Il bosc: lassâlu cressi di bessôl o ben metilu a pro?

Il bosc nol è dome un magazen impuartant di CO2. Al è ancje une fonde di biodiversitât, in plui che di materiis primis, ma ancje chel al ven petât par dret dai mudaments dal clime. Par chest il dibatit dentri de comission europeane su cemût doprâlu in futûr al è cetant vivarôs: a pet di chei che a pensin a un disfrutament dai vantaçs, a son chei che a volaressin lassâlu cressi in mût naturâl. Une des propuestis e dîs che la cuistion e je che di taiâ i arbui dome par doprâ il legnam pes costruzions e pes mobiliis, ma a disconciertin di plui chei che a pensin a un premi ai parons, tant che risarciment, par che no tocjin il bosc. Jenfri lis fuarcis politichis al travane ancje un conflit di obietîfs: saressino in pericul puescj di lavôr, proprietât, ambient? Cun di fat, se no si puedin disfrutâ i boscs al sarès ae fin un espropri di fat. Cun di lui, dal pont di viste ecologjic nol varès masse sens, stant che i arbui zovins, cul cressi, a supin CO2, intant che chei che a murin le molin fûr. Se il legnam al ven doprât, impen, massime se par prodots che a durin a lunc, si varès di consecuence une cierte protezion ambientâl. Cun di plui, se no si podarà doprâ il legnam locâl, si scugnarà fâlu vignî dal forest.
◆ Chei che a metin i vantaçs ecologjics denant di dut le pensin diferente. Chescj a disin che un bosc al naturâl al ten dentri plui aghe, si riscjalde di mancul e al da acet a cetantis plui speciis.
◆ Di là di chescj mûts di pensâ diferents al salte fûr dut câs che i boscs a son in dificoltât. Cun di fat, a son cjapâts dentri de crisi dal clime e di un sut simpri plui fuart, fats che ju puartin viers une muart progressive. Si scugnarà alore rangjâ il sisteme plantant speciis plui adatis al clime mudât. Di prionte, al sarà miôr passâ di boscs monospecie a boscs plurispeciis, che a garantissin une sorevivence intal câs di une infezion di parasits. Po dopo, stant che ancje il teren al ten dentri CO2, bisugne passâ dal tai di grandis areis – tecniche avonde solite in Austrie – ae sielte di singui arbui di tirâ jù, che cussì il teren nol larès in soference.
◆ Ben clâr che ancje la industrie dal legnam e à di dî la sô. Il presit al è tor i 80/90 euros al cubic e al è cuasi fer dai agns Setante. Par garantî un ciert vuadagn al varès di lâ almancul a 200 euros. Si che duncje, par cumò i boscs a son sistemis di invistiment, dal moment che no sigurin cuissà ce reons. Di chê altre bande, a dan une suaze “verde”.
◆ I boscs a son di interès des impresis ancje par vie che a compensin il lôr belanç di CO2, stant che di cualchi an si fâs cumierç ancje di cheste. Propit par chest, la domande di comprâ boscs e je plui grande de ufierte: il presit corint al è sui doi euros al metri cuadrât, diferent ca e là daûr des cundizions, sicu il teren, la vegjetazion, la viertidure ae cjace e v.i. ❚