignudis ancje la referente dal Museu de Orloiarie Pesarine, Irene Cimenti, e Nicol Soravito de Associazion Nazionâl di Fameis e Personis cun disabilitâts inteletivis e disturps dal neurodisvilup (Anffas), fevelant dal interès, inserît tal progjet, par che il patrimoni orloiâr de famee Solari al sedi fruibil di ducj, cence distinzions di sorte. Sul finî al è intervignût il dotôr Franco Rota, par rindi cont de colaborazion di Pesariis cun Gurize in graciis dal partenariât cu la Fondazion Coronini Cronberg, anticipant une cunvigne che e si fasarà sul teme dal scambi di cognossincis in fat di orlois inte Mitteleurope vie pal Autun. Iniziativis concretis e fuartis chês menadis indenant de Associazion Orloiarie Pesarine, che “no viodìn la ore”, par restâ in teme, di viodi i risultâts des lôr prossimis ativitâts e ricercjis. ❚
