Sfuei Mensîl Furlan Indipendent
Archivi de Patrie

I Punks tal Friûl e la voie di fâ rumôr in non di P.P.P.*! *Punk Punk Punksolini!

Moira Pezzetta

«Parcè aial sens fâ rumôr vuê?» Cheste e je la domande che si è fat il dramaturc Alessandro Di Pauli, in ocasion dai 5 di Març, a cent agns de nassite di Pier Paolo Pasolini, l’inteletuâl plui scomut mai vût in Italie. Il Corsâr che nol è mai stât de bande des istituzions e dal podê.
◆ Cussì Di Pauli al à cjapât il drame pasolinian i Turcs tal Friûl, scrit tal 1943, e si è domandât cemût che cheste creazion e sarès vuê, se Pasolini le scrivès tal 2021. L’innomenât test I Turcs tal Friûl al conte in mût simbolic dal terôr fassist, metafore che e fas vignî fûr i dilemis di un popul ferît e indifindût. Cu la voie di ispirâsi a Pasolini par continuâ une critiche juste a dut ce che nol va in Friûl e in Italie, si concretize il progjet i Punks tal Friûl: un drame musicâl, ma soredut une propueste di incuintri musicâl e leterari tra grups punk di diviersis gjenerazions e divignincis.
◆ Di Pauli al à di fat vude la idee di proponi il progjet su Facebook, dulà che al à clamât dongje musiciscj, artiscj e bands cun la voie di fâ rumôr, scrivi musiche dant sbroc libar ae creativitât, cence vincui. I Punks tal Friûl al è un moviment e progjet artistic in divignî, che in dì di vuê al rapresente la voie di esprimisi e di fâ rumôr di une gjenerazion che no si rint denant des regulis sociâls rigjidis. Cuintri dai rûi definîts, des stradis simpri compagnis e des etichetis, ma cu la voie di vivi la proprie esperience e esistence. Sunâ, cjantâ, berghelâ, no dome par se stes, ma ancje par chei altris.
◆ Dal progjet e je nassude une comunitât rumorose che e à energjie e voie di cambiâ, che e je deventade un vêr e propri moviment artistic, definît “il Collettivo Punksolini”. Ducj i artiscj a àn di subit aderît al progjet e començât a lavorâ par fâ musiche ispirade da i Punks tal Friûl.
◆ «No si saressin mai spietâts une rispueste tant svelte e entusiaste» al conte Di Pauli «…in realtât al e stât come tirâ un clap intune poce. Lis bands che si son proponudis a son une divierse di chê altre, tant che divignince, etât, esperience. Dutis però a àn capît il nestri spont creatîf e lu àn rielaborât in musiche, cun dute la lôr anime. O soi ancje tant sodisfat che il progjet al vedi rivât a cjapâ lis esigjencis di tancj artiscj, che dopo mês di stop, no viodevin la ore di esprimisi.»
◆ Il coletîf Punksolini al sta cressint simpri di plui e pal moment al conte 16 tra grups e artiscj furlans, triestins e dal Venit. A son grups come i veterans “Mercenary God”, storiche band di Glemone che e fâs punk dai agns Setante, e come i venits “Magic Jukebox”, che a proponin sonoritâts old school, ma ancje i “Vomitiva”, band cun base a Udin ma musiciscj internazionâi e che a deviin tal trash metal e hardcore. E ancjemò i metalârs “Fanteria di prima linea” e i “Malfàs”, che invezit a definissin la lôr musiche “post-liscio”. A zontâsi aes bands tant che soliscj, Paola Selva, ghitariste acustiche, e Edi Toffoli aka Kermit, pionîr dal punk-new wave talian.
◆ Al apel a àn rispuindût ancje artiscj mancul veterans, come i “Haram”, musiciscj triestins cuintricorint e i zovanissims “Conte Manin” che a vuelin fâ rumôr tes classis dal lôr liceu. E ancjemò il “Collettivo Nebbioso”, che al fâs musiche ispirade ai dirits umans, i “Alba Caduca”, grup furlan atîf dai 2000 che al propon rock energjic, il doi punk rock “Dissociative Tv” di Ovâr, componût di Alessandro De Cecco e Jessica Bortoluzzi, e i infin i “Pervert Bug Spray”, band punk che e zuie su la ironie. Tancj a son i artiscj che a stan za preparant un toc par “I Punks tal Friûl”.
◆ Svincolât di dutis lis istituzions, il progjet al è libar e indipendent. Nol à un budget, no esist une jerarchie, e no son oblics e burocrazie.
◆ La iniziative e je gratuite e par ducj. Baste scrivi a info@alessandrodipauli.it o su la pagjine Facebook www.facebook.com/punksolini. Ca si puedin viodi i videos, seguî i artiscj e lis cjançons e si cjatin ancje lis ilustrazions a teme Punksolinian di Adriana Bardi e di Chiara Signorini Gremigni. ❚

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +