Udin, ai 14 di Març dal 1421. Tal scûr de cele, prime dal cricâ dal dì, Pieri al sint vuicâ la clâf te sieradure, e la puarte penze di rôl si vierç ciulant sui cancars. Dôs vuardiis a strissinin dentri un om dut sanganât. Lu molin jù tal pedrât sparniçât di stran; la puarte si siere, sbatude cence creance, e la clâf e torne a vuicâ. “Cui sêstu – al domande Pieri – ce ti àno fat?” Ma il puar disgraciât al rive a pene a respirâ. Pieri al cjape la boce de aghe e i nete la muse cuntun peçot. In chel, e jentre une spere di lûs framieç dal gatar de piçule e alte barconete, e Pieri al rive a viodi il so gnûf compagn di preson. Al è avonde zovin, fuart, vistût di siôr e cuntune biele muse, se no fos dute macolade di pachis. “O soi Marc di Darcjan Disore, siôr di Morùs – al rive a dî cuntun fîl di vôs – puartebandiere dal patriarcje. E tu?” “Jo o soi Pieri. A Praclûs mi cognossin par Pieri falope, parcè che a disin che o conti sflocjis. Mi àn becât a robâ un sac di farine ai venezians, e chei mi àn metût in preson. Ma tu tu âs di vêle cumbinade gruesse, par cuinçâti cussì, no mo?” Marc si tire un pôc sù e al glot un pocje di aghe. De barconete e jentre plui lûs. Nol rive a stâ in pîts. “Pieri, tu tal zîr di pôc tu sarâs libar, ma jo no vignarai fûr vîf dal cjistiel di Udin.” “Cuale ise la acuse?” i domande Pieri. “A son trê agns che o scombat cul patriarcje Luduì cuintri dai venezians. Un vuere dure, triste, cun tancj tradiments, come chel dal Savorgnan, chel ludro! O dai siôrs di Çuc e Cucagne che a vuelin strafuîmi il cjistiel!” “Marc, o vin patît ducj la vuere, se di no lavio a robâ farine? Ma cumò – al zonte Pieri – a àn vinçût i venezians, a comandin lôr! Ce fâ scombati ancjemò?” “Vere, a àn vinçût… Dutis lis comunitâts si son rindudis, par pôre. Scuasit ducj i siôrs, come cunins, a àn fat at di dedizion a Vignesie. Ma jo e altris no si sin rindûts e o spietin che Nicolùs di Prate, che al è in Ongjarie cul patriarcje, al torni cuntun esercit par liberâ la Patrie.” “Marc, tu pues jessi gno fi. Scoltimi. Acete lis cundizions dai venezians e dopo, di libar, scjampe o fâs ce tu vûs. Chei chi ti copin!” “Scoltimi tu, Pieri. Îr mi àn puartât devant dal Lutignint venezian Mocenigo. Te sale grande di chest cjistiel. Al jere su la sente dal patriarcje, che dome chel mi à fat vignî sù la fote. Mi à dit chel che tu âs dit tu cumò: “Che la fassa dedixion a la Serenissima Republica e il Doxe ghe tornarà la libertà e anca il so castel de Morusso.” “E tu, ce i âstu rispuindût?” “Jo i ai dit che la mê nobile famee Darcjan a son secui che e à l’onôr, il dirit e il dovê di puartâ la bandiere de Patrie devant dal patriarcje; che ancje te steme de mê famee e je piturade la acuile di aur tal cîl turchin. Daspò o ai zontât – a Marc si ingrope la vôs – che cun cheste man che e à puartade la bandiere de Patrie dal Friûl mi soi segnât cu la crôs cuant che o ai zurât fedeltât al patriarcje!” “Ce sclet, fi. Ma masse franc. Ti coparan sigûr. E lui?” “Lui mi à dit che mi concedeve di confessâmi e di fâ testament. Al predi o ai dit che o vûl jessi soterât te glesie di S. Tomâs di Morùs, dongje dai miei. E dopo, il Mocenigo i à dit al cjapitani, sot vôs: “Faseghe gambià idea, come che savè far voialtri.” Mi àn torturât dute la gnot: un infier. Ma jo no moli. Che mi copin!” Marc al tache a sfladassâ e al stente a fevelâ. In curt, i monte sù une fiere di cjaval. “I àn rot lis cuestis, chei bastarts!” – al pense Pieri, e dopo – “bêf ancjemò une gote di aghe.” – “Ah, viodût che no mi soi rindût – al zonte cu la vôs simpri plui debile – mi àn dit che doman mi fasin un procès, cence di me, e sâstu parcè? Parcè che o varès dât acet a Morùs a un che al bateve monedis falsis! A àn cjatât un test fals par condanâmi… e no parcè che o soi fedêl al patriarcje ma come falsari. Bausârs! Ma tu, cuant che tu larâs fûr, cîr gno fi Pileu e contii la veretât. Che al sepi che so pari al è muart cun onôr e no di lari! Contilu…”
◆ Daspò cuatri dîs, il Lutignint Morosini al è preocupât. Il Senât i à scrit che a son moviments in Ongjarie e che al covente scjafoiâ lis ultimis resistencis furlanis cuintri Vignesie. “Capitano – al clame – domani la xe de eseguir la sentenza contro Marco de Morusso!” “Ma, Lustrissimo, il prisoniero ga perduo cossienza e xe drio morire…” “Domàn, go dito, ghe se taglia la testa in piassa, ordine del Serenissimo Senato! Dopo dovè cercà so fio Pileo. El gà de sparire anca lu.”
