IL FERÂL. A 40 agns dal taramot…

Un toc de predicje di pre Checo a la fieste dai sants Ermacore e Fortunât, dal 1976, dopo de sdramassade dal 6 di Mai. Pre Checo al palese dute la luciditât, la clarece e la scletece dal profete. La Regjon e à scugnût tignî cont di chestis ideis che a àn contribuît a creâ il “Model Friûl”.
pre Roman Michelot
… il Friûl nol pues, di bessôl, pensâ di jevâ in pins. Al à bisugne di ducj, e gracie a ducj chei che nus àn dade une man. Però nol vûl dî che nol à di aministrâsi di bessôl. Nol è just! Nol è just! Nol è just, in non di Diu, che la rinassite dal Friûl si vedi di aministrâle insiemi cun cualchidun altri, che nô ancje o rispietìn. Però la plee de ricostruzion o vin di dâle nô e dome nô, sbaliant nô e dome nô, induvinantle nô e dome nô, parcè che se no o assistìn al ultin at de colonizazion che e dure dal 1420.
E cumò mi scoltais la seconde robe: chei che – e ur disìn gracie di cûr – a àn volût fânus regâi, che nus ai fasin cemût che nus plasin, no cemût che ur plasin. Nô o sarìn stramps, o sarìn un popul cemût che al è, ma il regâl che nus plâs al è chel che nus plâs a nô, no chel che ur plâs a ducj chei altris, parcè che se no o preferìn restâ cence regâi.
Une ultime robe e je cheste. Jo o crôt che il Stât talian al è un stât che i sin stâts simpri fedêi dal 1866 in ca: po stâi che o vedin sbaliât par ecès di fedeltât, però o sin stâts simpri fedêi e o volìn continuâ a jessilu. No stait a vê pôre che jo o sedi chi a stiçâ la int cuintri dal guvier. No, no! Però o dîs che se verementri nus vûl ben, nol à di dânus bêçs: al à di lassânus chel che o vin. Al à di dânus chê autonomie pa la cuâl lis aghis e la fuarce eletriche no deventin statâls, ma a restin furlanis. Al à di dânus plui partecipazion tes tassis che o paìn. Al à di dânus il dirit di comerciâ cui fradis slovens e todescs, che o sin stâts plui di mil agns insiemi. Parcè che, cjalait, int furlane, cjalait che al è tant diferent da bêçs da part dal Stât, e lassânus chei che o vin. Lassânus chel che o vin no je caritât: e je dome justizie. E voaltris o savês che nô furlans, pluitost che tirâ jù il cjapiel e domandâ la limuesine, o preferìn patî la fam. Che nus lassin ce che o vin, che nus cressin la autonomie che nus covente.
E lassait che us disi une robe par chei che nus aministrin cumò, che e pues jessi ancje buine int… e pues jessi stade a scuele cun me in seminari. Ur dîs une robe: che no stedin a fâ pierdi la pazience al bon e al tolerant. Tai Proverbis di Salomon e je une peraule che e dîs cussì: divuardi cuant che al piert la pazience il puar! Ur domandìn une robe: se no son bogns di ministrâ, che a vedin il coragjo di lâ vie; se son bogns di aministrâ a àn di vê il coragjo di criticâ i lôr superiôrs. Nol è lecit plui te nestre tiere, nol è lecit no vê coragjo! Chel che no lu à pe nestre int, nol servìs la int, al servìs cualchidun altri. In non di Diu, cumò, ancje dal Spiritussant che al veve siet dons, in Friûl al covente un sôl: chel dal coragjo. E alore mi capîs ce che o vuei dîus cumò: cheste robe no vâl dome pes autoritâts civîls, ma e vâl ancje par chês gleseastichis: se no àn coragjo, che a vadin a confessâsi! Chi al covente il coragjo. A àn di dânus l’esempli, a àn di sielzi tra servî un popul che forsit ur domande di vê il coragjo di dî di no a cualchidun, e sielzi di no servîlu. (…)
No dismenteâsi di une robe: che tignint dûr, cualchi volte e rive la soluzion di dut, cuant che al somee che dut al sedi pierdût. Tignint dûr o salvarìn la nestre vite ancje cheste volte, in chest mont, no dome ta chel altri. ✒ pre Checo Placerean ❚
___________________________________
Ce rûl aial vût pre Checo tal taramot? Pre Antoni al presente cun luciditât e clarece cheste presince profetiche. I siei pinsîrs ju cjatìn publicâts tal libri “Pre Checo Placerean, notis par une Biografie”. O ripuartìn cualchidune di chestis pineladis:
pre Roman Michelot
«…Lis peraulis di pre Checo a jentravin une par une tal cûr e a levin a ingrumâsi te arcje preziose de memorie. Ancjemò une volte pre Checo si è palesât furlan e dome furlan. (…) In tai tancj incuintris religjôs o culturâi o ancje umans che (pre Checo) al veve inte prime emergjence dal taramot, al à tacât a ripeti chês peraulis sapienziâls che a valevin in chê volte e che a saressin stadis ancjemò plui veris cul lâ dal timp: “Un popul nol mûr par une disgracie, però al pues murî par massepassuderie”. O ancje: “La fede, dome la fede nus dîs che Crist nus salve ancje de soference e la sô salvece e à un sens ancje se no si rive a capî cuâl che al è”. O ancje: “Tignint dûr o salvarìn la nestre vite ancje cheste volte, in chest mont e no dome in chel altri”. O ancje: “Il coragjo al covente cuant che tu sês tentât di butâlu di bande e di dî: ‘Al è dut dibant!’. In chê volte al covente tignî dûr”. Par nô a jerin tant che lis peraulis di Isaie e di Jeremie ai Ebreus de lôr ete e o crôt che ancje lôr a vedin vude, tal dîlis, plui fuarce e sigurece di chê che a vevin tal viodilis. (…) Mi visi la emozion, la serenitât, la positivitât che nus vignive dentri vie par ordin che al fevelave. Nus à fevelât di Bertrant che al veve scugnût frontâ ancje lui un taramot trement dal 1348, a 88 agns. Nus à dit che in chescj moments al covente il don dal coragjo. Nus à dit che al è just onorâ i nestris muarts cu lis lagrimis ma che al è ancje just pensâ ai vîfs cu la nestre voie di lâ indenant. (…) Un altri apontament, cheste volte storic, al è stât chel dai 11 di Lui, te basiliche mari di Aquilee, che o ai za vût mût di ricuardâlu. Là jù, denant di miârs di furlans (pre Vigji Marcuç al à dit, scherçant ma no dal dut, che “une fulugne dal gjenar si da dongje ogni mil agns”), al à proclamât l’an sant dal Friûl: “Chel an che al ven a son 900 agns che chel sant om di Indrì IV di Cjanosse al à fat duche il patriarcje di Aquilee. 900 de indipendence dal Friûl no podìn lassâju passâ cuiets, cence vignî a preâ, a dî graciis a Diu, a chel Bon Diu, par chel che nus à fat e a domandâi il coragjo di lâ indenant”.  Al finìs la sô predicje cuntune espression che mi à fat tant pensâ: “O varès tantis robis di dîus, ma graciant Idiu o vignarai a cjatâus, se o pues, tes vuestris parochiis”. Come se dentri di se al sintìs une sorte di responsabilitât eclesiastiche, morâl e ancje civîl e umane tai confronts dal popul furlan, tipiche dai patriarcjis. (…)O crôt che in chel moment pre Checo si sedi sintût invistît di une mission».  ✒ pre Toni Beline ❚