Il cjapitani dai Madracs di hockey su carocine eletriche al ponte a vinci dut
Forsit no ducj a san che la plui fuarte scuadre di hockey su carocine eletriche in Italie e je une formazion furlane, nassude a Udin dodis agns indaûr. Un grup di amîs, partîts des categoriis plui bassis, al à rivât a rimpinâsi in serie A1 e a bati, intal mês di Març, la scuadre di Vignesie. E se, fin a doi mês indaûr, e jere propit cheste ca la miôr formazion in Italie, cumò i favorîts par vinci il scudet a son invezit i furlans, sburtâts ancje dai goi dal lôr cjapitani, Claudio Comino.
L’atlete di Tresesin, sorenomenât “il Bomber” o “il Divin Comino”, al è un zuiadôr ancje de Nazionâl taliane: al à vinçût il Campionât mondiâl intal 2018 e cumò al à voie di tornâ a vinci il titul di campion dal mont, zontant il titul talian. E no dome: al à tacât a zuiâ di burelis, cun chê di lâ aes Olimpiadis di Parîs dal 2024.
__
Parcè âstu sielzût propit l’hockey su carocine eletriche?
“Intal 2010, miei amîs a vevin tirade sù la associazion sportive dai Madracs e a vevin tacât juste cheste ativitât par fâ sport. Passâts trê agns, si sin cjatâts ducj al stadi Friûl par viodi une partide di balon dal Udin, come che si faseve dispès. In chê ocasion, mi àn proponût di provâ. Mi soi inamorât a colp, ancje parcè mi à plasût subit e mi soi butât a plen inte gnove aventure. Disìn che, a contâle dute e cjalant i risultâts là che o soi rivât daspò, chê decision di scomençâ cul hockey e je stade chê juste”.
__
Sielte juste ancje parcè che, daurman, tu âs fat viodi un biel snait.
“Pardabon, si viôt che o soi puartât par cheste ativitât. Cun di plui, si scuen dî che, massime sul imprin, mi soi alenât une vore a cjase, di bessôl, fieste e dîs di vore, cun tante determinazion, par jessi il plui pussibil competitîf. Tai agns dopo o ai vude la fortune di cjatâ int che e à crodût in me, ancje inte scuadre de Nazionâl, indulà che o ai imparât une vore”.
__
In struc, la persone juste, intal puest just, intal moment just.
“O cirivi di tant timp un sport di scuadre par fâ ativitât. No cognossevi nuie dal hockey e, par fortune, cumò al è une part de mê vite”.
__
Fevelant de tô cundizion, ce isal sucedût?
“O soi vignût al mont cuntune malatie che si clame “osteogjenesi imperfete”, une malatie dai vues. O ai vues une vore crevadiçs, che no si son svilupâts ben e, par chest motîf, o ai spes tantis fraturis”.
__
Dut câs, si scuen dî che la fuarce dai tiei vues e je di proporzionâl in maniere invierse ae tô determinazion: no tu ti sês mai rindût.
“Rindisi mai. Ancje cuant che o jeri frutut, cundut che no rivavi a fâ tantis robis, o cirivi dut câs di fâlis istès. Daspò, mi spacavi alc, o stavi fer un mês e, ae fin, o tornavi a fâ chel di prime”.
__
Vierzìn un barcon sul hockey. Si à di dî che la cressite dai Madracs intai ultins agns e je stade di no crodi. De serie A2, o sês rivâts in A1, daspò o vês batude Vignesie e cumò o sês la scuadre favoride par vinci il Scudet, ae fin dal mês di Mai, a Lignan.
“Chest an, cuant che biadelore o vin batude pe prime volte Vignesie, o soi sigûr che o vin zuiade la miôr partide de nestre storie. No vin cjapâts goi, o sin stâts cetant atents e o vin fat pardabon pôcs erôrs. Un 3 a 0 sec che nus à dade cetante sodisfazion e, cun di plui, ancje la cualificazion ai play-off pal scudet”.
__
Parcè la int ti clamie “Bomber”?
“Parcè che o ai segnâts un pôcs di goi inte mê cariere. Cuant che agns indaûr si contavin i goi e e jere une classifiche di pueste, in serie A2 o ai vinçût il titul di miôr canonîr dal campionât. Par rivâ a chel, mi jude il fat che o zui intune part specifiche: o soi un regjist intal cjamp di zûc e o soi un dai zuiadôrs che a doprin la mace”.
__
A contâle juste, tu âs doi sorenons: “Bomber” e “Divin Comino”. Cuâl isal chel miôr par te?
“ “Bomber” a son une vore tancj che al è, “Divin Comino” al è un pôc plui origjinâl. Timps indaûr, Roberto Baggio al jere il “Divin Codino” e al segnave goi a sbreghebalon, e il gno sorenon al è rivât di li. Mi plâs une vore”.
__
Conte il moment miôr e il moment piês de tô storie cui Madracs.
“La miôr robe, fin cumò, e je stade la promozion in serie A1: impussibil dismenteâsi. Il plui brut, dal sigûr, cuant che al è muart Alessio Moro, il nestri compagn di scuadre e amì”.