◆ Pieri al sint la sieradure vuicâ. I cancars a ciulin e il cjapitani, stant su la puarte, al tache a lei a vôs fuarte la sentence di condane a muart di Marc di Morùs tant che falsari. “Ma – al berle Pieri – No viodêso che al è plui muart che vîf. A son doi dîs che al à pierdût il sintiment!” “Tasi, furlano, che tanto no si capise come che parlé – e al zonte – Domàn ghe taiemo la zuca.”
◆ Ai 19 di Març dal 1421. A buinore, Pieri al sint i cerclis des ruedis de carete che a sfracain i claps te rive dal cjistiel. I tambûrs no rivin a taponâ chel sgrisul di sunôr nereôs. Parsore al è Marc, aromai cadavar. A colp, i tambûrs a tasin. Il cidinôr al va indenant a dilunc, çoncjât dal colp sec de manarie dal boie sul çoc. I rive un murmui, un sunsûr sudizionôs de int e i scjampe une blesteme, mudade daurman intun recuie par chel puar zovin. “A pene che o jes di cheste scjaipule o cirarai so fi: jal ai prometût!” ❚
::::::::::::::::::::::::::::::::::::::::::::::::::::::::::::::::::::::::
Il spieli dai furlans che no si rindin mai
Par solit, la fin dal Stât feudâl de Patrie dal Friûl e ven motivade cu la gole che e faseve a dutis lis potencis confinantis e cu lis divisions internis che le àn indebilide. Al somearès che Vignesie le vedi vude facile a glotile. Tra il 1419 e il 1420 lis cronichis a ripuartin dute un schirie di comunitâts che a fasin at di dedizion ae Serenissime e di nobii che a zurin fedeltât al Dôs. Ma la storie, come simpri, le scrîf cui che al à vinçût che, par solit, al loghe e al tâs dut ce che no i comude. Nus sarès cussì rivade une storie cuvierte di fumate che no permet di viodi ce che al è capitât pardabon in chel timp. Di bon che ogni tant achì e svinte la buere, la fumate si sfante e alore si rive ancje a viodi che la Patrie e à scombatût une vore cuintri dai venezians. Si à za fevelât de bataie dal Bant ma al coventarès cirì e studiâ di plui chê vuere ingredeade e la resistence patriarchine.
◆ Marc di Murùs al è un personaç simbolic di chê resistence. Fi di Pileu di Darcjan e siôr di Murùs, Marc al è l’ultin puartebandiere dal secolâr Stât patriarcjin. No si rint cuant che i venezians i puartin vie il cjistiel, no si rint cuant che ancje Udin al vierç lis puartis ai venezians. Ma al va dilunc a scombati, cun Marsili di Carare e cul esercit ongjarês mandât dal patriarcje Luduì di Teck.
◆ Cuant che i venezians lu cjapin, la sô fin e je segnade. Lu metin in preson tal cjistiel di Udin, al ven acusât di vê dât acet a un falsificadôr di monedis. Ai 19 di Març dal 1421 al ven decapitât in place. Ma a tain il cjâf a un muart in preson! Ogni an, ai 19 di Març, la Academie dal Friûl e poie un mac di rosis tal gatar de barconete des presons dal cjistiel di Udin al ultin puartebandiere dal Friûl indipendent. Ancje so fi Pileu, dopo di chê volte, al disparìs e di lui no si savarà plui nuie. Scjampât o fat fûr parcè che al jere fi un personaç masse ledrôs e scomut?
◆ La Patrie dal Friûl, chest sfuei mensîl indipendent al è stât definît “Gjornâl dai furlans che no si rindin”. Po ben, Marc di Murùs al è juste l’archetip, il spieli dai furlans che no si rindin. Mai. ❚
