Un dai slogans plui doprâts dal Ent turistic de Slovenie par fâ cognossi il paîs tal forest al è “Slovenija, zeleno srce Evrope” (“Slovenie, cûr vert de Europe”), ancje se di cualchi mês in ca si è zontât “I FEEL sLOVEnia” (viôt chel altri articul te pagjine). Al è facil capî il parcè: sui 20 mil 273 chilometris cuadrâts di superficie, juste la metât (10 mil 124) a son cuvierts di boscs. Un “cûr vert” magari piçul chel de Slovenie, ma che al ven protezût cun cetante atenzion a nivel statâl (lait a viodi par crodi). A prove di chest il parc nazionâl dal Triglav, che tancj Furlans a cognossin ben: scuasi 84 mil etars (840 chilometris cuadrâts) a pene di là dai 232 km dal nestri confin a Soreli Jevât. L’an che al ven al colarà il centesim aniversari de idee di fonde par creâlu, ma il parc al nassè dome tal 1924. Il Triglav, che al cjape il non de sô fate che e fâs sovignî trê cuars, al è un dai simbui de Slovenie, ancje par vie che e je la mont plui alte dal paîs cui siei 2864 metris. Dentri tal parc si cjate ancje il lât di Bohinj, li che la temperature de aghe e reste une vore basse ancje in Istât (ma fâ il bagn al è un plasê). Di no pierdi ancje i plusôrs salts di aghe che si puedin rimirâ. Apene fur dai confins dal parc dal Triglav e je Kranjska Gora, innomenade localitât par schiâ che di 46 agns in ca e dà acet ae Cope del mont di schi feminin ogni prin fin di setemane di Març. Di no dismenteâ il maraveôs lât di Bled, une zoie framieç des monts, e il Lusinç, une striche di aghe simpri glaçade li che i colôrs a van dal blu al vert. Tai ultins agns si è vude une fuarte cressite di sports tant che rafting e canoe. Al è dal 1147 il prin document scrit, rivât fin a noaltris, li che si fevele di termis inte Slovenie dal dì di vuê. Si trate des termis di Roga?ka Slatina, inmò une vore innomenadis. In dut il paîs la sielte e je grandonone, cun almancul 15 centris pal benstâ logâts soredut te part orientâl, di là di Lubiane. E il numar dai ospits forescj al cres an dopo an (soredut Todescs e Austriacs). La Slovenie e met il music sul mâr Adriatic dome par 46 chilometris, ma la cueste, ancje se curte, e je un tesaur. Ai timps dal Imperi roman in face dal mâr a jerin cetantis vilis di lus dai siôrs di chê volte; ator ator vignâi e ulîfs di cualitât (vin e vueli a vignivin espuartâts in buine part dal Mediterani, tacant di Rome). La citât plui impuartante e je Cjaudistrie, che no par nuie si clame cussì (Capodistria par talian, Koper par sloven). Cjaudistrie, li che si cjate la glesie plui grande di dute la Istrie (il domo de citât), cumò e à un puart simpri plui di pês pal trafic dal nord Adriatic. Isule e Piran invezit a pontin dut sul turisim dal mâr, cun bielis rasulis. Ma la destinazion principâl di chest turisim e je Portoroz/Portorose, cun cetancj albiercs e casinò che a clamin int di dute Europe. Di viodi ancje lis citâts: nissune masse grande, infur di Lubiane, ma di sigûr deliziosis. La capitâl (270 mil abitants) e à un biel centri storic, cul Cjiscjel e i innomenâts Trê puints dal architet Pleznik sul flum Ljubljanica. Jenfri chês altris citâts, une des plui bielis e je Celje (la antighe Kelea celtiche e Civitas Celeia romane). Po Maribor, la seconde par numar di abitants (110 mil), e Kranj. Daspò de indipendence dal 1991 il turisim in Slovenie al è in cressite. Graziis a cheste ufierte (monts, mâr, termis, la bielece des citâts, il bon mangjâ) l’an passât a son rivâts in Slovenie scuasi doi milions e mieç di turiscj (+2% rispiet al 2005). Par plui di metât si trate di forescj (jenfri chescj i Talians a son il 20%, i Austriacs il 15% e i Todescs il 14%).
__________________________________________
Un paîs di “amâ”
No dome “cûr vert de Europe”. Tal Novembar 2006 il guvier sloven al à mandât fur un gnûf slogan par sostignî il turisim dal paîs nestri confinant: “I FEEL sLOVEnia”, che par sloven si volte “Cutim Slovenijo” (“O sint la Slovenie”). La volontât dal guvier e je chê di sotliniâ il zûc di peraulis te lenghe inglese, a prove dal fat che la Slovenie al è l’unic paîs al mont a vê dentri dal so non la peraule “love” (“amôr”). Cul gnûf slogan al è jessût ancje un logo blu, ros e blanc cul stamp dal profîl de mont Triglav e di une fuee di tei (ducj e doi simbui dal paîs) mitûts adun te suaze di un cûr.
