Intes setemanis passadis al è vignût fûr in rêt un post triestin là che tra i viers che si puedin sintî intal cjasâl dai animâi al jere ancje il nestri cjâr “mandi”. Al podarès someâ a prime viste nuie di gnûf intal scambi continui di “cortesiis”, ancje becantis, tra i doi contendents. Però, cheste figurazion e rapresente alc di plui, parcè che, in fonts, e identifiche intal mont rurâl, intes lidrîs contadinis dal nestri popul, inte ruspiosetât dal so aparî, la vere essence de vision tradizionâl che a àn di nô inte citât juliane.
✽✽ A dî dute la veretât, no si dislontanin tant di leterâts ben plui cuotâts, tant che chel Dante che di nô al veve la stesse concezion: contadins volgârs, cuasi barbars, devant de societât civîl di cort. Il vate al scriveve in rime, i “muli” a doprin facebook: a cambiin i struments, ma no la sostance.
✽✽ Di là duncje des aparencis, cualsisedi moviment che si riclami ai valôrs de autonomie e de autodeterminazion dal Friûl, al è obleât a fâ i conts cun cheste mentalitât. O dîs obleât, parcè che o fasaressin vulintîr di mancul, ma lis cundizions storichis e gjeopolitichis a àn puartât a zontâ chê code costiere a di une Regjon che e veve di bessole dutis lis carateristichis par jessi calcolade une tiere buine e degne di aministrâsi in maniere autonome.
✽✽ Cheste duncje la situazion presinte, là che propit la autonomie furlane si drece a uniche difensore di chê specialitât metude sot atac dal stât centralist, des provis di trivenitizazion in vore, in definitive dal progjet di anulament de stesse forme istituzionâl che o sin daûr a usufruî. Parcè unics? Pal motîf sempliç che Triest no à interès particolâr in chest scuintri, podint contâ, ancje ca in sens storic, suntun rapuart favorît cu la Italie, e intai ultins timps ancje cuntun futûr disvilup, cence tignî cont de esistence de Regjon.
✽✽ O sin daûr a sopuartâ un pês no indiferent, come se o fossin daûr a scjalâ une mont in biciclete e nissun no nus des il cambi o la buracje. Parcè lu fasìno? La rispueste politiche e je semplice: e podarès lâ piês e o podaressin cjatâsi cul anulament des formis di autoguvier di cumò, e di consecuence cence struments par meti in vore ancje lis riformis minimis che a coventin al disvilup di cheste Regjon.
✽✽ O vin fate une scomesse in chest sens, ma nol è dit che e sedi chê vincidore. Par savê cui che al varà reson al covente, come par dutis lis garis, spietâ i risultâts e sperâ che l’arbitri nol vendi la partide. Al vûl dî vigjilâ su ogni azion di zûc par capî se cheste nestre volontât unitarie e vegni rispietade, se lis sieltis fatis a van inte direzion juste o se a son ancjemò une volte la enesime cjapade pal boro dai interès furlans.
Se o sin il “teritori di campagne” o no. ❚
Dree Valcic