Tal mont globalizât di vuê al sarès impuartant, necessari, indispensabil che ogni realtât, ancje la plui minude, e vedi il so spazi, la sô dignitât. Si use fevelâ di Glocal, par intindi che globâl e locâl a àn di convivi in maniere armoniose. Cognossi se e cognossi chei altris, stimâsi se e stimâ chei altris. Nissune persone, nissun popul nol à dut e nissun nol à nuie, ma ducj a àn alc di ricevi e di dâ. Il pericul di vuê al è che il piçul al vegni fruçât in non di logjichis disumanis e disastrosis dai grancj.
pre Roman Michelot
La seconde domande che e fâs la Bibie e je tal cjapitul cuatri de Gjenesi: «Dulà isal to fradi?». Parcè che l’om nol è bessôl: dulà isal to fradi, dulà sono chei altris oms, dulà sono chei altris popui, cemût ju incuintristu? Parcè che no soi jo bessôl, nol è il Friûl “ombelicus mundi”, nol è il furlan il top dal top dal top, al è un che al à une sô identitât, ma al à di rapuartâsi cun altre int, cun altris culturis, cun altris storiis, cun altris musis.
Al è impuartant cognossi se stes e ancje cognossi chei altris, e duncje: «Adam, dulà sêstu e dulà isal to fradi?», ven a stâi al è impuartant cirî te stes e cirî to fradi.
Plui tu ti cjatis te e plui tu puedis frontâ cence pôre to fradi, plui tu ciris to fradi e plui ti ven gole di cognossiti te.
Partant, la pôre dai neris o dai zâi e je la pôre dai stupits, e je la pôre dai ignorants, e je la pôre di chei che a rinunziin a vivi.
Cambiìn almancul semence… tu tu mi dâs cudumars, jo ti doi coçuts, chest al è il marcjât dal mont, se o vin ducj cudumars no podìn fâ cumierç, o podìn dome mangjâju o mangjâ ongulis. Alore, la globalizazion e vûl dî: sul marcjât dal mont podìno jentrâ a competi, a comprâ, e no a jessi comprâts? Par comprâ o ai di jessi diferent, o ai di vê un prodot gno, o ai di vê un alc che chei altris no àn e alore o compri di chei altris ce che mi mancje. Il marcjât di vuê al è tragjic. I popui piçui no son a vendi, a son sul plat o su la belance. La globalizazion e je une grande robe se e permet a ducj i popui di podê partecipâ sul marcjât dal mont cul lôr barachin a vendi ducj compagns, alore si scambiisi. Ma se jo o ai di lâ dome a comprâ ce che a vuelin lôr, al presit che a vuelin lôr, alore ce marcjât isal? O dîs marcjât, al pues jessi la lenghe, la culture, la religjon. ❚
(5, al va indevant)
pre Antoni Beline