__
Cjapitul scuadre nazionâl taliane. Di fat, al prin colp tu âs cjapât il titul di Campion dal mont.
“No al prin colp, al secont, ma la sodisfazion e je state tante, compagn. O vin simpri crodût di vê la pussibilitât di vinci, ma di chê altre bande la strade par rivâ a vinci un mondiâl a cjase nestre, a Lignan, e jere dut câs une vore lungje. Invezit, le vin petade. Bati scuadris tant che la Olande, la Svuizare, la Gjermanie nol è stât facil. In finâl, o vin vude la fortune di cjatâsi denant la Danimarcje, aversarie plui maleabile, plui che la Olande (batude dai danês in semifinâl, ndr). A contâle dute, al someave che o ves cirût di fâ di dut par no vincile, sbaliant un pâr di tîrs di rigôr, il prin intai timps regolamentârs, il secont inte lotarie finâl, ma tal ultin o ai gjoldût une vore”.
__
Si ricuardìn ducj che su lis tribunis dal Palaç dal sport dal Bella Italia Efa Village di Lignan, cjalant la finâl mondiâl Italie cuintri Danimarcje, si sintive a cisicâ e e jere tante preocupazion cuant che la int ti à viodût lâ a tirâ il rigôr: le âstu sintude ancje tu? “Sante scugne! Trai un tîr di rigôr, intune finâl mondiâl e je une responsabilitât e une pression che si sintin une vore. Par altri, ancje cui tîrs di rigôr des partidis prime no jeri lât tant ben. Par dîti une, i miei parincj, in tribune, si son zirâts di chê altre bande, par no viodimi intal moment che o soi lât a tirâ. Sul moment, cuant che l’alenadôr (Saul Vadalà, che daspò al è deventât par un toc ancje il tecnic dai Madracs, ndr) mi à dite di lâ a tirâ i rigôrs, o soi restât un tic sbarlufît, ma lui mi à dite che si fidave di me. Ben lui, ma no jo! Cun di fat, o ai sbaliât. Dut câs, daspò dal mondiâl o ai fat cetant alenament sui rigôr e, divueli, cumò e va miôr”.
__
Sù mo… Il Divin Codino Roberto Baggio al à sbaliât il tîr di rigôr inte finâl dal mondiâl di balon dal 1994 e la Italie e à pierdût. Il Divin Comino al à sbaliât il tîr di rigôr inte finâl dal mondiâl di hockey su la carocine eletriche e, dut câs, al à vinçût.
“Tu âs reson, ma dome se si fevele dal mondiâl. Par dut il rest, Roby Baggio al reste un idul e un dai miôr zuiadôrs de storie dal balon di ducj i timps”.
__
Il to sium?
“Il “Triplete”: il scudet cui Madracs, il mondiâl cu la Italie e la cualificazion aes Olimpiadis di Parîs dal 2024 cu la scuadre des burelis”. ❚
……………………………………………………………………………………………………………………………
Le gnove cariere di Claudio: lis burelis. Il “Bomber” de Nazionâl di Hockey si è butât intune ativitât divierse
Une novitât dai ultins timps par Claudio Comino a son lis burelis. E il zuiadôr di Tresesin nus conte la sô sielte.
“Mi è vignût fûr il sbisiament di lâ aes Olimpiadis. L’hockey su carocine eletriche nol è tra lis ativitâts dal program olimpic e, dal moment che o cognossevi la scuadre di Spilimberc, o ai tacât a fâ alenament cun lôr. Al è bielzà cualchi mês che o soi daûr a zuiâ di burelis. No podìn dî che al sedi stât un amôr a prime viste come cul hockey, dut câs o cîr di lâ indenant. Parîs 2024 al è deventât, divueli, il gno gnûf obietîf”.
Âstu intenzion di molâ i Madracs e daspò zuiâ dome di burelis?
“O varai di resonâ une vore ben, ma o pensi di rivâ a fâ dutis dôs lis robis”.
Stant che tu sês un “Bomber” di raze, i tifôs e soredut lis tifosis a varan un voli di atenzion par te…
“Mah… lis mês tifosis a son za dutis in pension!”❚
…………………………………………………………………………………………………………………………
Alessio Moro: un amì simpri intal cûr. Il ricuart di un Madrac che nol zuie plui e, dut câs, al è simpri presint
“Alessio – al conte Claudio – al jere un nestri compagn e amì, un Madrac dal principi, un che al veve il cûr piturât di neri e di vert, i nestris colôrs. Al jere une vore professionâl, atent e precîs in dut. Un grant esempli par ducj, sedi sul cjamp di zûc che fûr. Nus mancje pardabon ancjemò vuê”.
◆ Il zuiadôr di San Zorç di Noiâr al è muart intal 2018, e ducj i Madracs lu puartin tal cûr.
◆ “Dal sigûr, se o rivarìn a tacâ il scudet tricolôr su la maiute, al sarà un sucès dedicât a lui. Ti conti un segret: sot de mê maiute, ogni partide che o zui, o ai simpri chê di Alessio. Sô mari mi à regalât la sô monture e jo la met sù in dutis lis ocasions. Lui nus vuide ancjemò vuê, stant là parsore”. ❚
