Il Grant Dizionari Bilengâl talian-furlan (GDBtf) al è a puartade di Iphone, Ipad, tablet e smartphone. In graciis di une gnove aplicazion volude de ARLeF (Agjenzie Regjonâl pe Lenghe Furlane) e disvilupade dal CLAAP (Centri di Linguistiche Aplicade Agnul Pitane) si podarà consultâlu no plui dome su cjarte, cd o computer, ma ancje cui struments tecnologjics mobii iOS e Android.
La App si pues discjamâle a gratis. Cussì, a puartade di man, e je la pussibilitât par ducj di vê un acès diret ai miârs di peraulis. E je stade rinovade ancje la grafiche, cun chê di permeti une leture plui semplice e svelte.
La fruizion dal GDBtf midiant de App e deventarà plui pronte cul doprâle: plui che si lu consulte e plui il program si sveltìs, stant che al memorize ducj i lemis cirûts.
Cu la App si varan ancje inzornaments e informazions su lis ativitâts de ARLeF.
La App e je stade presentade a Udin cui intervents dal president de ARLeF, Lorenzo Fabbro, dal president dal CLAAP, Luca Peresson, e dal president de Comission culture dal Consei regjonâl, Vincenzo Martines.
Tal so intervent Fabbro al à marcât che «Lis lenghis si evolvin, tant che la societât contemporanie, e ancje i struments linguistics a scuegnin par necessitât stâ al pas cui cambiaments e cu lis dibisugnis gnovis che a saltin fûr».
Martines al à ricuardât che propit lis minorancis linguistichis e la lôr tutele a son une des fondis de autonomie speciâl de Regjon.
Par Peresson «Cun cheste app il furlan al è ancjemò plui dongje de int, compagn di dutis chês altris lenghis dal mont». Par chel, al à zontât, «events di cheste fate, pluitost che jessi “celebrâts”, a varessin di jessi calcolâts un fat normâl». ❚
✒ Marco Stolfo