Sfuei Mensîl Furlan Indipendent
Archivi de Patrie

IL FERÂL. Cuant che une robe e va… le robin

............

Tai agns 70 dal secul passât, tra lis tantis iniziativis di pre Checo Placerean, e jere ancje la fieste dal popul furlan strenfât pal mont, che e vignive fate in Svuizare a Einsiedeln. Sul puest al jere pre Arduino Codutti che al organizave e di culì a partivin pre Checo, pre Antoni e altris predis, un grop corâl… Dut fat regolarmentri par furlan: Messe, discors, cerimoniis, e ce. Al passe cualchi an. La iniziative e dimostre cualchi interès. La int e partecipe simpri plui numerose e si console a sintî pre Checo, pre Antoni. Ma “cuant che une idee e je biele – al diseve pre Checo – il podê a prin colp al cîr di copâte; se nol rive, al cîr di comprâte; se nol rive ancjemò no, le fâs sô e le smamìs”. E vere e je stade. Culì sot o presentìn, in doi bocons, i coments di pre Antoni a seguit de VI fieste celebrade venti vie, che ju à scrits di seguit in doi numars de nestre riviste. Pre Antoni nol à mai sopuartât i difensôrs de lenghe furlane par talian, considerantju espression di un sotanisim endemic dai nestris inteletuâi di cort.
pre Roman Michelotti
***
Einsiedeln
La sagre dai furlans strenfâts pal mont, tacade inmò di pre Checo e di altris za sîs agns, e lave masse ben par che il diaul nol metès la code. E chest an le à petade di mestri, doprant chel che al organizave la fieste. Burel al à volût dâ un intono gnûf a dute la cunvigne, plui a larc e plui «mondane». E saveve masse di furlan e e jere masse serie. E cussì al à talianât intune. Se par cunbinazion i sbrissave cualchi peraule par furlan, al voltave di buride, par contentâ i talians che a àn tant fat par che dut al les conforme. Parfìn la predicje le àn fate par talian, robe par Diu mai sucedude. Un emigrant nus à contât che chest an a vevin ancje lis «marionetis, e cun cuessis par ca!». Siguramentri lui al voleve intindi lis «Majorettes» di Madrîs; bielis puemis, nuie ce dî, e par passi il voli nuie di miei. Dome che salacor i furlans a vevin fat centenârs di chilometris par passi alc altri, che ur à mancjât. E di fat plui di un al à dit che la Madone e jere plui nere di simpri. Ma no dome jê.
Porcos di talians, che a àn il vizi di ruvinâ dut e simpri doprant la coiarìe nostrane!
La Patrie dal Friûl, Otubar-Novembar 1979 n. 10-11
***
Einsiedeln: la crisi di identitât
Chel che o vin scrit in merit de VI fieste dal popul furlan strenfât pal mont, deventade taliane par colpe dai furlans, e je par Diu sacrosante. (cf. il test parsore ndr.)
Nus à capitât di lei, sot fiestis, une letare di un siôr, tra l’altri ancje un galantom, che al à ditis cuatri peraulis ben metudis venti-là par Einsiedeln, atac di Zurich. Però, nancje dîlu, al à scugnût fevelâ par talian. E di fat, al à tacât cussì:
«Cari ospiti, Autorità ecclesiastiche e consolari, Delegati di associazioni. Fradis furlans! Perdonaitmi se, par jessi capît di ducju i benvignûts Amîs, no fevelarai, par cheste volte, ta la nestre biele Marilenghe ladine».
Tant bielonone che, dopo, al à fat il so proclame (ancje induvinât) dut par talian. Al à fevelât che «oggi, purtroppo, il Friuli è travagliato da una grave CRISI DI IDENTITÀ. Siamo sottoposti da un intenso, spietato, tentacolare LAVAGGIO DI CERVELLI. Si vuol cambiare i connotati…» E jù a tratâ dal «complesso di inferiorità e di paura». Ducj par un fîl tal doprâ ancje il diaul «per strangolare la nostra Etnia, spegnere la nostra lingua, cancellare la nostra cultura, ignorare o travisare la nostra plurimillenaria storia».
Grant Idiu! Se chel che al à un tic di sâl e che al capìs, al mole lui i bregons par prin, ce no saraial di chei altris che lu scoltin e che i van daûrji tal so spieli negatîf? Vonde cun cheste pantiane, cun chest sbassâ il cjâf e mostrâ il cûl. Se mai, «par jessi capît di ducju», si volte par talian. Cuant mai finissaraial chest flagjel di fâsi capî di ducj che o sin coions?
Tal ultin, l’oratôr al à intonât il solit «Fuarce furlans ! Coragjo, Fradis Furlans!»
Al vûl propit coragjo, ve, che cun int di cheste fate al è ce gjavâsi i cjavei. Finìnle, pal amôr di Diu, di dâ vie la femine par scrupul di cussience. Nol è scrit injò che, dongje de puaretât, e à di regnâ ancje la coiarìe.
La Patrie dal Friûl, Zenâr 1980 n.1 ❚
pre Antoni Beline

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +