Cuant che si fevele di Patriarcjât di Aquilee, tal cûr di ogni furlan al varès di sclopâ un sintiment di passion par une ete gloriose e epiche, cuant che a nassin e si insaldin la nestre culture, la nestre lenghe, il caratar di un popul e la sô identitât. Al covente però cognossi la storie dal Friûl che, magari cussì no, la scuele no nus à insegnade par nuie. La nestre storie e veve il difiet di jessi masse pôc taliane e plui insuazade te Europe. Si che duncje miôr platâle. Nissune maravee, inalore, se cuant che si fevele dal Patriarcjât tancj di lôr a fasin un tic di confusion. No podìn cumò scrutinâ 17 secui di storie di cheste istituzion ma, in struc, o podìn sclarî il significât dai trê podês dai patriarcjis di Aquilee: chel di vescul, chel di metropolit e chel di duche.
Il vescul. Te grande citât di Aquilee si forme in curt une comunitât cristiane salde, che e à par prin vescul Ermacure e che, daûr lis scuviertis di pre Gjilbert Pressac, e je di divignince alessandrine. La comunitât e je cussì fuarte che e pant il vanzeli a soreli jevât ai slâfs e a tramontane ai gjermanics. Cussì i confins de diocesi a rivin al Donau e al lât Balaton fin al 811, cuant che l’imperadôr Carli il Grant al stabilìs il confin su la Drau. Par mil agns e je la plui grande diocesi de Europe. Dal 558, in polemiche cun Rome, il vescul di Aquilee al tache a dâsi il titul di “patriarcje”, unic in Ocident oltri al pape.
Il metropolit. Par antichitât e autoritât, il vescul patriarcje di Aquilee al è ancje metropolit, ven a stâi a cjâf di une provincie eclesiastiche une vore grande. Plui o mancul, sot de jurisdizion dal patriarcje a jerin Baviere, Austrie, Ongjarie ocidentâl, Slovenie e la Cravuazie a nord dal flum Save. Ancjemò tal secul XII e fin al 1751 i vescui sufraganis, val a dî dipendents in dut dal patriarcje, a son chei di Como, Mantue, Trent, Verone, Vicence, Padue, Trevîs, Concuardie, Cenede, Feltre, Belun, Triest, Pole/Pula, Parenzo/Porecˇ, Pedena/Pi´can, Cjaudistre/Koper e Cittanova/Novigrad. La provincie metropolitane di Aquilee e à une sô liturgjie, il rît patriarcjin, un so “credo”, une sô specificitât culturâl, musicâl e artistiche. Chestis diferencis a son il risultât des sieltis dotrinâls e politichis dai patriarcjis che a cirin simpri di distinguisi de glesie romane e di chê di Milan. Il patriarcje al convoche sinodis e concilis, al nomene e al judiche i vescui, e un (Indrì di Biburg tal 1080) al olse fintremai a deponi il pape.
Il duche. Par premiâ la fedeltât dai patriarcjis e pe colocazion strategjiche dal Friûl, l’imperadôr Indrì IV ai 3 di Avrîl dal 1077 al da al patriarcje Sigjeart la invistidure di duche dal Friûl e, po dopo, de Istrie, dal Cjadovri e di parts de Carinzie, dal Staiar e dal Cragn. I patriarcjis, di in chê volte, a zontin a chê religjose la sovranitât politiche su la Patrie dal Friûl, stât feudâl ma cun fuarte autonomie. O podìn ancjemò figurâsi chel timp, cuant che il Friûl al decideve il so destin tal Parlament de Patrie, il plui antîc de Europe. Tal 1420 Vignesie, par colpe des divisions dai sorestants furlans, e rive a concuistà la Patrie. Il patriarcje duncje al piert il podê politic e al manten chel religjôs fin al 1751, cuant che il pape Benedet XIV al sdrume di fonde fûr une sente patriarcjâl antighe come la sô e al istituìs lis arcidiocesis di Udin e di Gurize. ❚
Diego Navarria
